22 قاراشادا ۇكىمەت ۇيىندە ق ر پرەمەر-مينيسترى باقىتجان ساعىنتايەۆتىڭ توراعالىعىمەن سيفرلاندىرۋ جونىندە كەڭەس ءوتتى، دەپ حابارلايدى Qamshy.kz اقپارات اگەنتتىگى primeminister.kz پورتالىنا سىلتەمە جاساپ.

كەزدەسۋ بارىسىندا «ەكسپو-2017» نىساندارى بازاسىندا Astana Hub حالىقارالىق ستارتاپتار تەحنوپاركىنىڭ قىزمەتىن ۇيىمداستىرۋ ماسەلەلەرى تالقىلاندى. بۇدان وزگە «ەلەكتروندى ۇكىمەتتى» دامىتۋ شارالارى، سونىڭ ىشىندە ەلەكتروندى فورماتتا ۇسىنىلاتىن مەملەكەتتىك قىزمەتتەر ءتىزىمىن كەڭەيتۋ جانە حالىقتىڭ سيفرلىق ساۋاتتىلىعىن ارتتىرۋ تەتىكتەرى قارالدى.

ايتا كەتسەك، اتالعان باعدارلامانى پرەزيدەنتكە العاش تانىستىرعاندا: «بۇل ەلىمىزدىڭ تەحنولوگيالىق تۇرعىدان دامۋىنا تىڭ سەرپىن بەرىپ، 2050 جىلى دامىعان 30 مەملەكەتتىڭ قاتارىنا كىرۋگە مۇمكىندىك بەرەتىن ءتاسىل. اتالعان باعدارلامانى جاساۋ بارىسىندا ۇكىمەت تاراپىنان عالامداعى سىن-تەگەۋرىندەر مەن مۇمكىندىكتەر ەسكەرىلدى. وسىعان بايلانىستى 2 باعىت انىقتالدى. بىرىنشىدەن، سيفرلاندىرۋ پروسەسىنىڭ تۇراقتى بولۋى ءۇشىن يننوۆاسيالىق دامۋدى قامتاماسىز ەتەتىن ۇزاق مەرزىمدەگى ينستيتتۋتتاردى قۇرۋ. ەكىنشىدەن، باعدارلامانىڭ ويداعىداي جۇزەگە اسۋى ءۇشىن ناقتى سەكتوردى ناقتى جوبالارمەن قامتاماسىز ەتۋ. وسى ورايدا ۇكىمەت جەڭىلدەتىلگەن سيفرلاندىرۋ ستراتەگياسىن تاڭدادى. ول 9 نەگىزگى سەكتوردا جۇرگىزىلەدى. سونىمەن قاتار، ەنەرگەتيكا، شيكىزات جانە اوك، ءوندىرىس، لوگيستيكا سالالارى مەن اقپاراتتىق تەحنولوگيالار ورتالىعىنا باسىمدىق بەرىلەدى»، - دەگەن بولاتىن ق ر پرەمەر-مينيسترى.