سوڭعى ەكى ايدا استانادا www.enbek.kz پورتالى ارقىلى 206 جۇمىس بەرۋشى 1193 بوس جۇمىس ورىندارىن ۇسىندى، دەپ حابارلايدى Qamshy.kz اقپارات اگەنتتىگى ەلوردا اكىمدىگىنىڭ مەديا ورتالىعىنا سىلتەمە جاساپ.

استانا قالاسىنىڭ  جۇمىسپەن قامتۋ، ەڭبەك جانە الەۋمەتتىك قورعاۋ باسقارماسىنىڭ باسشىسى ەرمەك وسپانوۆتىڭ مالىمەتىنشە جۇمىسپەن قامتۋ قىزمەتىن جەتىلدىرۋگە قاتىستى استانا قالاسىنىڭ حالىقتى جۇمىسپەن قامتۋ ورتالىعى العاش بولىپ قىركۇيەك ايىندا جاڭا فورماتتا جۇمىس ىستەي باستادى.

 «نەگىزگى وزگەسىتەردىڭ ءبىرى ول HR – قىزمەتى تۇرعىسىنان جۇمىس بەرۋشىلەرگە قاجەتتى مامانداردى ساپالى تۇردە تاڭداۋ بولىپ تابىلادى. ياعني، ەگەر بۇرىن جۇمىسپەن قامتۋ ورتالىعى جۇمىس ىزدەۋشىلەرگە جۇمىس ورىندارىن ىزدەسە، ال ءقازىر، جۇمىس بەرۋشىلەرگە ماماندار ىزدەيمىز»، - دەدى ە.وسپانوۆ.

سونداي-اق ەندى جۇمىس بەرۋشىلەرگە بوس جۇمىس ورىندار تۋرالى مالىمەتتى بەرۋ ءۇشىن حالىقتى جۇمىسپەن قامتۋ ورتالىعىنا كەلىپ ءجۇرۋدىڭ قاجەتى جوق.

«ول ءۇشىن www.enbek.kz پورتالىنا تىركەلىپ جەكە كابينەت اشۋ ارقىلى ءوزىنىڭ بوس جۇمىس ورىندارىن كورسەتە الادى، ال جۇمىس ىزدەۋشىلەر وسى پورتالدا ەلەكتروندىق تۇيىندەمەلەرىن تولتىرىپ، بوس جۇمىس ورىندارىن قاراي الادى»، - دەدى باسقارما باسشىسى. ​​​