ادام ءوز ءومىرى مەن تاعدىرىن كەز كەلگەن ۋاقىتتا وزگەرتە الادى. تەك وز-وزىنە سەنىمدى بولۋى كەرەك. وز-وزىنە سەنىمدى ادام عانا ومىردە ءوز ورنىن تاۋىپ، جەتىستىككە جەتە الادى. الايدا ادام ومىرىندەگى كەيبىر قاراپايىم سوزدەردىڭ ءوزى ءومىردى تۇگەلىمەن وزگەرتۋى ابدەن مۇمكىن. ءيا، ءسىز دۇرىس وقىدىڭىز. ءومىردى، تاعدىردى وزگەرتەتىن قاراپايىم سوزدەر بار. بۇل سوزدەردى كۇندەلىكتى ومىردە ءجيى قولدانىپ، امال ەتسەڭىز جەتىستىككە جەتىپ، ماقساتىڭىزدى ورىندايتىنىڭىز انىق.
ءۇمىت – ادامدى كەز كەلگەن قيىندىقتان قۇتقارادى. قانداي دا بولماسىن قيندىق كەزىندە «مەن جاقسىلىقتان كۇدەر ۇزبەيمىن، ءۇمىتسىز شايتان، مەن ۇمىتتەنەمىن»، - دەپ ايتىڭىز. ايتقانىڭىز ورىندالادى.
ساتتىلىك – پسيحولوگتاردىڭ سوزىنە سۇيەنسەك، ساتتىلىك ءوزىنىڭ اتىن اتاعانداردىڭ قاسىندا بولادى. الايدا بۇل ءسوزدى قولدانعان ادام وز-وزىنە سەنىمدى بولۋى قاجەت. «مەنىڭ جولىم بولىپ كەتسە ەكەن، ءبارى ءساتتى اياقتالسا ەكەن»، - دەۋدىڭ ورنىنا، «بارلىعى ءساتتى اياقتالادى، مەن سەنەمىن»، - دەپ ايتقان دۇرىس.
سۇيىسپەنشىلىك. ءاربىر ادام ەڭ الدىمەن ءوزىن جاقسى كورۋى كەرەك. سونىمەن بىرگە ءارقاشاندا ءوزىڭىز ءۇشىن قىمبا جاندارعا «مەن سەنى جاقسى كورەمىن»، - دەپ ايتۋ كەرەك. بۇل ءسوز دە ءومىردى تۇبەگەيلى وزگەرتەدى. سەبەبى ادام ومىرىندەگى سەزىم مەن سۇيىسپەنشىلىكتىڭ ءرولى زور. بۇل ءسوز سىزگە ءۇي نەمەسە كولىك الاتىندىعىڭىزعا كەپىلدىك بەرمەيدى، الايدا ىشكى جان دۇنيەڭىزدىڭ كوركەيۋىنە زور ۇلەسىن تيگىزەدى.
تابىس. ءاربىر باستاعان جۇمىسىڭىز تابىستى بولۋى ءۇشىن بۇل ءسوزدى ءجيى ايتۋىڭىز كەرەك. ناتيجەسىندە ءسىز ءوزىڭىزدى ىشتەي تاربيەلەپ، تابىستى قىزمەتكەر اتاناسىز. جاي عانا «بۇل جۇمىسىم تابىستى اياقتالادى»، - دەپ ايتۋ جەتكىلىكتى.
جاقسىلىق. بۇل ءسوزدى ايتقاننان گورى امال ەتكەن پايدالى. وزگەلەردىڭ سىزگە قول ۇشىن سوزعانىن قالاساڭىز، الدىمەن ءوزىڭىز باسقالارعا كومەكتەسۋىڭىز كەرەك. ءسىز جاساعان كەز كەلگەن جاماندىق تا، جاقسىلىق تا وزىڭىزگە قايتىپ كەلەتىنىن ۇمىتپاعانىڭىز ابزال. سەبەبى ءومىر – بۋمەرانگ. سىزگە بۇگىن ەشكىم كومەكتەسپەگەن بولسا، ءوزىڭىزدى كىنالاڭىز، سەبەبى ءسىز دە وزگەلەرگە قيىن ساتتە كومەك كورسەتپەگەنسىز.
سەنىم. ءارقاشان ومىرگە، تاعدىرعا سەنىم ارتا ءبىلۋ كەرەك. قيىن كەزدە بارلىق ماسەلە شەشىلەتىنىنە سەنۋ كەرەك. ءاربىر ادام ۇنەمى «بۇگىن بولماسا دا ەرتەڭ بۇل ماسەلە شەشىلەتىنىنە سەنەمىن. مەن وزىمە دە، تاعدىرىما دە سەنەمىن»، - دەپ ايتىپ ءجۇرۋ كەرەك.
سەنىمدىلىك. سەنىم مەن سەنىمدىلىك ۇقساس بولسا دا، ەكەۋىنىڭ ماعىناسى ءارتۇرلى. سەنىم وزگەگە سەنۋ بولسا، سەنىمدىلىك ءار ادامنىڭ ىشكى مەنى، ياعني وز-وزىنە سەنىمدىلىك. ەگەر ءسىز ءوزىڭىزدىڭ كۇشىڭىزگە جانە دارىندىلىعىڭىزعا سەنىمدى بولىپ، تاۋەكەل ەتسەڭىز جەتىستىككە جەتەسىز. ءاربىر جۇمىسىڭىزعا نە جاڭالىعىڭىزعا وزگەلەردى سەندىرە ءبىلۋ ءۇشىن الدىمەن ءوزىڭىز سەنۋىڭىز كەرەك. سول كەزدە ومىردە ءوز ورنىڭىزدى تابا الاسىز.
دەنساۋلىق. بۇل – ساتتىلىكتىڭ كەپىلى. ءسىزدىڭ ومىرىڭىزدەگى ەڭ قۇندى سىيلىق، باعا جەتپەس بايلىق – دەنساۋلىق. دەنساۋلىققا ءسىزدىڭ ىشكى ويىڭىز بەن ءسوزىڭىز دە اسەر ەتەدى. سول سەبەپتى ۇنەمى جاقسى ءسوز ايتىپ ءجۇرۋ كەرەك. دەنساۋلىعىڭىز ءۇشىن اقشاڭىز بەن ۋاقىتىڭىزدى اياماڭىز. سەبەبى ۋاقىت پەن اقشا ادامعا ەشقاشان جەتپەيدى.
راحمەت. بۇل ءسوزدى ءاربىر ادام كۇندەلىكتى ايتىپ ءجۇرۋى ءتيىس. ۇنەمى وزگەلەرگە العىس ايتىپ ءجۇرۋ ءسىزدىڭ كۇنىڭىزدى شۋاقتى ەتە تۇسەدى. اتا-اناڭىزعا، دوستارىڭىزعا، كۇيەۋىڭىزگە جالپى ايتقاندا جانىڭىزعا جاقىن ادامعا «سەنىڭ بار بولعانىڭ ءۇشىن راحمەت»، - دەپ ايتۋ كەرەمەت سەزىم ەمەس پە؟
