«Attila Group» كومپانياسى تەگىن كونۆەرتەر جاساۋشىلارعا 10 ميلليون تەڭگە ۇسىنادى.

اسا قادىرمەندى، وقىرمان! جاقىندا عانا ەلباسىنىڭ جارلىعىمەن لاتىن گرافيكاسىنا نەگىزدەلگەن قازاق ءالىپبيىنىڭ نۇسقاسى قابىلدانىپ، قازاق ءتىلى 2025 جىلعا دەيىن لاتىن گرافيكاسىنا اۋىساتىنى بەلگىلى بولدى. وسىعان بايلانىستى مادەنيەت جانە سپورت ءمينيسترى ارىستانبەك مۇحامەدي ۇلى قازاق ءالىپبيىنىڭ كونۆەرتەرىن جاساۋعا 56 ميلليون تەڭگە قاراستىرىلىپ جاتقانىن جاريالاعان.

ال، 11 قىركۇيەكتە پارلامەنتتىك تىڭداۋدا «مەملەكەتتىك ءتىلدىڭ ءبىرىڭعاي ستاندارتتى ءالىپبيىنىڭ كونۆەرتەرىن» ۇسىنعان «Attila Group» كومپانياسىنىڭ وكىلى كونۆەرتەر جوباسىندا اتقارىلۋعا ءتيىس جۇمىستار تۋرالى Qamshy.kz پورتالىندا «كونۆەرتەر دەگەن ءبىر ءارىپتى ءبىر ءارىپتىڭ ورنىنا قويا سالۋ ەمەس» دەگەن ماقالا جاريالاعان.

#56ميلليوننەۇشىن؟ دەگەن حەشتەگپەن facebook الەۋمەتتىك جەلىسىندە وزدەرىن پروگرامميست دەپ اتاعان ارشات وراز، ىرىمبەك ءىزعالي، رايىمبەك ەگەمبەردييەۆ جانە نۇرلان قۇلىمبەتوۆ، Meihua Zheng(گۇلىم ورازبايەۆا)، بەيسەن احمەت ۇلى سەكىلدى الەۋمەتتىك جەلى قولدانۋشىلارى «كونۆەرتەر جوباسىنا ەشقانداي قارجى كەتپەيدى، «Attila Group» كومپانياسى جالعان سمەتا جاساپ وتىر» دەپ مالىمدەدى. رىمبەك ءىزعالي مىرزا «ازاتتىققا» بەرگەن سۇحباتىندا كونۆەرتەردى ەشقانداي قارجىسىز، 2 ساعات ۋاقىتتا جاساۋعا بولاتىنىن كورسەتتى.

وسى قيسىنعا سۇيەنسەك، كيريلل-لاتىن، لاتىن-كيريلل، توتە-لاتىن، لاتىن-توتە الىپبيلەرىنىڭ(بايتۇرسىن ۇلى ءالىپبيى) كونۆەرتەرىن ازىرلەۋگە بار-جوعى 8 ساعات ۋاقىت كەتەدى. سونداي-اق، «كونۆەرتەر دەگەن ءبىر ءارىپتى ءبىر ءارىپتىڭ ورنىنا اۋىستىرا سالۋ» (نۇرلان قۇلىمبەكتوۆ) قاعيداسىمەن توتە جازۋدىڭ دا كونۆەرتەرىن جاساۋ ەش قيىندىق اكەلمەۋى ءتيىس.

الەمدە 17 ميلليوننان استام قازاق بارىن ەسكەرسەك، ەلىمىزدەگى جانە وزگە دە تمد ەلدەرىندە قونىستانعان  15 ميلليون قازاق كيريلل ءالىپبيىن، قىتايداعى 1،5 ميلليون قازاق توتە جازۋ گرافيكاسىن قولدانادى. ەندىگى كەزەكتە لاتىن گرافيكاسىنا نەگىزدەلگەن قازاق ءالىپبيى بويىنشا 17 ميلليون قازاق ورتاق ءالىپبيدى قولدانۋعا مۇددەلى. «دۇنيەجۇزىندەگى بار قازاقتىڭ وتانى — قازاقستان (– ن. نازاربايەۆ.)» ەكەنىن ەسكەرسەك، قازاق ەلى ءۇش الىپبيدە، ياعني، كيريلل، توتە، لاتىن گرافيكاسىنا نەگىزدەلگەن كونۆەرتەردى ۇسىنۋعا مىندەتتى. V دۇنيەجۇزى قازاقتارى قۇرىلتايىندا ەلباسى «قازاق ءتىلىن لاتىن الىپبيىنە كوشىرۋ – انا ءتىلىمىزدىڭ جاھاندىق عىلىم مەن بىلىمگە كىرىگۋىن، ءارى الەم قازاقتارىنىڭ رۋحاني تۇتاستىعىن قامتاماسىز ەتەتىن بىرەگەي قادام»، - دەگەن بولاتىن.

