ەرازمۋس+ باعدارلاماسىنىڭ ءتورتىنشى بايقاۋىنىڭ جاريالانۋى اياسىندا 2017 جىلدىڭ 2 قاراشاسىندا الماتى قالاسى، حالىقارالىق بيزنەس ۋنيۆەرسيتەتىندە  (UIB) «ەرازمۋس+ باعدارلاماسىنىڭ اقپاراتتىق كۇنى» وتكىزىلىپ جاتىر،-دەپ Qamshy.kz اقپارات اگەنتتىگى حابارلايدى.

وتكىزىلىپ وتىرعان  ءىس-شارا بارىسىندا قازاقستاننىڭ جوعارى وقۋ ورىندارى مەن باسقا مۇددەلى تاراپتاردىڭ وكىلدەرىن جاڭا بايقاۋدىڭ شارتتارىمەن، ىرىكتەۋ تارتىبىمەن، ۇلتتىق جانە وڭىرلىك باسىمدىقتارىمەن تانىستىرىلدى. 

ونىمەن قوسا، ەرازمۋس+ باعدارلاماسىنىڭ شارالارىنا قاتىسۋعا قىزىعۋشىلىق بىلدىرگەندەرگە تىلەك-كەڭەس بەرىلدى. بۇل ءىس-شارانى ق ر ءبىلىم جانە عىلىم مينيسترلىگى، ەۋروپالىق كوميسسيانىڭ ءبىلىم بەرۋ، اۋديوۆيزۋالدى قۇرالدار مەن مادەنيەت جونىندەگى اتقارۋشى اگەنتتىگى (EAسEA)، قازاقستانداعى ەۋروپالىق وداق وكىلدىگى جانە قازاقستانداعى ەرازمۋس+ باعدارلاماسىنىڭ ۇلتتىق كەڭسەسى بىرلەسىپ ۇيىمداستىرۋدا.

باعدارلاما بيىل ءوزىنىڭ 30 جىلدىعىن اتاپ وتۋدە. ەو-تىڭ ەڭ تابىستى باعدارلامالارىنىڭ ءبىرى رەتىندە كەڭىنەن تانىلعان ەرازمۋس+ باعدارلاماسى 9 ميلليوننان استام تىكەلەي قاتىسۋشىلاردىڭ ءومىرىن بايىتا وتىرىپ، ەۋروپالىق ينتەگراسيانىڭ جانە حالىقارالىق بايلانىستىڭ جاعىمدى اسەرىنىڭ ناقتى مىسالى. بۇكىل الەمدە وتكىزىلەتىن ءبىرقاتار ءىس-شارالاردىڭ ءبىرى رەتىندە، قازاقستانداعى ەرازمۋس+ باعدارلاماسىنىڭ اقپاراتتىق كۇنى باعدارلامانىڭ جەتىستىكتەرىن اتاپ وتۋگە ارنالعان.

اقپاراتتىق كۇنگە ق ر ءبىلىم جانە عىلىم مينيسترلىگىنىڭ، قازاقستان رەسپۋبليكاسىنىڭ ەلشىلىكتەرىنىڭ جانە باسقا دا حالىقارالىق ۇيىمداردىڭ وكىلدەرى قاتىسۋدا. سونىمەن قاتار ءىس-شاراعا ەۋروپالىق وداقتىڭ قازاقستانداعى دەلەگاسياسىنىڭ ىنتىماقتاستىق ءبولىمىنىڭ باسشىسى يوحاننەس ستەنبەك مەدسەن قاتىستى.

ەرازمۋس+ باعدارلاماسى جونىندە

«ەرازمۋس+ باعدارلاماسى» ەۋروپالىق وداق قارجىلاندىراتىن ءبىلىم بەرۋ، جاستار جانە سپورت سالاسىندا بەلسەندىلىك پەن ۇتقىرلىقتى قولدايتىن باعدارلاما. باعدارلاما ءوزىنىڭ مۇمكىندىكتەرىن جوعارى وقۋ ورىندارىنىڭ ستۋدەنتتەرى مەن قىزمەتكەرلەرى ءۇشىن جانە بۇكىل الەمدەگى مەكەمەلەر ءۇشىن ۇسىنادى. باعدارلاما جاڭا وقۋ باعدارلامالار، وقۋ-ادىستەمەلەر جانە وقۋ-ادىستەمەلىك ماتەريالدار ازىرلەۋ جانە ەنگىزۋ ارقىلى سەرىكتەس ەلدەردەگى ءبىلىم بەرۋ جۇيەسىن جاڭعىرتۋ بويىنشا جوبالاردى جۇزەگە اسىرادى. ەرازمۋس+ باعدارلاماسى ستۋدەنتتەرگە، سونداي-اق، ءبىلىم بەرۋ مەكەمەلەرىنىڭ پروفەسسورلارى مەن اكىمشىلىك قىزمەتكەرلەرىنە باسقا ەلدەردە ءبىلىم الۋ جانە/نەمەسە كاسىبي تاجىريبە الۋ ءۇشىن مۇمكىندىك بەرەدى.

ءىس-شارادا سپيكەرلەرى مەن قاراستىرىلعان ماسەلەلەر:

باعدارلامانىڭ وتۋىنە ۇلەس قوسىپ، وعان ءتوراعالىق ەتكەن حالىقارالىق بيزنەس ۋنيۆەرسيتەتىنىڭ رەكتورى، احمەد-زاكي دارحان جۇماقان ۇلى اتالمىش باعدارلاما جونىندە قاتىسۋشىلارمەن ماڭىزدى مالىمەتپەن ءبولىستى. ق ر ءبىلىم جانە عىلىم مينيسترلىگى – ناربەكوۆا بانۋ مۋحاتايەۆنا، ق ر بعم جوعارى جانە جوعارى وقۋ ورنىنان كەيىنگى ءبىلىم بەرۋ دەپارتامەنتىنىڭ ءبىلىم بەرۋ مازمۇنى مەن ادىستەمەسى باسقارماسىنىڭ باستىعى، جبرس توبىنىڭ مۇشەسى دە اقپارات كۇنىندە بوي كورسەتتى.

قر-عى ەۋروپا وداعىنىڭ وكىلدىگى  - سەرىكتەستىك ءبولىمىنىڭ باسشىسى يوحاننەس ستەنبەك مادسەن: «ەرازمۋس+ باعدارلاماسى 2014-2020 جىلدار ارالىعىن قامتيدى، بۇل باعدارلاما ەو-دان باسقا مەملەكەتتەردىڭ جاستارىنا دە ءبىلىم الماسۋعا، وقۋعا، ۇيرەتۋگە نەگىزدەلگەن. قازاقستان مەملەكەتى ەۋروپالىق وداق سەرىكتەستەرى اراسىندا الدىڭعى ورىندا تۇر»،-دەدى.

قازاقستانداعى فرانسيانىڭ باس كونسۋلدىعى – ۋنيۆەرسيتەتتەگى سەرىكتەستىك جونىندەگى اتتاشە جيل مامەس: «قازاقستان وقۋ باعدارلامالارىن دامىتۋدا وراسان زور ۇلەس قوسىپ كەلەدى، سوندىقتان بىزدەر ورتاق ءتىل تابىسىپ كەلەمىز. بۇل جەرگە ءبىز سىزدەردى قولداۋ ءۇشىن سۇراقتارىڭىزعا جاۋاپ بەرۋ ءۇشىن كەلىپ وتىرمىز، ولاي بولسا ءبىزدى قولدانىپ، كەرەكتى اقپاراتتى ءبىلىپ الىڭىزدار»،- دەپ ءسوزىن اياقتادى.

قازاقستانداعى ەرازمۋس+ باعدارلاماسىنىڭ ۇلتتىق كەڭسەسى (ەۇق) تاسبولاتوۆا شايزادا ءومىرزاق قىزى، ەرازمۋس+ باعدارلاماسىنىڭ ۇلتتىق ۇيلەستىرۋشىسى:  «ەرازمۋس+ باعدارلاماسىنىڭ 4ء-شى رەت ۇيىمداستىرىلعان سايىس باستالىپ كەتتى. ءبىزدىڭ ماقساتىمىز وسى كونكۋرسقا قىزىعۋشىلىق بىلدىرگەن وقۋ-ورىندارىنا كەرەكتى اقپاراتپەن ءبولىسۋ. بۇل كونكۋرسقا قاتىسۋ ءۇشىن قۇجاتتاردى 8 اقپانعا دەيىن تاپسىرۋ كەرەك. ال ونىڭ ناتيجەسى تامىز ايىندا جاريا بولماق. بۇعان دەيىنازىرشە، قازاقستان ورتا ازيا مەملەكەتتەرى اراسىندا ەرازمۋس+ باعدارلاماسى بويىنشا ەڭ كوپ گرانتقا يەلەنگەن ەل بولىپ قالا بەرەدى»،-دەدى.   

ەرازمۋس+ باعدارلاماسى بويىنشا وقۋعا تاپسىرعىسى كەلەتىندەر نازارىنا:

وسى باعدارلاما بويىنشا وقۋعا تۇسكىسى كەلەتىن تالاپكەرلەر قازاقستانداعى ەرازمۋس+ باعدارلاماسىمەن جۇمىس ىستەيتىن وقۋ ورىندارى ارقىلى قۇجاتتارىن تاپسىرا الادى. بۇگىندە بۇل باعدارلامانى قولداناتىن ءبىرقاتار قازاقستاندىق وقۋ ورىندارى بار، ولار: قازۇۋ، گۋميليەۆ اتىنداعى ەۋرازيالىق ۇلتتىق ۋنيۆەرسيتەتى جانە كوپتەگەن باسقا قالالارداعى ۋنيۆەرسيتەتتەر دە كىرەدى، تولىق ءتىزىمدى مىنا سىلتەمە ارقىلى كورە الاسىز: http://www.erasmusplus.kz/index.php/ru/edukaz/uni-s.

قوسىمشا اقپارات الۋ ءۇشىن، قازاقستانداعى ەرازمۋس+ باعدارلاماسىنىڭ ۇلتتىق ۇيلەستىرۋشىسى شايزادا تاسبولاتوۆا حانىمعا (تەل.: + 7 (727) 311-86-45، neo@erasmusplus.kz) جانە قازاقستان رەسپۋبليكاسىنداعى ەۋروپالىق وداق وكىلدىگى باسپا ءسوز حاتشىسى ەلنارا باينازاروۆا حانىمعا (تەل.: + 7 (7172) 9745-67، Elnara.BAINAZAROVA@eeas.europa.eu) حابارلاسۋعا بولادى. باعدارلاما جونىندە تولىق اقپارات العىڭىز كەلسە مىنا سىلتەمە بويىنشا، رەسمي سايتتى قاراڭىز:  http://www.erasmusplus.kz/index.php/kz/.