بۇگىن ق ر پارلامەنتى ءماجىلىسىنىڭ جالپى وتىرىسىندا دەپۋتاتتار ق ر قارجى ءمينيسترى باقىت سۇلتانوۆتان جۇمسالعان قارجىنىڭ ەسەبىن سۇراپ، سۇراقتىڭ استىنا الدى. سەبەبى، 2014 جىلى ۇلتتىق قوردان كۆازيمەملەكەتتىك سەكتورعا بولىنگەن 680 ملرد تەڭگەنىڭ 7،5 ميللياردى عانا ۇلتتىق قورعا قايتارىلعان، دەپ Qamshy.kz اقپارات اگەنتتىگى Baq.kz سايتىنا سىلتەمە جاساپ حابارلايدى.

جالپى وتىرىستا «قر-نىڭ كەيبىر زاڭنامالىق اكتىلەرىنە بيۋدجەت زاڭناماسىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭى جوباسىنىڭ ەكىنشى وقىلىمى ءوتتى. اتالعان زاڭ جوباسىن ق ر پارلامەنتى ءماجىلىسى قارجى جانە بيۋدجەت كوميتەتىنىڭ مۇشەسى ومارحان وكسىكبايەۆ تانىستىردى. كەيىن حالىق قالاۋلىلارى وزدەرىن تولعاندىرعان ماسەلەلەرگە بايلاسىنتى ۇكىمەت مۇشەلەرىنە سۇراق قويدى.

«نەگە كۆازيمەملەكەتتىك سەكتورعا قوماقتى قارجى قۇيىلادى دا، ۇلتتىق قورعا ماردىمسىز 7،5 ملرد تەڭگە قايتارىلادى؟ قارجى مينيسترلىگىنىڭ مالىمەتىنە سۇيەنسەك، بارلىعى نەگىزگى كومپانيالار، ونىڭ ىشىندە قازاقستاننىڭ تۇرعىن ءۇي قۇرىلىس جيناق بانكى، «ەير استانا»، «قتج» بار. ءبىراق ولار 2020 جىلعا دەيىن جەكەشەلەندىرىلمەك»، - دەپ ساۋال جولدادى مينيسترگە ق ر پارلامەنتى ءماجىلىسىنىڭ دەپۋتاتى مايرا ايسينا.

سۇراققا قارجى ءمينيسترى باقىت سۇلتانوۆ جاۋاپ بەردى.

«قازىرگى تاڭدا كەشەندى تۇردە 113 ملرد تەڭگەگە 291 وبەكت سالىندى. ونىڭ ىشىندە رەسپۋبليكالىق بيۋدجەت ەسەبىنەن 23 وبەكت تۇرعىزىلدى. وعان بولىنگەن قارجى 8 ملرد تەڭگەدەن اسادى. كوممۋنالدى مەنشىككە 162 وبەكت، قارجى كولەمى 33 ملرد تەڭگە، ال كۆازيمەملەكەتتىك سەكتورعا 106 وبەكت ساتىلدى. بۇل 70 ملرد تەڭگەدەن استام. ياعني ەگەر ساتىلعان وبەكت رەسپۋبليكا مەنشىگىندە بولسا، قارجى رەسپۋبليكالىق بيۋدجەتكە تۇسەدى. ال وبەكت جەرگىلىكتى مەنشىكتە بولسا، اقشا جەرگىلىكتى بيۋدجەتكە تۇسەدى. سونداي-اق، ۇلتتىق كومپانيالاردى جانە ولاردىڭ قۇرامىنا كىرەتىن ۇيىمداردى ساتۋدان تۇسكەن قارجى ءتيىستى كومپانيالاردىڭ ەسەبىنە ءتۇستى. بيىل كوكتەمدە بيۋدجەت زاڭىنا وزگەرىستەر ەنگىزىلدى. سىزدەر جەكەشەلەندىرۋدەن تۇسكەن قارجى ۇلتتىق قورعا ءتۇسسىن دەگەن تاپسىرمانى بىلەسىزدەر. قازىرگى تاڭدا ۇكىمەتتىڭ قاۋلىسى پىسىقتالىپ جاتىر»، - دەدى مينيستر.

الايدا بۇل جاۋاپ ق ر پارلامەنتى ءماجىلىسىنىڭ ءتوراعاسى نۇرلان نىعماتۋلينگە ۇناماي قالدى.

«جاۋابىڭىزدان تۇك تۇسىنبەدىم! مينيستر مىرزا، ءسىز سۇراققا جاۋاپ بەرىڭىز نەمەسە جاۋاپ بەرمەي-اق قويىڭىز. 2014 جىلدان بەرى ۇلتتىق قورداعى 680 ملرد تەڭگە كۆازيمەملەكەتتىك سەكتورعا ءبولىندى. ءتيىستى مالىمەتتەر بويىنشا جەكەشەلەندىرۋدەن (ۇلتتىق قورعا – اۆتور) 7،5 ملرد تەڭگە قايتارىلعان. ۇكىمەتتەگى ارىپتەستەر، بۇگىنگى جۇمىس كۇنىمىز ۇزاققا سوزىلاتىن ءتۇرى بار. سوندىقتان سۇراقتار بويىنشا ناقتى جۇمىس ىستەيىك»، - دەدى ول.

ەسكەرتۋدەن كەيىن باقىت سۇلتانوۆ سۇراققا ناقتى جاۋاپ بەرۋگە تىرىستى.

«رەسپۋبليكالىق بيۋدجەتتەن بولىنگەن قارجى، ونىڭ ىشىندە داعدارىسقا قارسى باعدارلامالار مەن ينفراقۇرىلىمدى دامىتۋعا ۇلتتىق قوردان بولىنگەن ترانسفەرتتەر ناقتى جوبالارعا ءبولىندى. ال ءپروفيلدى ەمەس اكتيۆتەر، ۇلتتىق حولدينگتەر مەن كومپانيالاردىڭ قۇرامىنداعى ۇيىمدار جەكەشەلەندىرىلگەن كەزدە ۇلتتىق قوردان بولىنگەن قاراجات ينفراقۇرىلىمدى دامىتۋعا باعىتتالعان جوبالاردا جۇمىس ىستەۋدە».

ءمينيستردىڭ جاۋابىنا نۇرلان ءنىعماتتۋليننىڭ كوڭىلى تولعانداي بولدى.

«سۇراققا جاۋاپ بەردىڭىز. قۇرىلىمدى ءتۇسىندىردىڭىز»، - دەدى ق ر پارلامەنتى ءماجىلىسىنىڭ ءتوراعاسى.