ەندى، قازاق الىپبيلەرى اراسىندا نە ءۇشىن بىر-بىرىنە كونۆەرتاسيا كەرەكتىگىنە قىسقاشا تۇسىنىكتەمە بەرە كەتەيىك:

1. كيريلل الىپبيىنەن لاتىن گرافيكاسىنا كونۆەرتاسيا جاساۋ كەرەكتىگى ايتپاسا دا تۇسىنىكتى.
2. لاتىن الىپبيىنە كوشۋ پروسەسى 2025 جىلعا دەيىن جالعاساتىنىن ەسكەرسەك، 2 ءالىپبي قاتار قولدانىلاتىندىقتان، لاتىن گرافيكاسىنان كيريلل الىپبيىنە كونۆەرتاسيا جاساۋ قىزمەتىنىڭ دە قوسىلۋى مىندەتتى. مۇندا ۇرپاق ساباقتاستىعىن دا ەسكەرگەن ءجون.
3. لاتىن گرافيكاسىنان توتە جازۋعا، توتەدەن لاتىنعا كونۆەرتاسيا جاساۋ. قىتايداعى 1،5 ميلليون، ەلگە ورالعان 100 مىڭ قازاق توتە جازۋدىڭ قولدانۋشىلارى بولىپ ەسەپتەلەدى. سوندىقتان ارعى بەتتەگى مىڭداعان تاريحي-ەتنوگرافيالىق جازبالاردى وزىمىزگە اۋدارۋ ءۇشىن جانە مەملەكەتتىك ساياساتىمىزدى، اعىمداعى اقپاراتتارىمىزدى قانداستارىمىزعا جەتكىزۋ ءۇشىن بۇل دا قازاق مەملەكەتىنىڭ مىندەتى.

          قازاق ءالىپبيىنىڭ كونۆەرتەرى وسى مىندەتتەردىڭ ورىندالۋى ءۇشىن جاساۋلى ءتيىس. مەملەكەتتىڭ ءاربىر تيىنىنا الاڭداپ وتىرعان ازاماتتار «ءار قازاق مەنىڭ جالعىزىم» دەيتىن ءپرينيسپتى دە ۇمىتپاعانى ءجون.

ال بايقاۋعا كەلسەك، ونىڭ شارتى وتە قاراپايىم.

قاتىسۋشىلارعا «Attila Group» كومپانياسى ۇسىنعان كونۆەرتەر جوباسىنىڭ بارلىق مىندەتى جۇكتەلمەيدى. ۋاقىت، قارجى تالاپ ەتەتىن ۇيالى تەلەفون قوسىمشاسى، سايتتار مەن بروۋزەرلەرگە ارنالعان plugin جاساۋ سىندى تالاپتار قاراستىرىلمايدى.  تەك ءۇش الىپبيدەگى ءماتىندى بىر-بىرىنە قاتەسىز اۋداراتىن كونۆەرتەر ۇسىنسا بولعانى. بايقاۋعا قاتىسۋشى پروگرامميستىڭ قانداي باعدارلاما ءتىلىن قولداناتىنى، قانداي جۇيەگە باعىتتايتىنى ءوز ەركىندە.

بايقاۋدىڭ باستالۋى: 11.11.2017. ساعات 22:00. اياقتالۋى: 13.11.2017 ساعات 14:00.

ءوزىن پروگرامميست دەپ اتاعان ازاماتتار كونۆەرتەر جاساۋ ءۇشىن 2 ساعات ۋاقىت كەتەتىنىن ايتقان بولاتىن. ءبىز جاريالاعان بايقاۋ ۋاقىتى بۇدان 20 ەسە كوپ. ەندەشە، بارلىق پروگرامميستەرگە ساتتىلىك تىلەيمىز.

