قىتايلىق Weibo الەۋمەتتىك جەلىسىنىڭ قولدانۋشىلارى جاپپاي اۆتوكولىك اپاتى بولعان جەردە  انحوي پروۆينسياسىنداعى فۋيان راديوستانسياسىنىڭ ءتىلشىسى جاساعان سەلفيدى قاتاڭ سىننىڭ استىنا الدى. بۇل تۋرالى كەشە Shanghaiist حابارلادى دەپ جازادى Qamshy.kz اقپارات اگەنتتىگى.

Weibo قولدانۋشىلارىنا اۆتوكولىكتەر سوقتىعىسقان جەردەگى ءتىلشىنىڭ قولىنا پرەسسانىڭ بەيدجيگىن جانە تىنىشتىق بەلگىسىن جاساپ تۇرىپ، كۇلگەن سۋرەتى ۇناعان جوق. ولار:

«سەن ءوزىڭ كاسىبي ەتيكا دەگەننىڭ نە ەكەندىگىن بىلەسىڭ بە؟ بۇل جەر نە سەن ءۇشىن كۇلكىلى مە؟» -دەپ كىجىنىپ جاتىر.

وسىنداي اشۋلى پىكىرلەردەن كەيىن قىزدى راديوستانسياداعى جۇمىستان شىعارىپ جىبەردى. كەتەر الدىندا قىز كەشىرىم وتىنگەن كىشىگىرىم ۆيدەوجازبا قالدىرىپ كەتتى.

«سەن شىن كوڭىلمەن ايتىپ تۇرعان جوقسىڭ. ساعان مۇلدەم سەنبەيمىز. بۇل جاعدايعا سەنىڭ ءوزىڭ عانا كىنالىسىڭ»،- دەپ رەنجۋلى جەلى قولدانۋشىلارى وعان جاۋاپ جازدى.

اۆتوكولىك اپاتى 15 قاراشادا انحويلىق تراسسادا ورىن العان. جاپپاي كولىك سوقتىعىسى سالدارىنان بىرنەشە كولىك وتقا ورانعان. وعان ءورت سوندىرۋشىلەر 3 ساعاتتان استام ۋاقىت جۇمسادى. ناتيجەسىندە اپاتتان ونداعان ادام زارداپ شەكتى. جول اپاتى قالىڭ تۇمان سالدارىنان بولعان.