اعىمداعى جىلدىڭ قازان ايىندا جاپون بيلىگى 27 جاستاعى تاكاحيرو شيرايشي ەسىمدى جىگىتتى قاماۋعا العان. جالعىزباستى جىگىت پاتەرىندە ادام مايىتتەرى تابىلعان. بەلگىلى بولعانداي، ونىڭ قۇرباندارى الەۋمەتتىك جەلى ارقىلى ولگىسى كەلەتىنىن ايتىپ ارىزدانعان. ال شيرايشي بولسا، ولارعا كومەككە كەلگەن.
جالعىزباستى مومىن جىگىتتىڭ قاندى قىلمىسى جاپونيانى ءدۇر سىلكىندىرگەنى تۋرالى لەنتا.رۋ جازادى.
جاپونيا قىلمىس دەڭگەيىنىڭ تومەندىگىمەن تانىمال. سوندىقتان بىردەن سەگىز قىز بەن ءبىر جىگىتتىڭ جوعالىپ كەتۋى جاپون حالقىنىڭ ۇرەيىن تۋعىزدى. باستاپقىدا جەرگىلىكتى پوليسيا بىرنەشە ادامنىڭ جوعالۋى بىر-بىرىمەن بايلانىستى ەكەنىن بىلگەن جوق. توكيونىڭ 23 جاستاعى تۇرعىنىنىڭ تۆيتتەردەگى جازباسىنا كوزدەرى تۇسكەندە عانا، پوليسيا ماسەلەنىڭ اق- قاراسىن اجىراتا باستادى. مارقۇم قىز جوعالار الدىندا تۆيتتەردە: «بىرگە ءولۋ ءۇشىن ادام ىزدەيمىن» دەپ جازعان ەكەن.
جوعالعان قىزدىڭ اعاسى پوليسياعا قىزدىڭ الەۋمەتتىك جەلىدەگى بارلىق قۇپياسوزدەرىن بەرگەن. تۆيتتەر جەلىسى ارقىلى پوليسيا ءشيرايشيدىڭ ىزىنە تۇسكەن. ءشيرايشيدىڭ پاتەرىنە كەلگەن پوليسيا بىردەن مايىتتەردىڭ ءيىسىن سەزگەن.
"جوعالعان قىز قايدا" دەگەن پوليسيانىڭ سۇراعىنا شيرايشي «مۇندا» دەپ توڭازىتقىشتى نۇسقاعان.
بەلگىلى بولعانداي، جاپوندىقتىڭ پاتەرىندە تەك ءبىر قىزدىڭ ەمەس، تاعى سەگىز قىز بەن ءبىر جىگىتتىڭ دەنەسى بولعان. قىلمىسكەردىڭ كورشىلەرى بەلگىسىز سەبەپتەرمەن بىرنەشە اي بويى ونىڭ پاتەرىنەن شىققان سۇمدىق ءيىس تۋرالى پوليسياعا ارىزدانباعان.
ءۇيدىڭ ىشىندە توعىز ادامنىڭ بولشەكتەلگەن دەنە بولىكتەرى مەن ارا، ارقاندار تابىلعان. دەنە بولشەكتەرى مەن ادام باستارى توڭازىتقىز ىشىندە مۇز سالىنعان جاشىكتەردە بولعان. پاتەردەن بارلىعى 240 ادام دەنەسىنىڭ بولشەكتەرى الىنعان.
ءشيرايشيدىڭ ايتۋى بويىنشا، ول ءوزىنىڭ اكەسىنە ءومىرىنىڭ ءمان ماعىناسى جوق ەكەنىن ايتقان. الايدا، ونىڭ اكەسى ۇلىنىڭ سوزدەرىنە قۇلاق اسپاعان.
قىلمىسكەر جىگىت ورتا مەكتەپتى ءبىتىرىپ، ەكى جىل سۋپەرماركەتتە ۇزدىك ساۋداگەر بولىپ جۇمىس ىستەگەن. الايدا، ارادا ءبىراز ۋاقىت وتكەن سوڭ، سەكس قىزمەتتەرگە قىزدار تاڭداۋمەن اينالىسىپ كەتكەن. اكەسىنىڭ ۇيىنەن كوشىپ، ءوزى جالعىز پاتەر جالداپ تۇرعان. كوپ ۇزاماي ول تۆيتتەردە ءوزىنىڭ دەپرەسسيۆتى ەموسيانالدىق جاعدايىن باسقالارمەن ءبولىسۋ ماقساتىندا اككاۋنت اشىپ، وزىنە ۇقساس جاندار ىزدەي باستايدى. جاسوسپىرىمدەردى سۋيسيدتىك ويلارعا يتەرمەلەۋ، وز-وزدەرىنە قول جۇمساماق نيەتتى جاستارعا كومەك بەرۋ ماقساتىندا، ءوزىن وسى ماسەلەنىڭ مامانى رەتىندە تانىستىرىپ، ادامداردى تارتقان.
