«The ەفير» جوباسىندا وليمپيادا چەمپيونى، بەلگىلى بوكسشى دانيار ەلەۋسىنوۆ ءلايلا سۇلتانقىزىنا ءوزىنىڭ تابىسى جايلى جانە كاسىپقوي بوكسقا نە سەبەپتى اۋىسپاي قالعانىنا قاتىستى، سونىمەن قاتار، ايەلىمەن اجىراسقانى تۋرالى جاڭا ءمان-جايدى باياندادى، — دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساي وتىرىپ.
سۇحبات بارىسىندا ەلەۋسىنوۆ جەكە ءومىرى جايلى دەرەكتەردى اشىق ايتتى. «نەگىزىندە قۇپيا ساقتاعىم كەلگەن. شىنىمدى ايتسام، ءقازىر جانۇيام قاسىمدا ەمەس. بالاممەن ارالاسامىن. جاقىن ارادا عانا سونداي شەشىمگە كەلدىك. الدا ۋاقىت كورسەتەدى. بولەك تۇرىپ كورەيىك، ەڭ باستىسى بۇل جەردە ءبىزدى ۇستاپ تۇرعان بالا بولاتىن، بالا قينالىپ قالماسىن دەدىك. اكەسىنەن ايىرىلماسىن دەگەن ويىمىز بولدى. ەركەك بولعاننان كەيىن بالامنان ەشقاشان باس تارتپايمىن. بالامدى قاتتى جاقسى كورەمىن، بالاجانمىن. وعان بۇكىل جاعدايدى جاساۋعا تىرىسامىن»، — دەدى ەلەۋسىنوۆ وتباسى جايلى.
سونىمەن قاتار، ول بالا كەزىندەگى ارمانىنىڭ ورىندالعانىن باياندادى. «بالا كەزىمدە وليمپيادا چەمپيونى بولۋ ارمانىم ەدى. ارمانىما جەتتىم. ءقازىر شەشىم قابىلدادىم، ازىرشە اۋەسقوي بوكستا قالدىم دەپ ايتا الامىن. سەبەبى ماعان كەلىپ تۇسكەن ۇسىنىستار كوڭىلىمدى تولىقتاي تولدىرعان جوق. باسىندا كاسىپقوي بوكسقا اۋىسامىن دەپ ويلاعانمىن، ءبىراق ۇسىنىس تۇسىرگەندەر كەلىسىمشارت بويىنشا ءوز مىندەتىن ورىندامادى. ولار قازاق سپورتشىسىنا مۇنداي كوپ اقشا تولەگەنشە، وزىمىزگە اقشا قۇيايىق دەگەن سياقتى، سونداي ءبىر سىبىستار بولدى»، — دەدى بوكسشى كاسىپقوي رينگكە ءوتۋ ماسەلەسى جايلى.
وسىدان كەيىن جۇرگىزۋشى ءلايلا سۇلتان قىزى سپورتشىعا ەلباسىمەن كەزدەسكەنى جايلى ايتىپ بەرۋىن ءوتىندى. «وتە قۋانىشتى سەزىمدە بولدىم. ەلباسى قۇتتىقتاپ، جانۇيام تۋرالى سۇرادى، ايەلىممەن جانە بالاممەن بىرگە شىعىپ كەلە جاتقان كەزىمدە "وتباسىڭ با؟" دەپ سۇرادى. بالاندين سول جاعىندا، مەن وڭ جاعىندا وتىردىم. ەلباسىعا سپورتشىلارعا دەگەن كوزقاراسى ءۇشىن العىس ايتتىم، سوندا اياعىمنان وسىلاي قاققان بولاتىن. ونىڭ ءوزى ماعان ۇلكەن مارتەبە، ابىروي»، — دەپ باياندايدى سۇحباتتا ەلەۋسىنوۆ.