بايقاۋ قورىتىندىسى فەيسبۋك الەۋمەتتىك جەلىسىندە تىكەلەي ەفيردە  كورسەتىلەدى. وعان 3 فيلولوگ عالىم قازىلىق جاساۋى ءتيىس: قازىلار قۇرامىن وقىرماندار مەن الەۋمەتتىك جەلى قولدانۋشىلارىنىڭ ۇسىنۋىن سۇرايمىز. اباي جولى رومانىنان، ەلباسى ماقالاسىنان(ەملە قاتەلىگى از بولۋى كەرەك)، مەكتەپ وقۋلىعىنان 10 بەتتەن 3 ءماتىن الىنعانى ءجون.

ءماتىننىڭ دۇرىستىعى 99.5%-دان كەم بولماۋى ءتيىس. ياعني 1000 ارىپكە 5 قاتە «كەشىرىلەدى». لاتىن ءالىپبيىنىڭ ەملە ەرەجەسى قابىلدانباعاندىقتان نەگىزگى باعىت كيريلل مەن توتە جازۋ الىپبيلەرىنىڭ ەملەسىنە نەگىزدەلەدى. بايقاۋ قورتىندىسىنا تاۋەلسىز ساراپشى رەتىندە قوعام بەلسەندىسى، زاڭگەر ايگۇل ورىنبەك حانىمدى شاقىرامىز.

قازاق ءالىپبيىنىڭ كونۆەرتەرى ارقىلى حالىقارالىق نورماتيۆتىك قۇجاتتار، مەملەكەتتىك ءىس-قاعازدارى، وقۋلىقتار، ادەبي شىعارمالار اۋدارىلاتىنىن ەسكەرسەك، ونىڭ ەملە زاڭدىلىعى مۇلتىكسىز بولۋىنا ءار قازاق مۇددەلى دەپ ويلايمىز.

بايقاۋ ۋاقىتى ارالىعىندا دايىندالعان كونۆەرتەر بايقاۋ تالاپتارىنا جاۋاپ بەرسە، «Attila Group» كومپانياسى 10 ميلليون تەڭگە سىياقى بەرۋمەن قاتار كونۆەرتەر جاساۋ ءۇشىن مەملەكەتكە ۇسىنعان قۇنى 56 ميلليون تەڭگە تۇراتىن جوباسىنان باس تارتادى. ەگەر، وسى ۋاقىت ارالىعىندا قاتەسىز اۋداراتىن كونۆەرتەر ۇسىنا الماسا  «Attila Group» كومپانياسىڭ اتىنا ايتىلعان الەۋمەتتىك جەلىلەردەگى سىن يەلەرى حالىق الدىندا كەشىرىم سۇراۋى ءتيىس. سەبەبى، «قازاق ءالىپبيىنىڭ كەمەلدى كونۆەرتەرىن جاساۋ - ۋاقىتتى، شىعىندى تالاپ ەتپەيدى» دەگەن اقپارات حالىقتى اداستىرۋمەن، الداۋمەن، قازاق ءتىلىن قورلاۋمەن، مەملەكەت بيلىگىن قارالاۋمەن تەڭ.

ءوز كەزەگىندە «Attila Group» كومپانياسى الەمدەگى بار قازاققا ورتاق كەمەلدى كونۆەرتەر جاساۋ ءۇشىن 56 ميلليون تەڭگەدە ازدىق ەتەدى دەگەن پىكىرىنەن باس تارتپايدى.

ءوزىن پروگرامميست دەپ اتاعان ازاماتتار مەن تەگىن كونۆەرتەر ۇسىنۋشىلار وسى بايقاۋعا قاتىسۋ ءۇشىن ەرتەڭ ياعني جەكسەنبى ساع. 12:00-گە دەيىن تىزىمدەلۋى ءتيىس.

تەل: +7 707 552 2797

ەل.پوشتا: attilakz.team@gmail.com

قۇرمەتپەن، «Attila Group» كومپانياسى

كونۆەرتەر جاساۋعا ىڭعايلى بولۋ ءۇشىن ءالىپبي تاڭبالارىن ۇسىنامىز: