استانادا 25 قازاندا ءماجىلىس ءتوراعاسى نۇرلان نىعماتۋلين اكىمشىلىك قۇقىق بۇزۋشىلىق تۋرالى كودەكس جوباسىن ازىرلەۋشىلەردىڭ تۇتىنۋشىلاردى قايتالاپ الداعانى ءۇشىن ايىپپۇلدى تومەندەتۋ، سونداي-اق، تاۋارلاردى قۇجاتسىز ساتۋعا قاتىستى تۇزەتۋلەرىنە تاڭدانىسىن ءبىلدىردى،-دەپ Qamshy.kz اقپارات اگەنتتىگى ق ر پارلامەنت ءماجىلىسىنىڭ باسپا ءسوز قىزمەتىنە سۇيەنە وتىرىپ جازادى.

ءماجىلىستىڭ جالپى وتىرىسىندا ن. نىعماتۋلين اكىمشىلىك قۇقىق بۇزۋشىلىق تۋرالى كودەكستىڭ ءبىرىنشى وقىلىمىندا ازاماتتاردان تاۋارلار مەن قىزمەتتەردىڭ ساپاسىنا بايلانىستى الدانعاندىعى تۋرالى دەپۋتتاتتاردىڭ سايلاۋشىلارمەن كەزدەسۋ بارىسىندا دا، سونداي-اق، پوشتا ارقىلى دا كوپتەگەن شاعىمدار كەلىپ تۇسەتىنىن اتاپ ءوتتى.

- ايىپپۇل مولشەرىن تومەندەتۋگە بايلانىستى زاڭ جوباسىن ازىرلەۋشى ادىلەت مينيسترلىگى جانە وسى باپ بويىنشا اكىمشىلىك ءىستى جۇرگىزەتىن ورگان ىشكى ىستەر مينيسترلىگى نەنى باسشىلىققا الدى؟ تۇتىنۋشىلاردىڭ قۇقىقتارىن قورعاۋعا جاۋاپتى ۇلتتىق ەكونوميكا مينيسترلىگى بۇل ۇستانىممەن قالاي كەلىسكەن؟ – دەپ، ءماجىلىس ءتوراعاسى جوبانى ازىرلەۋشىلەرگە سۇراق قويدى. وسىعان وراي، ن. نىعماتۋلين جۇمىس توبىنا ءتيىستى مينيسترلىك وكىلدەرىمەن بىرگە زاڭ جوباسىنداعى اتالعان باپتاردى پىسىقتاۋ كەزىندە دۇرىس رەتتەۋ قاجەتتىلىگىنە توقتالدى. - ىزگىلەندىرۋ - جاقسى ءىس، ءبىراق ءبىزدىڭ ازاماتتارىمىزدىڭ ەسەبىنەن مەيىرىمدى بولۋعا بولمايدى، - دەدى ءماجىلىس ءتوراعاسى.