پوليسيا قىزمەتكەرلەرى سەيسەنبى كۇنى تومەنگى مانحەتتەندەگى شابۋىلدا پايدالانىلعان جۇك كولىگىنەن قىلمىستىڭ دايش تەررورلىق ۇيىمى ءۇشىن جاسالعانىن راستايتىن جازبانى تاپتى،-دەپ Qamshy.kz اقپارات اگەنتتىگى NBC News-كە سۇيەنە وتىرىپ جازادى.
ەسكە سالا كەتەيىك، شابۋىلدى 2010 جىلى قۇراما شتاتتارعا وزبەكستاننان كەلگەن سايفۋلل حابيبۋللايەۆيچ سايپوۆ سەيسەنبى كۇنى تۇستەن كەيىن ۆەست-تيدە تاس جولىنىڭ ماڭىنا كولىگىمەن ۆەلوسيپەد جولىنا شىعىپ كەتىپ، سەگىز ادامدى ءولتىرىپ، 11 ادامدى جاراقاتتاعان بولاتىن.
سايپوۆ جۇك ماشيناسىمەن ادەيى مەكتەپ اۆتوبۋسىنا سوقتىعىسىپ، قولىنا قارۋ-جاراعىن الىپ «اللاحۋ اكبار» دەپ داۋىستادى.
جۇك ماشيناسىنان تابىلعان جازبادا «دايش ماڭگىلىك ءومىر سۇرەدى!» دەگەن جازۋ جانە پىشاق تابىلعان.
تەرروردى جاساعان سايپوۆ فلوريدادا ءومىر سۇرگەن. ونى تانيتىن وزبەكستاندىق تانىسى قوبىلجون ماتكاروۆتىڭ ايتۋىنشا، سايپوۆتىڭ مۇنداي ارەكەتكە بارۋى كۇتپەگەن جاعداي. سوڭعى رەت ونى بۇدان التى اي بۇرىن كورگەن. ماتكاروۆ: «ول وتە باقىتتى بولىپ جۇرەتىن جانە اقش-تى سۇيەتىن جىگىت ەدى»،- دەدى تەلەفون ارقىلى الىنعان سۇحباتتا.
العاشقىدا سايپوۆتىڭ اقش-قا قالاي قونىس اۋدارعاندىعى جونىندە بەلگىسىز بولعان. ال ونىڭ دوسى ماتكاروۆتىڭ ويىنشا، سايپوۆ قازىردە نيۋ دجەرسيدە تۇرىپ، Uber جۇرگىزۋشىسى بولىپ قىزمەت ىستەگەن. Uber سايپوۆتىڭ شىندىعىندا دا كولىك جۇرگىزۋشىسى بولعاندىعىن جانە ونىڭ ءومىر-بايانى جۇمىسقا كىرەر كەزىندە تولىق تەكسەرىلگەندىگىن راستادى.
وقيعا تۋرالى العاشقى مالىمدەمەلەردەن كەيىن پرەزيدەنت دونالد ترامپ تۆيتتەردە «بۇل «اقش-تا جوق!» وتە اۋىر جانە اقىلسىز ادامنىڭ تاعى ءبىر شابۋىلىنا ۇقسايدى» دەپ مالىمدەدى.
پىكىر قالدىرۋ