وزبەكستان پرەزيدەنتى شاۆكات ميرزيايەۆ قازاننىڭ اياعىندا رەسمي ساپارمەن تۇركياعا بارادى. بۇل تۋرالى Qamshy.kz اقپارات اگەنتتىگى ازاتتىق سايتىنا سۇيەنە وتىرىپ حابارلادى. وزبەكستان باسشىسىنىڭ ساپارى 25-27 قازاندا تۇركيا پرەزيدەنتى رەدجەپ تايىپ ەردوعاننىڭ شاقىرتۋىمەن وتەدى.
ەكى ەلدىڭ باسشىلارى سوڭعى مارتە 10 قىركۇيەكتە استانادا يسلام ارىپتەستىگى ۇيىمىنىڭ سامميتىندە كەزدەستى. سول كەزدەگى كەلىسسوزدەر بارىسىندا ساۋدا-ەكونوميكالىق، ينۆەستيسيالىق، تۋريزم جانە باسقا دا سالالارداعى ارىپتەستىكتى ارتتىرۋ ماسەلەلەرى تالقىلانعان.
بۇنىڭ الدىندا شاۆكات ميرزيايەۆ تۇركيا ازاماتتارى ءۇشىن ۆيزالىق جۇيەنى جۇمسارتۋ تۋرالى قاۋلىعا قول قويدى. ەندى ولار وزبەكستان ۆيزاسىن شاقىرتۋسىز الا الادى، ونى ءۇش كۇندە جاساپ بەرەدى.
تۇركيا مەن وزبەكستان اراسىنداعى تاۋار اينالىمى - $1،2 ملرد. وسى ۋاقىتقا دەيىن تۇرىكتىڭ قۇرىلىس كومپانيالارى وزبەكستاندا 110 جوبانى جۇزەگە اسىرىپ، $2 ملرد يگەرگەن. بۇعان قوسا، وزبەكستانداعى تۇرىك ينۆەستيسياسى - $1،2 ملرد.
