«بۇلاق كورسەڭ، كوزىن اش...» دەيدى دانا حالقىمىز. ءدال وسى دانالى ءسوزدى ماقسات ەتكەن «زەردەلى» اقىل وي دامىتۋ ورتالىعىنىڭ ديرەكتورى ىرىسبەك ءماۋىت ۇلىنىڭ باستاماسىمەن وتەتىن ءاربىر شارا مەكتەپ وقۋشىلارىنىڭ بىلىمگە دەگەن قۇشتارلىعىن ارتتىرۋعا باعىتتالعان.

18 قاراشا كۇنى جىل سايىن داستۇرگە اينالعان «التىن ساقا» ماتەماتيكالىق وليمپياداسىنىڭ ماراپاتتاۋ ءراسىمى ءوتتى. «استانا دارىنى» وڭىرلىك عىلىمي-پراكتيكالىق ورتالىعىنىڭ قولداۋىمەن، قابىلەتى جوعارى جاس دارىندارعا قولداۋ كورسەتۋ ماقساتىندا ۇيىمداستىرىلعان وليمپياداعا استانا قالاسى ءبىلىم بەرۋ مەكەمەلەرىنىڭ 5-6 سىنىپ وقۋشىلارى قاتىستى. سايىستىڭ ءى كەزەڭى مەكتەپ بازاسىندا وتكىزىلىپ، قاتىسۋشى 1500-دەن استام وقۋشىنىڭ ىشىنەن جوعارى ۇپاي جيناعان 300-گە جۋىق وقۋشى ءىى كەزەڭگە جىبەرىلگەن بولاتىن. وليمپيادانىڭ قورىتىندىسى بويىنشا جۇلدەلى ءى، ءىى، ءىىى ورىن يەگەرلەرى انىقتالىپ، جەڭىمپازدار ارنايى سىيلىقتارعا يە بولدى. ءدۇبىرلى دودادا توپ جارىپ، ءى ورىن يەلەگەن 4 وقۋشىعا 50 000 تەڭگە سىيلىق سەرتيفيكاتى، ءىى ورىن العان 15 وقۋشىعا 10 000 تەڭگە كولەمىندە سىيلىق سەرتيفيكاتى، ءىىى ورىن العان 25 وقۋشىعا 5000 تەڭگەدەن سىيلىق سەرتيفيكاتى تابىستالدى.

ءبىر ايتا كەتەرلىگى – ءبىرىنشى ورىن يەلەنگەن ءتورت وقۋشىعا بەرىلگەن قارجىلاي سىيلىقتى ۇلتجاندى ازامات ومار جۋسانباي ۇلى ءوز قالتاسىنان شىعاردى. «ۇلتتىڭ ەرتەڭى – وسى جاس بالالاردىڭ قولىندا. ەرتەڭ وسى وقۋشىلاردىڭ اراسىنان حالىقارالىق سايىستاردا ناتيجە كورسەتىپ، ۇزدىك ناتيجەلەرگە جەتسە، ەلىمىزدىڭ عىلىمى مەن مادەنيەتىنىڭ دامۋىنان ۇلەستەرىن قوسسا دەپ تىلەيمىن»، – دەيدى ومار جۋسانباي ۇلى.

دەڭگەيى جوعارى دەپ تانىلعان 40 وقۋشى ارنايى گراموتالارمەن ماراپاتتالىپ، «ماتەماتيكا وليمپياداسىنا دايىندىق باستامالارى» اتتى وقۋ قۇرالى سىيعا تارتىلدى. وليمپياداعا قاتىسقان مەكتەپ وقۋشىلىرىنىڭ ورتاشا ۇپايى جانە ورىندار سانى بويىنشا جاقسى ناتيجە كورسەتكەن №73 فيزيكا-تەحنيكالىق ليسەيىنە «التىن ساقا» كۋبوگى تابىستالدى.

مەكتەپ وقۋشىلارىن ىنتالاندىرىپ، قابىلەتىن ارتتىرۋعا باعىتتالعان وليمپيادالار مەن سايىستار ورتالىقتىڭ ۇيىمداستىۋىمەن ءالى دە جالعاسىن تابادى.