ءۇشتىلدى جەتىك مەڭگەرگەن جاستار اراسىنداعى «ءتىلدارىن» رەسپۋبليكالىق وليمپياداسى ءوز مارەسىنە جەتتى دەپ حابارلايدى Qamshy.kz اقپارات اگەنتتىگى.

قازاقستان رەسپۋبليكاسىندا تىلدەردى دامىتۋ مەن قولدانۋدىڭ 2011-2020 جىلدارعا ارنالعان مەملەكەتتىك باعدارلاماسى اياسىندا قازاقستان رەسپۋبليكاسى مادەنيەت جانە سپورت مينيسترلىگى تىلدەردى دامىتۋ جانە قوعامدىق-ساياسي جۇمىستار كوميتەتى مەن شايسۇلتان شاياحمەتوۆ اتىنداعى تىلدەردى دامىتۋدىڭ رەسپۋبليكالىق ۇيلەستىرۋ-ادىستەمەلىك ورتالىعى ۇيىمداستىرعان شارا ءوز دەڭگەيىندە ءوتتى. استانا، الماتى قالالارى مەن ايماقتىق ىرىكتەۋدەن سۇرىنبەي وتكەن سايىسكەرلەر بۇگىن «بالداۋرەن» رەسپۋبليكالىق وقۋ-ساۋىقتىرۋ ورتىلىعىندا بىلىمدەرىن تارازىلادى. 18-20 جاس ارالىعىنداعى قازاق، ورىس، اعىلشىن تىلدەرىن يگەرگەن جاستاردىڭ ءبىلىمىن ارنايى قۇرىلعان قازىلار القاسى باعالادى. قازىلار القاسى قۇرامىندا اكادەميك، ە.ا. بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ قازاق ادەبيەتى كافەدراسىنىڭ پروفەسسورى، فيلولوگيا عىلىمدارىنىڭ دوكتورى جاندوس سماعۇلوۆ، ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ شەتەل تىلدەرىنىڭ تەورياسى جانە تاجىريبەسى كافەدراسىنىڭ دوسەنتى، پەداگوگيكا عىلىمدارىنىڭ كانديداتى جايناش نۇرجانوۆا، ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ قازاق ءتىل ءبىلىمى كافەدراسىنىڭ دوسەنتى، فيلولوگيا عىلىمدارىنىڭ كانديداتى سالتانات شوقابايەۆا، ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ ورىس فيلولوگياسى جانە كىتاپحانا ءىسى كافەدراسىنىڭ جەتەكشىسى، فيلولوگيا عىلىمدارىنىڭ كانديداتى گۇلنارا فاتكييەۆا، ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ وقۋ-ادىستەمەلىك جانە اعىلشىن ءتىلى كافەدراسىنىڭ دوسەنتى، فيلولوگيا عىلىمدارىنىڭ كانديداتى ايناگۇل يسماعۇلوۆا بار.

وليمپيادا ەرەجەسىنە ساي قاتىسۋشىلار ءۇش كەزەڭ بويىنشا تاپسىرما ورىندادى. ولار العاشقى اينالىمدا بەرىلگەن تاقىرىپتاردىڭ ءۇش تىلدە مازمۇنىن اشسا، ەكىنشى كەزەڭدە ىلەسپە اۋدارما جاسادى. العاشقى ەكى اينالىمدا ءۇش ءتىلدى ءبىلۋ دەڭگەيلەرىن كورسەتسە، سوڭعى سايىستا قازاق تىلىندە بەرىلگەن تاقىرىپتا ەسسە جازدى.

- اۋقىمدى ۇيىمداستىرىلىپ وتىرعان بۇل شارانىڭ ماقساتى - قازاق، ورىس، اعىلشىن تىلدەرىن جوعارعى دەيگەيدە بىلەتىن جاستار سانىنىڭ ارتۋىنا ىقپال ەتىپ، قازىرگى جاسامپاز قازاقستاننىڭ ءۇش تۇعىرلى ءتىلدى دامىتۋ باعدارلاماسىنىڭ ورىندالۋىنا جاعداي جاساۋ. جانە وزگە تىلدەردى مەڭگەرگەن جاستارىمىز ارقىلى قازاق ءتىلىنىڭ قولدانىس اياسىن كەڭەيتۋ. ىلەسپە اۋدارما جاسايتىن كاسىبي ماماندار سانىن ارتتىۋ بولىپ وتىر. سوندىقتان جاستارىمىزدىڭ ءبىلىم دەڭگەيىن باعالاپ، ولاردى ىنتالاندىراتىن مۇنداي جارىستار ءجيى بولىپ تۇرسا ارتىق ەتپەيدى،- دەيدى قازىلار القاسىنىڭ ءتوراعاسى جاندوس سماعۇلوۆ.

وليمپيادا قورىتىندىسى بويىنشا، باس جۇلدەنى الىبەك مارات جەڭىپ الدى. ءۇش تاپسىرمانى دا تياناقتى ورىنداعان ول قازىلار شەشىمىمەن ناعىز پوليگلوت اتاندى. ال ءبىرىنشى ورىن قىزىلوردالىق ايدانا ابۋباكيروۆاعا بۇيىردى. ەكىنشى ورىندى كاميلا احمەتوۆا ەنشىلەسە، ۇزدىكتەر قاتارىن گۇلميرا كامەنوۆا مەن ەكاتەرينا بوبكا تولىقتىردى.

ء-ۇش تۇعىرلى ءتىل ساياساتىن جۇيەلى جۇرگىزۋ ءۇشىن جاستارىمىزدىڭ ىقىلاسىن ءتىل ۇيرەنۋگە اۋدارۋ كەرەك. سوندا عانا قازاقستان باسەكەگە بەيىم، اعىلشىن ءتىلىن مەڭگەرگەن، عىلىمنىڭ ساي سالاسىندا بولسىن قاجەتتى اقپاراتىن قولجەتىمدى الا الاتىن جاستارىمەن ماقتاناتىن بولادى. بۇگىنگى بايقاۋ جوعارعى دەڭگەيدە ءوتتى. ءار ايماقتىڭ ءۇش ءتىلدىڭ جىلىگىن شاعىپ، مايىن ىشكەن جاستار كەلگەن. سوندىقتان ولاردىڭ ءاربىرى جەڭىمپاز، - دەيدى جارىس جۇلدەگەرى ايدانا شىنبولات قىزى.

ءيا، ۇيىمداستىرۋشىلار وزگە قاتىسۋشىلاردى دا ۇمىتپادى. اينەلا قوجاقمەتوۆا مەن نۇرگۇل سەيداحمەتكە ىنتالاندىرۋ سىيلىعى تابىستالىپ، وزگە قاتىسۋشىلار العىسحاتتارمەن ماراپاتتالدى. جۇلدەگەرلەرگە قارجىلاي سىيلىق بەرىلدى. سالتاناتتى شارا مەرەكەلىك كونسەرتپەن جالعاستى.