قاراشانىڭ 9 - 19 كۇندەرى گەرمانيادا وتكەن 66-شى حالىقارالىق مانگەيم-حايدەلبەرگ (International Filmfestival Mannheim-Heidelberg) كينوفەستيۆالىندە «ورالمان» ءفيلمى ۇزدىك جەتىستىكتەرى ءۇشىن ارنايى جۇلدەمەن ماراپاتتالدى دەپ حابارلايدى Qamshy.kz اقپارات اگەنتتىگى«قازاقفيلم» كينوستۋدياسىنىڭ باسپا ءسوز قىزمەتىنە سىلتەمە جاساي وتىرىپ. ودان بولەك، كينوفەستيۆالدىڭ ۇيىمداستىرۋشىلارى اتالعان كينوتۋىندىنى  گەرمانيادا پروكاتقا شىعارۋىنا ۇسىنىس جاسادى. 

ەستەرىڭىزگە سالا كەتسەك، قازاقستان رەسپۋبليكاسى مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن رەجيسسەرى ءسابيت قۇرمانبەكوۆتىڭ «ورالمان» ءفيلمى اتالعان كينوفەستيۆالدىڭ نەگىزگى باعدارلاماسىنا ىرىكتەلىنىپ الىنعان بولاتىن.  بيىل فەستيۆالدىڭ باس جۇلدەسىنە 22 ەلدەن 21 كارتينا تالاسقا تۇسكەن. 

- مادەني جانە ءدىني وزگەشەلىكتەرىنە قاراماستان، ءوز ەلىنە قايتا ورالعان وتباسىنىڭ درامالىق وقيعاسى ەموسيونالدى اسەرلى باياندالعانى ءۇشىن ماراپاتتالادى، - دەلىنگەن فەستيۆالدىڭ رەسمي سايتىندا.  

مانگەيم-گەيدەلبەرگ كينوفەستيۆالىنىڭ ناتيجەسى بويىنشا، بايقاۋدىڭ «ۇزدىك تولىقمەتراجدى ءفيلمى» اتتى باس جۇلدەسى رەجيسسەر ۆيتو پالميەريمنىڭ «تەحاستا كورىسەرمىز» اتتى يتالياندىق كارتيناعا بۇيىردى. ال فيليپپيندىق رەجيسسەر باگانە فيول تۇسىرگەن «ورمانداعى سەرۋەن» ءفيلمى فەستيۆالدىڭ ارنايى جۇلدەسىمەن ماراپاتتالدى. سونىمەن قاتار، «كۇزەتشى» (دومينيكان رەسپۋبليكاسى، پۋەرتو-ريكو، برازيليا)، «قاسيەتتى اۋا» ( يزرايل) جانە «مۇرتازا» (تۇركيا) اتتى فيلمدەر قازىلار القاسىنىڭ قۇرمەتتى سىيلىقتارىمەن ماراپاتتالدى.

66-شى حالىقارالىق مانگەيم-حايدەلبەرگ (International Filmfestival Mannheim-Heidelberg) كينوفەستيۆالىنىڭ حالىقارالىق قازىلار القاسىنىڭ قۇرامىنا  گەرمانيانىڭ تانىمال كينەماتوگرافيستەرى – كلاۋديا لاندسبەرگەر، كريستيان يۋل لەمچە جانە كلەمەنس كلوپفەنشتەيندەر كىردى. 

حالىقارالىق مانگەيم-حايدەلبەرگ كينوفەستيۆالى 1952 جىلدان بەرى وتكىزىلىپ كەلەدى. فەستيۆال كينويندۋستريانىڭ كاسىبي ماماندارىنا جانە كينوسۇيەر قاۋىمعا ارنالعان.  جىل سايىن فەستيۆالگە 500 كاسىبي مامان مەن 60 مىڭ كورەرمەن قاتىسادى. بۇل ءوز كەزەگىندە كينوفەستيۆالدىڭ اۋقىمى كەڭ جانە گەرمانياداعى ەڭ ءىرى فەستيۆالدەردىڭ ءبىرى ەكەنىن دالەلدەيدى. فەستيۆال شەڭبەرىندە رەجيسسەرلەرمەن، اكتەرلەرمەن جانە پروديۋسەرلەرمەن كەزدەسۋلەر ۇيىمداستىرىلادى. 

ەستەرىڭىزگە سالا كەتسەك، «ورالمان» كوركەم ءفيلمى وسى جىلدىڭ باسىندا 
يراننىڭ استاناسى تەگەراندا وتكەن  35ء-شى حالىقارالىق فادجر كينوفەستيۆالى مەن XIII حالىقارالىق «ەۋرازيا» كينوفەستيۆالىنىڭ باس جۇلدەسىن جەڭىپ العان بولاتىن.  فيلمدە باستى ءرولدى سومداعان اكتەر دۋلىعا اقمولدا قىركۇيەك ايىندا تاتارستاندا وتكەن XIII حالىقارالىق مۇسىلماندار كينوسى فەستيۆالىندە «ۇزدىك ەر ادام ءرولى» جۇلدەسىمەن ماراپاتتالدى. سونداي-اق، كارتينا يتاليادا وتكەن حح حالىقارالىق «Religion Today» كينوفەستيۆالىندە «ۇزدىك فيلم» نوميناسياسىندا جەڭىسكە جەتىپ، تاۋەلسىز SIGNIS قازىلار القاسىنىڭ ارنايى جۇلدەسىن يەمدەندى. 

ايتا كەتەلىك، باشقۇرتستاندا ۇستىمىزدەگى جىلدىڭ جەلتوقسانىندا وتەتىن IV حالىقارالىق «كۇمىس اقبوزات» كينوفەستيۆالىنىڭ اشىلۋ سالتاناتى «ورالمان» فيلمىمەن اشىلادى.