ەلباسى يوردانيا كورولى ءىى ابداللامەن كەزدەستى

/uploads/thumbnail/20171101125530203_small.jpg

مەملەكەت باسشىسى قازاقستانعا رەسمي ساپارمەن كەلگەن يوردانيا كورولى ءىى ابداللامەن كەزدەستى، دەپ حابارلايدى Qamshy.kz اقپارات اگەنتتىگى.

قازاقستان پرەزيدەنتى يوردانيا كورولى ءىى ابداللامەن ەكىجاقتى كەزدەسۋلەر جوعارى دەڭگەيدە ءوتىپ جاتقانىن اتاپ ءوتتى. 

اقوردا

«ءسىز ديپلوماتيالىق قارىم-قاتىناستارىمىزدىڭ 25 جىلدىعى قارساڭىندا كەلىپ وتىرسىز. وسى جىلدار ىشىندە ءبىز سەنىمدى ءارى دوستىق ىنتىماقتاستىق ورناتتىق. ءبىز حالىقارالىق ۇيىمدار اياسىندا بىر-بىرىمىزگە قولداۋ كورسەتىپ كەلەمىز. يوردانيا قازاقستاننىڭ جاھاندىق ارەناداعى باستامالارىن قولداپ وتىر»، – دەدى نۇرسۇلتان نازاربايەۆ.

مەملەكەت باسشىسى اۋىل شارۋاشىلىعى، فارماسيەۆتيكا، قورعانىس سالالارى سياقتى ەكونوميكانىڭ ءتۇرلى سەكتورىنداعى ءوزارا ءىس-قيمىلدىڭ نىعايىپ كەلە جاتقانىن ايتتى.

قازاقستان پرەزيدەنتى يوردانيانىڭ جانە ونىڭ كورولى ءىى ابداللانىڭ تاياۋ شىعىستا بەيبىتشىلىك پەن قاۋىپسىزدىك ورناتۋداعى ءرولىن ەرەكشە اتاپ ءوتتى.

“ءسىز اكەڭىز حۋسەيننىڭ ءرولىن جالعاستىرىپ، بەيبىتشىلىك ەلشىسىنە اينالىپ وتىرسىز. قازاقستان دا ءوز وڭىرىندە وسىنداي ءرولدى اتقارۋعا تىرىسۋدا. ءبىز – يادرولىق قارۋعا قارسى قوزعالىس كوشباسشىلارىنىڭ ءبىرىمىز»، – دەدى نۇرسۇلتان نازاربايەۆ.

مەملەكەت باسشىسى يوردانيا كورولىنىڭ بىتىمگەرشىلىك قىزمەتىن جوعارى باعالاپ، وعان «يادرولىق قارۋسىز الەم جانە جاھاندىق قاۋىپسىزدىك ءۇشىن» حالىقارالىق سىيلىعىن تابىس ەتتى.

اقوردا

“بۇل – ءسىزدىڭ ەڭبەگىڭىزگە بەرىلگەن باعا. سونىمەن قاتار، ءسىز قاقتىعىستار جاعدايىندا حالىقتاردى جاقىنداتاتىن بىتىمگەرلىك ءرولدى جالعاستىرادى دەپ سەنەمىز. ءسىزدىڭ ەلىڭىز استانا پروسەسىنە بەلسەندى تۇردە قاتىسىپ كەلەدى. يوردانيا ءبىر ميلليوننان استام سيريالىق بوسقىندى قابىلدادى، سىزدەر سيرياعا قارجىلىق جانە گۋمانيتارلىق كومەك كورسەتىپ وتىرسىزدار. بۇكىل الەم وسىنى باعالاۋعا ءتيىس دەپ ەسەپتەيمىن»، – دەدى قازاقستان پرەزيدەنتى.

يوردانيا كورولى ءىى ابداللا نۇرسۇلتان نازاربايەۆقا قازاقستانعا شاقىرعانىنا العىس ايتىپ، تابىستالعان ماراپات ءۇشىن ريزاشىلىق ءبىلدىردى.

ءىى ابداللا ەكى ەل اراسىنداعى قارىم-قاتىناستىڭ سەنىمگە نەگىزدەلگەنىن ايرىقشا اتاپ ءوتىپ، قازاقستان پرەزيدەنتىنىڭ حالىقارالىق قاقتىعىستاردى بەيبىت جولمەن رەتتەۋدەگى ماڭىزدى رولىنە توقتالدى.

“ءبىز ءسىزدىڭ الەمدى ودان ءارى جاقسارتۋ جانە ءقاۋىپسىز ەتۋ ماقساتىنداعى ءرولىڭىزدى وتە جوعارى باعالايمىز. ءسىزدىڭ كوشباسشىلىعىڭىز بارشامىز ءۇشىن اسا ماڭىزدى»، – دەدى يوردانيا كورولى.

سوڭىندا يوردانيا كورولى ءىى ابداللا ءوز حالقىنىڭ اتىنان نۇرسۇلتان نازاربايەۆقا بىتىمگەرشىلىك قىزمەتى مەن كورسەتىپ وتىرعان قولداۋى ءۇشىن ريزاشىلىق ءبىلدىردى.

پىكىر قالدىرۋ

قاتىستى ماقالالار