اقمولا وبلىسىندا وز-وزىنە قول جۇمساعانداردى بولەك جەرگە جەرلەۋ قولعا الىنا باستاعان. بۇل كوكشەتاۋ ماڭىنداعى كراسنىي يار ەلدى مەكەنى يمامىنىڭ باستاماسى، دەپ حابارلايدى Qamshy.kz اقپارات اگەنتتىگى informburo.kz سايتىنا سىلتەمە جاساي وتىرىپ.
العاشقى جىلدارى مۇنداي شەشىمدى تۇسىنبەگەن حالىق شۋ شىعارىپ، ءبىراز نارازىلىقتارىن دا بىلدىرگەن. الايدا يمام ءسۋيسيدتى ازايتىپ، حالىق اراسىندا ءتۇسىندىرۋ جۇمىستارىن جۇرگىزۋ ماقساتىندا وسىنداي شەشىم قابىلداعانىن ايتتى.
«كراسنىي يار اۋىلىنداعى زيراتتىڭ ەڭ شەتىندەگى مولادا جەرلەنگەن بويجەتكەن 2010 جىلى قايتىس بولىپتى. نەبارى 18 جاستاعى ءبىر ءۇيدىڭ جالعىز قىزى وقىپ جۇرگەن كوللەدجدىڭ جاتاقحاناسىندا وز-وزىنە قول جۇمساعان. وكىنىشتىسى ۋاقىت وتكەن سايىن بۇل جەردەگى مولالاردىڭ قاتارى قالىڭداپ كەلەدى. مەزگىلسىز ولىمنەن كوز جۇمعانداردىڭ باسىم بولىگى – جاستار. «جالپى، جاس بولسىن، كارى بولسىن، ادام بالاسى وز-وزىنە قول جۇمساۋى ۇلكەن قاتە. شاريعاتقا سۇيەنىپ، بولەك جەرلەۋدىڭ باستى سەبەبى دە وسى»، — دەيدى كراسنىي يار مەشىتىنىڭ باس يمامى ناۋان ءمۇتال ۇلى.
«بۇل ءبىزدىڭ بالالارىمىزدىڭ، ءبىزدىڭ بولاشاعىمىزدىڭ ماسەلەسى. ەگەر ءبىز ءقازىردىڭ وزىندە سۋيسيد بويىنشا الدىڭعى قاتاردا تۇرساق، ەرتەڭگى كۇنىمىزدىڭ قانداي بولاتىنىن ويلاۋدىڭ ءوزى قورقىنىشتى. وز-وزىنە قول جۇمساۋدىڭ باستى سەبەبى – وتباسىنداعى جانجال، تۇسىنىسپەۋشىلىك»، — دەپ پىكىر ءبىلدىردى پسيحوتەراپيەۆت-دارىگەر ءاليا نۇرعازينا.
«ءابۋ حانيفا مۇنى ۇلكەن كۇنا دەپ ەسەپتەپ، جانازاسىن شىعارادى. ءبىراق، بۇنىڭ جانازاسىن ءفاتۋا بويىنشا اكىمدەر، پاتشالار، يمامدار شىعارمايدى. قاتارداعى نامازحان ادامدار شىعارادى. سەبەبى، حالىققا بۇل جەك كورىنىشتى امال ەكەنىن كورسەتۋ ماقساتىندا. ناۋان ءمۇتال ۇلىنىڭ ايتۋىنشا، وز-وزىنە قول جۇمساعانداردىڭ بولەك جەرلەنەتىنىن كورىپ، سۋيسيد جاساۋ تۋرالى ويىنان باس تارتقاندار دا بولىپتى. ءبىر ايەل بالاسى 7 جاسقا تولعاننان كەيىن، كۇيەۋىمنىڭ ارتىنان كەتەم دەگەن شەشىم قابىلداعان. ءبىراق، وسى وز-وزىنە قول جۇمساعان قىزدىڭ جانازاسىندا وز-وزىنە قول جۇمساعان دۇرىس ەمەستىگىن ەستىگەننەن كەيىن رايىنان قايتىپ، تاۋبەسىنە كەلگەن. ستاتيستيكالىق مالىمەتتەرگە سۇيەنسەك، ەلىمىز جاس بالالاردىڭ سۋيسيد جاساۋىنان توعىزىنشى ورىنعا تۇراقتاسا، 15-29 جاس ارالىعىنداعى ازاماتتاردىڭ وز-وزىنە قول جۇمساۋى بويىنشا ءۇندىستان، سولتۇستىك كورەيا، زيمبابۆەدەن كەيىن ءتورتىنشى ورىنعا جەتكەن. سۋيسيد جاساعانداردى بولەك جەرلەۋگە «اۋىل ادامدارى باستاپقىدا قارسى شىققانمەن، ۋاقىت وتە دۇرىس ەكەندىگىنە كوزدەرى جەتتى. مۇنداعى باستى ماقسات: ءسۋيسيدتىڭ الدىن الۋ، ادامداردىڭ شالىس باسۋىنا جول بەرمەۋ»، — دەيدى يمام.
