«قازاقستان اڭىزدارى» جارنامالىق كامپانياسى اياسىندا، قازاقستاننىڭ قاسيەتتى جەرلەرى – ايشا ءبيبى كەسەنەسى، قوجا احمەت ياساۋي كەسەنەسى جانە ارحەولوگيالىق قازبالار ناتيجەسىندە تابىلعان ەڭ تانىمال جادىگەر «التىن ادام» تاريحى تۋرالى تۇسىرىلگەن بەينەروليكتەر، ۇستىمىزدەگى جىلدىڭ 4 قاراشاسىنان باستاپ BBC World News تەلەارناسىندا كورسەتىلە باستادى. بەينەروليكتەردى ق ر مادەنيەت جانە سپورت مينيسترلىگىنىڭ تاپسىرىسى بويىنشا BBC وكىلدەرى جانە ش.ايمانوۆ اتىنداعى «قازاقفيلم» كينوستۋدياسى بىرلەسىپ تۇسىرگەن دەپ جازادى Qamshy.kz اقپارات اگەنتتىگى.
بەينەروليكتەردىڭ تۇسىرىلىمدەرى ۇستىمىزدەگى جىلدىڭ قىركۇيەك ايىندا «قازاقفيلم» كينوستۋدياسىنىڭ تەرريتورياسىندا جانە ەسىك، ءۇشقوڭىر، تۇركىستان، قاپشاعاي قالالارىندا وتكەن. جوبانى تۇسىرۋگە وتاندىق جانە شەتەلدىك ماماندار تارتىلعان. بەينەروليكتەرگە وڭداسىن بەسيكباسوۆ، نۇرلىباي ەسىمعالييەۆ، شۇعىلا ساپارعالي، ايان وتەپبەرگەن، دينارا باقتىبايەۆا، فاريزا ەسكەرمەس جانە باسقالار تۇسكەن.
– وسى جىلى كوكتەمدە پرەزيدەنت نۇرسۇلتان نازاربايەۆ ءوز جولداۋىندا ەلىمىزدىڭ ءۇشىنشى جاڭعىرۋىن ورىنداۋ ماقساتىنداعى باستى جوبا دەپ – «قاسيەتتى قازاقستان» جوباسىن اتاعان بولاتىن. ۇلتتىق كودىمىزدىڭ نەگىزى بولىپ تابىلاتىن، حالقىمىزدىڭ باي مۇراسىن جانە مادەنيەتىن ناسيحاتتاۋ ءۇشىن، «قازاقفيلم» كينوستۋدياسى BBC World News تەلەارناسىمەن بىرلەسە وتىرىپ، «قازاقستان اڭىزدارى» اتتى جارنامالىق كامپانيانى باستاپ كەتتى. كامپانيانىڭ باستى ماقساتى – سىرتقى جانە ىشكى مادەني ءتۋريزمدى دامىتۋ. ول ءوز كەزەگىندە الەمدىك باسەكەلەستىككە جول باستايدى، - دەدى ش.ايمانوۆ اتىنداعى «قازاقفيلم» كينوستۋدياسىنىڭ ۆيسە-پرەزيدەنتى سەرىپ جۇباندىقوۆ.
الەمدە مونۋمەنتتەردىڭ تۇرعىزىلۋ تاريحى ۇمىت قالىپ جاتادى. كەيدە تۋريستەرگە نەمەسە ساياحاتشىعا مونۋمەنتتىڭ وزىنەن ونىڭ تۇرعىزىلۋ تاريحى قىزىقتىراق بولادى. جانە ونىڭ مادەني جانە تاريحي ەسكەرتكىش رەتىندەگى الاتىن ورنى تۋرالى دا اقپارات العىسى كەلەدى. قازاق حالقى كەسەنەلەردىڭ بوي كوتەرۋ تاريحىن ساقتاپ كەلەدى. سونىڭ ارقاسىندا بۇل ارحەولوگيالىق ەسكەرتكىشتەر ۇلتتىڭ شىن مانىسىندەگى قۇندىلىعىنا اينالادى.
التىن ادام مەن قازاق حالقىنىڭ ءبىر اڭىزىندا ۇشىراساتىن – جاس جاۋىنگەر التىن-ايداردا ۇقساستىق بار. بۇل روليكتە رەجيسسەردىڭ كونسەپسياسى بويىنشا التىن ادام مەن اڭىزداعى ايداردىڭ بەينەلەرى ءبىر سارىندا ورىلەدى.
