شىمكەنتتەگى قاراتاۋ اۋداندىق سوتى "وزگە دىنگە كىرگەنى ءۇشىن ايەلىن پىشاقتاعانىن" مالىمدەگەن حايروللا نارمەتوۆتى ەكى ايعا قاماۋعا الۋ تۋرالى قاۋلى شىعاردى دەپ حابارلايدى Qamshy.kz اقپارات اگەنتتىگى ازاتتىققا سىلتەمە جاساپ. 

"وڭتۇستىك قازاقستان وبلىسى سايرام اۋدانىنىڭ 1983 جىلى تۋعان تۇرعىنى حايروللا نارمەتوۆتى 12 قاراشادا بولعان وقيعاعا بايلانىستى قاراتاۋ اۋداندىق پوليسيا ءبولىمى ارنايى كۇزەتپەن قاراتاۋ اۋداندىق سوتىنا سانكسيا شىعارۋعا الىپ كەلدى. ول سوت بارىسىندا كىناسىن تولىعىمەن مويىنداپ، ونى اشۋمەن جاساعانىن ايتىپ، ىستەگەن ىسىنە وكىنەتىنىن ءبىلدىردى" دەيدى باعلان امىرالييەۆ.

ونىڭ ايتۋىنشا، سوت كۇدىكتىنى قىلمىستىق كودەكستىڭ 106-بابىنىڭ 1-بولىگىمەن ("قاساقانا اۋىر دەنە جاراقاتىن سالۋ") كۇدىكتى دەپ تانىپ، ەكى اي مەرزىمگە قاماۋعا الۋعا قاۋلى ەتتى.

وبلىستىق دەنساۋلىق ساقتاۋ باسقارماسىنىڭ باسپا ءسوز حىتشىسى اسىلبەك دوسالىنىڭ ازاتتىققا حابارلاۋىنشا، حايروللا نارمەتوۆتىڭ ايەلىنىڭ قازىرگى جاعدايى قالىپتى. ايەل جان ساقتاۋ بولىمىنەن جەكە پالاتاعا اۋىستىرىلعان.

كۇدىكتى حايروللا نارمەتوۆ ايەلىمەن بولعان جانجالدان سوڭ تۇسىرگەن ۆيدەو ۇندەۋىندە "ايەلىن باسقا دىنگە وتكەنى ءۇشىن ءولتىردىم" دەپ مالىمدەگەن. بۇل ۆيدەو 13 قاراشادا الەۋمەتتىك جەلىگە تاراپ كەتكەن ەدى.