الماتىدا قۇقىقتىق قىزمەت كورسەتەتىن ورتالىق اشىلدى. ورتالىقتىڭ اشىلۋىنا قازاقستان رەسپۋبليكاسىنىڭ باس پروكۋرورى جاقىپ اسانوۆ پەن الماتى قالاسىنىڭ اكىمى باۋىرجان بايبەك قاتىستى.

«ءبىر تەرەزە» قاعيداسى بويىنشا جۇمىس ىستەيتىن قۇقىقتىق قىزمەت كورسەتۋ ورتالىعىنان قالا تۇرعىندارى ناقتى ءىس بويىنشا وزدەرىنە قاجەت بارلىق اقپاراتتاردى بىلە الادى. جۇمىس فورماتى حالىققا قىزمەت كورسەتۋ ورتالىقتارىنىڭ جۇمىسىنا ۇقساس، كەلۋشىلەر الدىمەن رەسەپشننەن ءوتىپ، كەڭەس الادى. سودان سوڭ وزدەرىن تولعاندىرعان ماسەلە بويىنشا وپەراتورلارعا بارادى، ولار كەلۋشىلەردى پروكۋرورلارعا، ادۆوكاتتارعا، مەدياتورلارعا جانە باسقا دا ماماندارعا جىبەرەدى. زاڭگەرلىك قىزمەت تەگىن كورسەتىلەدى.

قۇقىقتىق قىزمەت ورتالىعىنىڭ جالپى كولەمى 600 شارشى مەتر، ول زاماناۋي ينجەنەرلىك-تەحنيكالىق قوندىرعىلارمەن جابدىقتالعان. جايلى كەڭسەدە ەلەكتروندى كەزەك جۇيەسى، «Connection Point» وزىنە-وزى قىزمەت كورسەتۋ سەكتورى، كۇتۋ زالى جانە باسقا قاجەتتى ينفراقۇرىلىمدار بار. ورتالىق قابىرعالارى شىنىدان جاسالعان، ول قۇقىق قورعاۋ قۇرىلىمدارىنىڭ اشىقتىقتىعىن، جاريالىلىعىن قامتاماسىز ەتەدى.

«تاياۋدا عانا ءبىز قالادا ءتۇرلى ءنورماتيۆتى - قۇقىقتىق اكتىلەرمەن رەگلامەنتتەلمەگەن ءارى تۇرعىنداردىڭ ءتۇرلى ماسەلەلەرىن شەشۋگە كومەكتەسەتىن «Open Almaty» قوعامدىق قابىلداۋىن اشقان ەدىك. «ءبىر تەرەزە» قاعيداسى بويىنشا ءتۇرلى كەڭەستەر الۋعا، مەملەكەتتىك ورگاندارعا وزدەرىنىڭ وتىنىمدەرىن بەرۋلەرىنە بولادى. بۇلاردان وزگە، قالادا «Visit Almaty» تۋريستىك- اقپاراتتىق ورتالىعى دا اشىلدى. قالاعا كەلگەن ءاربىر شەتەلدىك قوناق وزىنە قاجەتتى مالىمەتتەردى الادى جانە ولارعا ءتۇرلى كەڭەستەر بەرىلەدى. قۇقىقتىق قىزمەت كورسەتۋ ورتالىعىنىڭ دا مەملەكەتتىك ورگانداردىڭ تيىمدىلىگىن، اشىقتىعىن جانە ەسەپ بەرۋىن جاقسارتۋدىڭ ماڭىزدى قۇرالىنا اينالاتىندىعىنا سەنىمدىمىن»، - دەپ اتاپ ءوتتى الماتى اكىمى باۋىرجان بايبەك.

ەلىمىزدىڭ باس پروكۋرورى جاقىپ اسانوۆ ورتالىقتىڭ نەگىزگى مىندەتتەرىنە توقتالدى. ورتالىق مىندەتىنە قۇقىق قورعاۋ جۇيەسىنە دەگەن سەنىمدىلىكتى كۇشەيتۋ، بيۋروكراتتىقتى جانە اكىمشىلىك كەدەرگىلەردى جويۋ، قۇقتىق قىزمەتتى قولجەتىمدى ەتۋ، قۇقىق قورعاۋ ورگاندارىنىڭ جۇمىس تيىمدىلىگىن ارتتىرۋ سەكىلدى قىزمەت تۇرلەرى كىرەدى.

«ورتالىقتىڭ مىندەتى ساپالى قۇقىقتىق قىزمەت كورسەتۋ. ءاربىر الماتىلىق قۇقىق قورعاۋ ورتالىعىنا كەلگەن سوڭ ساپالى كومەك الاتىنىنا سەنىمدى بولۋى ءتيىس. ءبىزدى قولداعان جانە ورتالىقتىڭ اشىلۋىنا بارلىق جاعدايدى جاساعان الماتى اكىمدىگىنە العىسىمدى بىلدىرەمىن. ورتالىق قىزمەتكەرلەرىنىڭ باستى مىندەتى - ساپالى قىزمەتتى قامتاماسىز ەتۋ»، - دەدى ج.اسانوۆ.

باس پروكۋرور مەملەكەت باسشىسىنىڭ «سيفرلى قازاقستان» باعدارلاماسىنا ايرىقشا نازار اۋداراتىنىن، وسىعان وراي قازىرگى كەزدە ۆەدومستۆودا بارلىق قىلمىستىق جانە اكىمشىلىك پروسەستەردى سيفرلى فورماتقا كوشىرۋ ءۇشىن اۋقىمدى جۇمىستار ءجۇرىپ جاتقانىن ايتتى.