قازاقستان مەن رەسەي قىرعىزستاننان تاۋار ساتىپ الاتىن باستى مەملەكەتتەر بولىپ قالماق. بۇل تۋرالى 31 قازاندا وتكەن دوڭگەلەك ۇستەلدە قىرعىزستان ەكونوميكا مينيسترلىگىنىڭ ينۆەستيسيالاردى جانە ەكسپورتتى ىنتالاندىرۋ جونىندەگى مەملەكەتتىك اگەنتتىكتىڭ ديرەكتورى ادىلبەك ۋۋلۋ شۇمقاربەك مالىمدەدى، دەپ حابارلايدى Qamshy.kz اقپارات اگەنتتىگى.

سونىمەن قاتار شۇمقاربەك وسى كۇنگە دەيىن تۋىنداعان ماسەلەلەردى شەشۋ ەەق شەڭبەرىندە تالقىلانۋى ءتيىس ەكەنىن ايتتى. «ءبارىن ديالوگ جولىمەن شەشۋ كەرەك. بۇگىنگى تاڭدا ءونىمدى ساتۋ بارىسى ۇلكەن ماڭىزعا يە. قازاقستان مەن رەسەي قىرعىزستاننان تاۋار ەكسپورتتايتىن ەڭ باستى مەملەكەتتەر بولىپ قالا بەرەدى»، - دەدى ادىلبەك ۋۋلۋ شۇمقاربەك.

ايتا كەتەيىك، 10 قازاندا قازاقستان قىرعىزستانمەن شەكاراداعى باقىلاۋدى كۇشەيتكەن. سالدارىنان باقىلاۋ-وتكىزۋ پۋنكتەرىندە ۇلكەن كەپتەلىس ورىن العان. 18 قازاندا مەملەكەت باسشىلارىنىڭ استانادا وتكىزگەن كەلىسسوزدەرى بارىسىندا تۋىنداعان قيىندىقتار شەشىلە باستاعانداي ەدى. الايدا جۇك كولىكتەرىنىڭ جۇرگىزۋشىلەرى ءالى كۇنگە دەيىن شەكارانى وتۋدە قيىندىقتارعا ۇشىراپ جاتىر.

Edaily.com پورتالىنىڭ مالىمەتىنشە، ەكى مەملەكەتتىڭ اراسى ءالى دە شيەلەنىسىپ تۇر. استانا دا، بىشكەك تە اتالمىش قيىندىقتارعا ءبىرىن-بىرى كىنالاۋمەن كەلەدى.