قازىرگى ۋاقىتتا الەمدە ءتۇرلى قاقتىعىستار ورىن الۋدا. ولاردىڭ پايدا بولىنا سەنىمنىڭ جوقتىعى سەبەپ. بۇل تۋرالى «مادەنيەت ارقىلى بەيبىتشىلىككە قول جەتكىزۋ» حالىقارالىق قاۋىمداستىعى ۇيىمداستىرعان «رۋحاني جاڭعىرۋ – بەرەكە-بىرلىك جولى» حالىقارالىق كونفەرەنسياسىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ مالىمدەدى دەپ حابارلايدى Qamshy.kz اقپارات اگەنتتىگى.  

حالىقارالىق كونفەرەنسيا  عىلىم جانە مادەنيەت سالاسىنىڭ وكىلدەرى، ءدىن كوشباسشىلارى مەن ءارتۇرلى ەلدەردىڭ مەملەكەتتىك قايراتكەرلەرى ءوز ويلارىن ورتاعا سالاتىن اشىق ديالوگ الاڭىنا اينالدى.   قاتىسۋشىلار الەمدىك قوعامداستىقتىڭ قازىرگى زامانعى پروبلەمالارى مەن الەمدىك قاۋىمداستىقتىڭ زاماناۋي قاۋىپ-قاتەرلەرىن رۋحاني جاڭعىرۋ جولى ارقىلى سالماقتى تۇردە شەشۋ ماسەلەلەرىن تالقىلادى.

كونفەرەنسيا بارىسىندا ءسوز سويلەگەن نۇرلان ەرمەكبايەۆ قازىرگى كۇنى جاھاندا كوپتەگەن قاقتىعىستاردىڭ ورىن الىپ وتىرعانىن اتاپ ءوتتى. ءمينيستردىڭ ايتۋىنشا ءتۇرلى جانجالداردىڭ ورىن الۋىنا قوعامدا سەنىمنىڭ بولماۋى سەبەپ.  سەنىم بۇل ساليقالي ۇعىم.  كەز-كەلگەن ۇلتتىڭ مادەنيەتىنە،  عىلىمىنا جانە حالىقتىڭ رۋحاني قاجەتتىلىكتەرىنە  قۇرمەت  كورسەتىلەتىن  جەردە عانا سەنىم پايدا بولادى. بۇل ءۇشىن ينتەللەكتۋالدىق جانە زياتكەرلىك ورتانى  ينتەگراسيالىق ۇدەرىستەرگە تارتۋ ءۇشىن جاڭا پراكتيكالىق شارالار قاجەت. سوندىقتان مينيستر جىل سايىنعى كونفەرەنسيانى وتكىزۋ وسى مىندەتتى شەشۋ ءۇشىن ءتيىمدى الاڭ بولاتىنىن اتاپ ءوتتى.

كونفەرەنسيا اياسىندا ەۋرازيا حالىقتارى اسسامبلەياسىنىڭ كەڭەيتىلگەن وتىرىسى ءوتتى. ەۋرازيا حالىقتارىنىڭ اسسامبلەياسى - ەۋرازيالىق ينتەگراسيا يدەيالارىن دامىتۋ تۇرعىسىندا حالىقتىق ديپلوماتياسىنىڭ قۇرالىنا اينالعان ماسكەۋدە قۇرىلعان حالىقارالىق قوعامدىق قوزعالىس بولىپ تابىلادى.

«كوپتەگەن ساياساتكەرلەر قازاقستان پرەزيدەنتىن ەۋرازياشىلدىقتىڭ يدەولوگى دەپ اتايدى.  مەملەكەت باسشىسىنىڭ  «بولاشاققا باعدار: رۋحاني جاڭعىرۋ» ماقالاسىندا كورسەتىلگەن باعدارلامالار، مىندەتتەر مەن جوبالار، ونىڭ ىشىندە ەۋرازيالىق ىنتىماقتاستىق سالاسىنداعى باستامالار  وزەكتى بولىپ تابىلادى. بۇل رەتتە، «قازىرگى جاھاندىق الەمدەگى قازاقستاندىق مادەنيەت» باعدارلاماسى ايرىقشا ماڭىزعا يە...  «تۋعان-جەر» باعدارلاماسى   اسسامبلەيانىڭ قىزمەتىنە دە وڭ اسەرىن تيگىزەدى.  باعدارلاما پاتريوتتىق تاربيە مەن ازاماتتىق بەلسەندىلىكتى دامىتۋعا باعىتتالعان » - دەدى نۇرلان ەرمەكبايەۆ.

ءمينيستردىڭ  ايتۋىنشا، اسسامبلەيا تاراپى  ۇكىمەتتىك ەمەس ۇيىمداردىڭ جۇمىسىنا قىزىعىۋشىلىق تانىتۋى كەرەك.  ءدىن ىستەرى جانە ازاماتتىق قوعام مينيسترلىگى «تۋعان جەر» باعدارلاماسىنىڭ  اياسىندا «اتامەكەن» اتاۋىمەن بىرىكتىرىلگەن ءىس-شارالارىنىڭ ورىندالۋىنا جاۋاپتى. وسىعان بايلانىستى نۇرلان ەرمەكبايەۆ ەۋرازيا حالىقتارى اسسامبلەياسىنىڭ قاتىسۋشىلارىن ءبىزدىڭ جوبالارىمىزعا قىزىعۋشىلىق تانىتىپ، بىرلەسە جۇمىس ىستەۋگە شاقىردى.

ەستەرىڭىزگە سالا كەتەيىك،  اتالعان حالىقارالىق شارا قازاقستانداعى رۋحاني كەلىسىم كۇنى مەرەكەسى اياسىندا وتكىزىلىپ وتىر. كونفەرەنسياعا تانىمال مادەنيەت جانە عىلىم قايراتكەرلەرى - ولجاس سۇلەيمەنوۆ، يوسيف كوبزون، تولەگەن مۇحامەدجانوۆ، ۆالەريا پوروحوۆا، سونداي-اق ءدىني بىرلەستىكتەردىڭ باسشىلارى مەن ۇكىمەتتىك ەمەس ۇيىمداردىڭ وكىلدەرى قاتىستى.