شقو تۋريستىك اۋماقتارىندا جۇمىس ىستەيتىن بيزنەسمەندەر ەندى ءوز كىرىستەرىن جاسىرىپ، جالتارا المايدى. ول ءۇشىن 2019 جىلدان باستاپ ارنايى باقىلاۋ جۇيەسى ەنگىزىلەدى. وعان سەبەپ الاكول مەن بۇقتىرما سۋ قويمالارىنداعى دەمالىس بازالارىنان تۇسەتىن سالىق كولەمى. مۇنداعى قارجى اينالىمى 10 ميلليارد تەڭگەنى قۇراعانىمەن ءتۇسىم 22 ميلليوننان اسپاي وتىر.

سالىق تولەمدەرىنىڭ جۇيەسى تۋرالى ۇسىنىس دايىنداۋعا ارنايى جۇمىس توبى كىرىسەدى. كاسىپكەرلەر پالاتاسى دا ەندى شەتتە تۇرىپ باقىلاۋدى قويىپ، ءتۇسىندىرۋ جۇمىستارىن باستايدى. شقو اكىمى دانيال احمەتوۆ «بيزنەسمەندەردىڭ ارىن وياتۋ ماسەلەسى» شەشىمىن تابۋ ءۇشىن جۋرناليستەردى دە ازاماتتىق بەلسەندىلىك تانىتۋعا شاقىردى،-دەپ حابارلايدى Qamshy.kz اقپاراتاگەنتتىگى. 

- بۇل ىسكە تەك مەن ەمەس، جۋرناليستەر دە شاقىرۋ كەرەك. ەكى دەمالىس اۋماعىنداعى قارجى اينالىمى ءبىر ماۋسىمدا 10 ميلليارد تەڭگەنى قۇرايدى. ال ءبىزدىڭ ايبىندى كاسىپكەرلەرىمىزدەن تۇسەتىن سالىق 14-تەن 22 ميلليون عانا. شىعىس قازاقستان بيزنەسىنىڭ تۋريستىك سالاسىن دامىتۋعا بەرگەن جاۋابى وسى. ينفراقۇرىلىمدى دامىتۋعا مەملەكەت ميللياردتاعان قاراجات بولەدى، ءبىراق قايتارىمى جوق. سالىق كولەمى ونداعان ەسە كوپ بولۋى ءتيىس. ونىڭ ءبارىن جاقسى بىلەمىز. ازىرگە، الداعى جىلى مازالامايمىز. ءبىراق 2019 جىلى ءبارى باسقاشا بولادى، - دەدى دانيال احمەتوۆ كەڭەيتىلگەن اپپارات جيىنىندا.  

بۇعان قاراماستان مەملەكەت ءوز قولداۋىن توقتاتپاق ەمەس. كەلەر جىلى وسينوۆ اسۋىنان اينالىپ وتەتىن جولدىڭ قۇرىلىسى باستالادى. بۇل باعىت تۇرعىندار مەن قوناقتارعا بۇقتىرما سۋ قويماسىنا جىلدام ءارى ءقاۋىپسىز جەتۋگە مۇمكىندىك بەرەدى. الاكول جاعالاۋىن اباتتاندىرۋ جۇمىستارى دا جالعاسىن تاپپاق.