الماتىدا مۇمكىندىگى شەكتەۋلى جاندار «نۇر وتان» پارتياسىنىڭ «كەدەرگىسىز كەلەشەك» جوباسى اياسىندا پارتيا وكىلدەرىمەن كەزدەسىپ، كوكەيتەستى ماسەلەلەرىن جەتكىزدى. قابىلداۋ ەلباسى جولداۋىنداعى جۇمىسپەن قامتۋ، مەديسينالىق قامتاماسىز ەتۋ تاقىرىپتارىن قامتىدى.

№11 قالالىق ەمحانانىڭ بازاسىنداعى «نۇر وتان» پارتياسىنىڭ قابىلداۋىندا جەتىسۋ اۋدانىنىڭ مۇمكىندىگى شەكتەۋلى ازاماتتارى بولدى.

قابىلداۋدى جەتىسۋ اۋدانىندا ورنالاسقان 3 مەكەمەنىڭ باس دارىگەرى «نۇر وتان» پارتياسىنىڭ «دەنساۋلىق» باستاپقى پارتيا ۇيىمىنىڭ ءتوراعاسى، №11 ەمحانانىڭ باس دارىگەرى مايرا ءجۇنىسوۆا، №21 ەمحانانىڭ باس دارىگەرى توكەيەۆا نۇرجامال،  «قۇلاگەر» ورتالىعىنىڭ باس دارىگەرى ۇلمەكەن وماروۆا ءبىر مەزەتتە جۇرگىزدى.  

«كەزدەسۋدە 2-3 توپتاعى مۇمكىندىگى شەكتەۋلى ادامدار بولدى. بۇل ازاماتتار وزدەرىن الاڭداتاتىن ماسەلەلەرىمەن ءبولىستى. اتاپ ايتقاندا، «وڭاي» كارتاسىمەن قامتاماسىز ەتۋ، مەديسينالىق مەكەمەلەردەگى دارىگەرلەردىڭ ءجيى اۋىساتىندىعى تۋرالى ايتىلدى. ەندى، ارينە ءقازىر دارىگەرلىك قىزمەتتە نەگىزىنەن جاس ماماندار. جۇمىس ىستەيتىن ماماندار بالا تۋۋ بويىنشا كەزەكتى دەمالىسقا شىعۋىنا بايلانىستى ءجيى اۋىسادى»، - دەدى №21 ەمحانانىڭ باس دارىگەرى نۇرجامال تۇكەيەۆا.

ونىڭ ايتۋىنشا، كەلۋشەردى اسا تولعاندىرعان دارى-دارمەكپەن ۋاقىتىندا قامتۋ ماسەلەسى ەكەن.

«كوبىنە دارىلەر بەرىلمەيدى نەمەسە ۋاقىتىنان كەشىكتىرىپ بەرىلەدى دەگەن پىكىرلەر ايتىلدى. فارماسيەۆتيكالىق كومپانيالار دەنساۋلىق ساقتاۋ باسقارماسىمەن كەلىسىم-شارتقا وتىرادى. ول كەلىسىم شارت اياسىندا جەتكىزىلەتىن ۋاقىت، تاعى باسقا ماسەلەلەر بەكىتىلەدى. سوندىقتان دارىمەن قامتۋ ماسەلەسى دەنساۋلىق ساقتاۋ باسقارماسىنىڭ قۇزىرىندا»، - دەدى نۇرجامال توكەيەۆا.

قابىلداۋدا بولعان ازاماتتارعا جەتىسۋ اۋدانى اكىمى اپپاراتىنىڭ الەۋمەتتىك سالا ءبولىم باسشىسى ەرلان داۆوۆ، اۋداندىق پارتيا فيليالى ءتوراعاسىنىڭ ءبىرىنشى ورىنباسارى ەرلان البيسەنوۆ مۇگەدەكتىك بويىنشا زەينەتاقى مولشەرى، باسپانا كەزەگى تۋرالى ءتۇسىندىردى.

«ءبىراز نارسەنىڭ باسى اشىلدى. جەتىسۋ اۋدانىندا اۆتوبۋس مارشرۋتتارى ىڭعايسىزدىق تۋدىرىپ وتىر ەكەن. كەيبىر مۇگەدەك ادامدار جەڭىلدىكپەن «وڭاي» كارتاسى بەرىلەتىنىن دە بىلمەيتىن بولىپ شىقتى. بىزگە قاتەرلى ىسىككە شالدىققان ايەل ادام كەلىپ شاعىمىن ايتتى. ءوزى كۇنى بويى ەمحانادا بولعاندىقتان، بالاسىنا مەكتەپتە ىستىق تاماق بەرىلۋىن ءوتىندى. ماسەلە بىردەن شەشىمىن تاپتى»، - دەدى  جەتىسۋ اۋدانى اكىمى اپپاراتىنىڭ الەۋمەتتىك سالا ءبولىم باسشىسى ەرلان داۆوۆ.