پارلامەنت سەناتىنىڭ ءتوراعاسى قاسىم-جومارت توقايەۆ قازاقستانعا العاش رەت كەلگەن ەىدۇ باس حاتشىسى انحەل گۋرريامەن كەزدەستى. بۇل تۋرالى Qamshy.kz اقپارات اگەنتتىگى ق ر پارلامەنتى سەناتىنىڭ باسپا ءسوز قىزمەتىنە سۇيەنە وتىرىپ جازادى. 

سەنات باسشىسى قازاقستان حالىقارالىق ارەناداعى ءبىزدىڭ ەلىمىزدىڭ ماڭىزدى ارىپتەسى بولىپ تابىلاتىن ەىدۇ-مەن ىنتىماقتاستىققا ۇلكەن ءمان بەرەتىنىن اتاپ ءوتتى. «ەىدۇ ەلدەرى قازاقستان ءۇشىن ۇلگى تۇتاتىن باعدار بولىپ تابىلادى»، - دەدى ق.توقايەۆ.

تاراپتار ەىدۇ-نىڭ قازاقستانمەن ىنتىماقتاستىق جونىندەگى ەلدىك باعدارلاماسىنىڭ جۇزەگە اسۋىن تالقىلاي كەلىپ، ونىڭ ونىمدىلىگى مەن وزەكتىلىگىن اتاپ ءوتتى. ەىدۇ-نىڭ قازاقستانعا ارنالعان ەلدىك باعدارلاماسى ينكليۋزيۆتى جانە تۇراقتى ەكونوميكالىق وسۋگە، شاعىن جانە ورتا بيزنەستى دامىتۋعا، حالىقتىڭ وسال توپتارىنا قولداۋ كورسەتۋگە، سونداي-اق گەندەرلىك ماسەلەلەردى شەشۋگە جاعداي جاساۋعا باعىتتالعان.

ەلدىڭ باعدارلامانىڭ ۇشتەن ءبىرى الەۋمەتتىك ماسەلەلەرگە ارنالعان. ا.گۋرريا قازاقستاندا جۇرگىزىلىپ جاتقان رەفورمالارعا جوعارى باعا بەردى جانە ەىدۇ-نىڭ ەلىمىزگە قاجەتتى كونسۋلتاتيۆتىك كومەك كورسەتۋگە دايىن ەكەنىن اتاپ ءوتتى. ەىدۇ باس حاتشىسى قازاقستاندا ەۋرازيا اپتالىعىن وتكىزۋگە قولداۋ بىلدىرگەنى ءۇشىن العىسىن ءبىلدىردى، سونداي-اق ۇيىمنىڭ پارلامەنتتىك جەلىسى اياسىندا ىنتىماقتاستىقتى دامىتۋدى ۇسىندى.

ەىدۇ باسشىسى سەنات ءتوراعاسىن ۇيىمنىڭ پارلامەنتتىك شارالارىنا قاتىسۋعا شاقىردى. كەزدەسۋ سوڭىندا ق.توقايەۆ قازاقستان ەىدۇ-عا مۇشە ەلدەردىڭ تاجىريبەسىن بارىنشا پايدالانۋعا جانە ەلدىڭ تۇراقتى دامۋىن قامتاماسىز ەتۋ ءۇشىن كەلەشەكتە ۇيىمنىڭ ساراپتامالىق الەۋەتىن پايدالانۋعا نيەتتى ەكەنىن اتاپ ءوتتى.