بۇگىن پاريجدە ۇيىم باسشىلىعىنىڭ قاتىسۋىمەن حالىقارالىق كورمەلەر بيۋروسى (حكب) باس اسسامبلەياسىنىڭ 162-سەسسياسى ءوتتى. جيىندا «استانا ەكسپو-2017» ۇك» اق باسقارما ءتوراعاسى احمەتجان ەسىموۆ استانا قالاسىنداعى ەكسپو-2017 حالىقارالىق مامانداندىرىلعان كورمەسىن وتكىزۋ قورىتىندىلارى تۋرالى ءسوز سويلەدى،- دەپ Qamshy.kz اقپارات اگەنتتىگى. 

حكب اسسامبلەياسىنىڭ سەسسياسى بارىسىندا احمەتجان ەسىموۆ ق ر پرەزيدەنتى نۇرسۇلتان نازاربايەۆتىڭ اتىنان حكب باس حاتشىسى ۆيسسەنتە لوسسەرتالەسكە ءىى دارەجەلى «دوستىق» وردەنىن تابىستادى. ۇلتتىق كومپانيانىڭ باسشىسى الەمدە ەكسپو كورمەلەرىنىڭ جەمىستى وتكىزىلۋىندە حكب ءرولى ەرەكشە ەكەندىگىن اتاپ ءوتتى.

«ءبىزدىڭ الدىمىزدا ءۇش باستى مىندەت تۇردى: 100 استام ەل مەن جەتى حالىقارالىق ۇيىمنىڭ قاتىسۋىن قامتاماسىز ەتۋ، ەكى ميلليوننان استام كەلۋشىلەردى تارتۋ مەن شارانى جوعارى دەڭگەيدە ۇيىمداستىرۋ. بارشاڭىزعا بەلگىلى، ەكسپو كورمەسىنە 115 ەل مەن 22 ۇيىم قاتىستى»، - دەدى احمەتجان ەسىموۆ. 

سونىمەن قاتار، كەلۋشىلەر سانى جوسپارلانعان كورسەتكىشتەن ەكى ەسە استى، كورمەنى ءتورت ميلليونعا جۋىق ادام تاماشالادى. ماسەلەن، قازاقستاننىڭ ۇلتتىق پاۆيلونى - «نۇر الەم» نىسانىنا ءبىر ميلليون ءۇش ءجۇز مىڭ ادام كەلگەن.

«بۇگىندە الدىمىزدا تۇرعان ماقساتتاردىڭ بارلىعىنا قول جەتكىزىپ، مىندەتتەردى ورىنداعانىمىزدى زور ماقتانىشپەن ايتا الامىز. جۇمىلا جۇمىس ىستەپ، جوعارى تەحنولوگيالى ايماق قۇردىق»، - دەپ اتاپ ءوتتى ۇلتتىق كومپانيانىڭ باسشىسى. 

ەكسپو قازاقستاننىڭ ەكونوميكالىق دامۋىنا سەرپىن بەردى. كورمەگە دايىندىق جۇمىستارى جانە ونى وتكىزۋ بارىسى ءجىو-نىڭ 4،3%-عا وسۋىنە سەپتىگىن تيگىزدى. سونداي-اق، تاۋار شىعارىلىمىنىڭ ءوسىمى 70%-عا، ال تۋريستىك قىزمەتتەرگە دەگەن سۇرانىس 78%-عا ۇلعايدى.

ەكسپو-2017 باستالۋىنا دەيىن، بىرەگەي وبەكتىلەردى كورمە مۇراسى رەتىندە ساقتاۋ جانە ىڭعايلى تۋريستىك ايماقتى قۇرۋ شەشىمى قابىلداندى.  

ەستەرىڭىزگە سالايىق، 11 قاراشادان باستاپ «نۇر الەم» ۇلتتىق پاۆيلونى، ۇزدىك تاجىريبەلەر ايماعى، ەكى تاقىرىپتىق پاۆيلون جانە ارت-ورتالىعى  قايتادان ءوز ەسىكتەرىن ايقارا اشتى.