بۇگىن كوكشەتاۋ قالاسىندا ازاماتتىق بەلسەندى مارات جانۇزاقوۆتى بەلگىسىز بىرەۋ سوققىعا جىققان. مارات جانۇزاقوۆقا بۇگىن تاڭەرتەڭ شامامەن ساعات سەگىزدىڭ كەزىندە ۇيىنەن شىعىپ، كوشەدە جاياۋ كەتىپ بارا جاتقان كەزدە تۇتقيىلدان شابۋىل جاسالعان دەپ حابارلايدى Qamshy.kz اقپارات اگەنتتىگى azattyq.org-قا سىلتەمە جاساي وتىرىپ.

- اكەم بەت-الپەتى ازيالىق بەلگىسىز جىگىتتىڭ كەنەتتەن ۇرعان سوققىسىنان ەسەڭگىرەپ قۇلاپ قالعان. ەسىن جيعان كەزدە الگى ادام كەتىپ قالىپتى. اكەم تۋىستارىنا حابارلاپ، سوسىن پوليسيا بولىمىنە بارىپ، وزىنە شابۋىل جاسالعانى تۋرالى ارىز جازىپ تاپسىرعان، - دەيدى ايمان جانۇزاقوۆا.

قىزىنىڭ ايتۋىنشا، بەلگىسىز ادامنىڭ سوققىسىنان اكەسىنىڭ سول جاق سامايىنان قان اعىپ، ىسىك پايدا بولعان. مارات جانۇزاقوۆ پوليسيا قىزمەتكەرلەرىنە وقيعا بولعان جەردى كورسەتكەن كەزدە ول دا بىرگە بارعان. "پوليسيانىڭ وقيعا ورنىنان تۇسىرگەن سۋرەتتەرىن مەن كوردىم، قان ىزدەرى قالعانى انىق كورىنەدى" دەيدى ول.

ايماننىڭ سوزىنشە، شابۋىل جاساعان بەلگىسىز ادام مارات جانۇزاقوۆتىڭ زاتتارىنا تيىسپەگەن. ول ءقازىر اكەسىنىڭ جاعدايى ءبىرقالىپتى ەكەنىن، ونىڭ دەنساۋلىق جاعدايىن دارىگەرلەر زەرتتەپ جاتقانىن ايتتى.

60 جاستاعى مارات جانۇزاقوۆ كوكشەتاۋ مەملەكەتتىك ۋنيۆەرسيتەتىنىڭ رەكتورىنىڭ "ار-وجدانىنا" تيگەن ماقالاسى ءۇشىن وتكەن جىلى جاۋاپقا تارتىلىپ، سوت وعان 20 مىڭ تەڭگە ايىپپۇل سالعان.

ول قازاقستاندا دەموكراتيانىڭ دامۋى مەن ازاماتتىق قوعام قۇرۋعا ۇلەس قوسىپ جۇرگەن قازاقستان جانە شەتەل ازاماتتارىنا 2003 جىلدان بەرى بەرىلىپ كەلە جاتقان "ازاتتىق" سىيلىعىن تاپسىرۋشىلاردىڭ ءبىرى. 2014 جىلى جانۇزاقوۆ اتالعان سىيلىقتى "زاڭسىز اقشادان قارجىلاندىرعان" دەگەن ايىپتاۋ بويىنشا تەرگەۋگە الىنعان.

مارات جانۇزاقوۆ 2002 جىلى وپپوزيسيالىق "قازاقستان دەموكراتيالىق تاڭداۋى" قوزعالىسىنىڭ اقمولا فيليالىن، ونان كەيىن بيلىك تىركەمەي قويعان "العا" وپپوزيسيالىق پارتياسىنىڭ وبلىستىق فيليالىن باسقارعان. قازاقستان سوتى 2012 جىلى بۇل پارتيانىڭ قىزمەتىنە تىيىم سالعان.