«قينالىپ جۇرگەن ادامدارعا كومەكتەسكىم كەلەدى. كەز كەلگەن ۋاقىتتا جەكەگە جازىڭىزدار» دەپ ءوزىنىڭ پروفيلىندە جازىپ قويعان ەكەن. ودان بولەك وقىرماندارىن «دۇرىس ارناعا» بۇرىپ، ۇيدە، سىرتتا، مەكتەپتە قورلانۋعا تاپ بولاتىندىقتارىن ايتىپ سۋيسيدتىك پوستتار جازىپ وتىرعان.
ول ءوز وقىرماندارىن جاقىندارىمەن بايلانىستان ۇزگىسى كەلگەن. ەڭ العاشقى قۇربانى بولعان جاس قىز شيرايشيمەن كەزدەسۋگە جىگىتىمەن كەلگەن. ولار ۇشەۋى بارعا بارىپ وتىرعان. شيرايشي قينالىپ جۇرگەن قىزدى ءوز ۇيىنە جالعىز كەلۋىن سۇراپ، قوناققا شاقىرعان. قىز ۇيىنە كەلگەندە ونى ءولتىرىپ تاستاعان. الايدا، ونىڭ جوعالىپ كەتكەنىن بىلگەن مارقۇم قىزدىڭ جىگىتى جاقىندا تانىسقان "ءبىرتۇرلى جىگىتتىڭ" ۇيىنە بارادى. شيرايشي جىگىتتى ءولتىرىپ، دەنەسىن بولشەكتەپ قىزىنىڭ جانىنا قويىپ قويعان.
ءشيرايشيدىڭ قۇرباندارى 26 جاستان اسپاعان جاس قىزدار، كوپشىلىگى كامەلەتكە تولماعان.
رەسمي قاعازدارداعى دەرەكتەرگە سايكەس، ءشيرايشيدىڭ ءوز قىلمىستارىن جاسىرماق نيەتى بولماعان.
ونىڭ جاس قىزداردى تاڭداۋى بەكەر ەمەس ەكەن: قىلمىسكەر كەيبىرىن زورلاعان. ءتىپتى، كەيبىر قۇرباندارىن توناعان دا ەكەن. تەرگەۋ كەزىندە، قىلمىسكەر ءوزىنىڭ دەپرەسسيادان زارداپ شەككەنىن ايتقان. اكەسىنەن قولداۋ تاپپاعان ول، ينتەرنەت ارقىلى مۇددەلەس ادامدار ىزدەگەن.
ءشيرايشيدى بالا كەزدەن تانيتىن تانىستارى ونى وتە مومىن، اشىق ادام رەتىندە سيپاتتاعان. «قاراپايىم ، ونشا كوزگە تۇسپەيتىن بولعاندىقتان ونى سىنىپتاستارى دا ۇمىتىپ كەتكەن شىعار»- دەيدى ءشيرايشيدىڭ جاقىن تانىستارىنىڭ ءبىرى. ال، ونىڭ بۇرىڭعى سۇيىكتىسى ءشيرايشيدى «نازىك جىگىت» دەپ اتاعان.
بۇگىنگى كۇنى جاپونيا دامىعان ەلدەردىڭ اراسىندا سۋيسيد كورسەتكىشى بويىنشا وڭتۇستىك كورەيا مەن ۆەنگريادان كەيىنگى ءۇشىنشى ورىندى يەلەنگەن. جاستار اراسىندا بەلەڭ العان بۇل ەپيدەميا الەۋمەتتىك جەلى ارقىلى كەڭ تارالعان. ال جاپون بيلىگى تيىسىنشە سۋيسيد تۋرالى قانداي دا ءبىر ماعلۇماتتارى بار رەسۋرستاردىڭ بارلىعىن بۇعاتتاۋ جۇمىستارىن جۇرگىزۋدە.
