توعىز ەلدىڭ نامىسىن ارقالاپ كەلگەن كىل مىقتىلار «SILK WAY STAR» تەلەجوباسىنىڭ كەلەسى كەزەڭىنە دايىندىقتارىن جالعاستىرۋدا. ۇمىتكەرلەر الداعى سەنبى كۇنى كورەرمەن جۇرەگىن الەمدىك ميۋزيكل جانرىنداعى تاماشا تۋىندىلارمەن جاۋلاماق. سونىمەن قاتار، ءان بايقاۋىنا قاتىسۋشىلار جانكۇيەرلەرىنە ارنايى توسىن سىي ازىرلەپ قويدى. تانىمال انشىلەر مۋزىكا الەمىنە جاساعان العاشقى قادامدارى جايلى سىر شەرتىپ، بالالىق شاققا ساياحات جاسايتىن بولادى. سوندىقتان «QAZAQSTAN» ۇلتتىق تەلەارناسىن سەنبى كۇنى 21:20-دا قوسىپ، ەكسكليۋزيۆتى سۇحباتتى وتكىزىپ الماڭىزدار،- دەپ حابارلايدى Qamshy.kz اقپارات اگەنتتىگى.
ميۋزيكل كەشى قۇلاقتان كىرىپ بويدى الار اندەرگە تولى بولارى حاق. باشقۇرتستان وكىلى يان ليرا كورەرمەندى جانتەبىرەنتەر تانىمال اعىلشىن انىمەن ءتانتى ەتپەك. ءازىربايجاندىق ەفەندي ءوز كەزەگىندە حح عاسىردىڭ توقسانىنشى جىلدارىنان باستاپ الەمدىك مۋزىكانىڭ تورىنەن ورىن العان انشىلەردىڭ تۋىندىسىن ورىنداۋعا بەل بۋدى. گرۋزيا ەلىنەن كەلگەن تەمو وسى جولى تبيليسيگە ەمەس «نيۋ-يورك» قالاسىنا ساياحات جاساۋعا شاقىراتىن بولادى. تۇركيالىق فۋلين ءانىن اسىل تاستاردى جاقسى كورەتىن قىزدارعا ارناپ، مەرەكەلىك كوڭىل كۇي سىيلاماقشى. ال تاجىكستان ەلىنىڭ سەنىمىن ارقالاپ كەلگەن سافارمۋحامماد عاجايىپ شىعىس ەرتەگىلەر الەمىنە ورالۋدى شەشتى. تاتارستاننىڭ ماليكا ەسىمدى ءانشىسى وتكەن عاسىردىڭ سۇلۋلار وبرازىن سومدايدى. قىرعىستاندىق ومار، قازاقستان نامىسىن قورعاپ جۇرگەن ايقىن جانە وزبەكستان وكىلى سايدا الداعى سەنبىدە تىكەلەي پاريجگە جول تارتۋدى ءجون كوردى.
توسىن سىيلار مۇنىمەن شەكتەلمەيدى. «Silk way star» ساحناسىندا قازاقستاننىڭ ەڭبەك سىڭىرگەن قايراتكەرى ونەر كورسەتەدى. كىم ەكەنىن، الداعى سەنبى بىلە جاتارسىز. بىزگە تەك، قاتىسۋشىلاردىڭ بارىن سالىپ، كەرەمەت شوۋ جاساۋعا ساقاداي ساي ەكەندىگى بەلگىلى.
ەستەرىڭىزگە سالا كەتەيىك، «Silk way star» تەلەجوباسى قىركۇيەك ايىنىڭ وتىزى كۇنى باستالعان ەدى. حالىقارالىق مۋزىكالىق بايقاۋعا قازاقستان، قىرعىزستان، تاجىكستان، وزبەكستان، تۇركيا، ءازىربايجان، گرۋزيا، تاتارستان جانە باشكۇرتستان ەلدەرىنىڭ انشىلەرى قاتىسۋدا. «QAZAQSTAN» ۇلتتىق تەلەارناسىنىڭ بىرەگەي جوباسى ۇلى جىبەك جولى حالىقتارىنىڭ مادەنيەتىن ۇشتاستىرىپ قانا قويماي، وسكەلەڭ ۇرپاقتىڭ تالعامىن گۇلدەندىرۋگە سەپتىگىن تيگىزەرى حاق. اپتانىڭ سەنبىسىندە 21:20-دا قاتىسۋشىلاردىڭ ورىنداۋىنان ءلاززات الىپ، قىزىقتى سۇحباتتاردان قۇر قالماڭىزدار.
