سەناتور، قازاقستان پرەزيدەنتى نۇرسۇلتان نازاربايەۆتىڭ ۇلكەن قىزى داريعا نازاربايەۆا ءبىرىنشى دارەجەلى "ەل قورعانى" مەدالىمەن ماراپاتتالدى، دەپ جازادى Qamshy.kz اقپارات اگەنتتىگى.

نازاربايەۆانى قورعانىس ءمينيسترى ساكەن جاسۇزاقوۆ استانادا جاستاردى اسكەري-پاتريوتتىق تاربيە بەرۋ ماسەلەلەرى جونىندەگى ۆەدومستۆوارالىق جيىندا ماراپاتتادى.

قورعانىس ءمينيسترى نازاربايەۆاعا "ەلدىڭ قورعانىس قابىلەتىن كۇشەيتۋدى قولداپ، ۇلەس قوسقانى ءۇشىن جانە جاستارعا اسكەري-پاتريوتتىق تاربيە بەرۋ قىزمەتىندەگى بەلسەندىلىگى" ءۇشىن العىس ءبىلدىردى.

داريعا نازاربايەۆا ماراپاتتىڭ وزىنە ءۇمىت ۇيالاتاتىنىن، قازاقستان ءۇشىن اسكەري-پاتريوتتىق قوزعالىستىڭ ماڭىزدى ەكەنىن ايتتى.

قورعانىس مينيسترلىگى ەرەكشە كوزگە تۇسكەن اسكەري قىزمەتكەرلەرىن بيىلعى ناۋرىزدان باستاپ "ەل قورعانى" مەدالىمەن ماراپاتتاي باستاعان ەدى.

ەسكە سالساق، قورعانىس مينيسترلىگىندە قازاقستان رەسپۋبليكاسى پارلامەنتى سەناتىنىڭ كوشپەلى وتىرىسى وتكەن بولاتىن.

2017 جىلعى 15 قاراشادا قازاقستان رەسپۋبليكاسىنىڭ قورعانىس مينيسترلىگىندە داريعا نازاربايەۆانىڭ ءتوراعالىق ەتۋىمەن پارلامەنت سەناتىنىڭ حالىقارالىق قاتىناستار، قورعانىس جانە قاۋىپسىزدىك جونىندەگى كوميتەتىنىڭ كوشپەلى وتىرىسى ءوتتى.

كوشپەلى وتىرىس شەڭبەرىندە اسكەري دوكترينانىڭ، قازاقستان رەسپۋبليكاسى قارۋلى كۇشتەرىنىڭ، باسقا دا اسكەرلەرى مەن اسكەري قۇرالىمدارىنىڭ قۇرىلىسى مەن دامۋى تۇجىرىمدامالارىنىڭ ماسەلەلەرى مەن ونىڭ ىسكە اسىرىلۋ جوسپارى تالقىلاندى.

ءىس-شاراعا سەنات دەپۋتاتتارى، ق ر قورعانىس مينيسترلىگىنىڭ، ق ر ۇقك شەكارا قىزمەتىنىڭ، ق ر ءىىم ۇلتتىق ۇلانىنىڭ باسشىلىعى قاتىستى.

وتىرىستى اشا وتىرىپ، د. نازاربايەۆا ەلىمىزدىڭ قورعانىس قابىلەتتىلىگى مەن قاۋىپسىزدىگىن قامتاماسىز ەتۋگە قاتىستى ماسەلەلەردىڭ ماڭىزدىلىعىن اتاپ ءوتتى. «قارۋلى كۇشتەرى حالقىمىزدىڭ تاۋەلسىزدىگىنىڭ كەپىلى بولىپ تابىلادى»، - سىرتقى قاۋىپ-قاتەرلەردى الدىن الۋ مەن جويۋدا ارميانىڭ ۇلعايىپ كەلە جاتقان ءرولىن اتاپ ءوتىپ، سەناتور حانىم وسىلاي دەدى.

وتىرىستا ق ر قك باس شتابى باستىعىنىڭ ءبىرىنشى ورىنباسارى گەنەرال-مايور رۋسلان شپەكبايەۆتىڭ اسكەري دوكترينا تۋرالى ءسوز سويلەۋى تىڭدالدى. ول دوكترينادا كۇرەسۋدىڭ «بۋدانداستىق» ادىستەرى، «اسكەري ەمەس قۇرالدار»، «سىرتقى قارۋلى قاقتىعىس» سياقتى تۇسىنىكتەمەلەر مەن ۇعىمدار العاش رەت قولدانىلىپ وتىرعانىن، ق ر قك، باسقا دا اسكەرلەرى مەن اسكەري قۇرالىمدارىن قولدانۋ، كيبەرقاۋىپسىزدىكتى، اسكەري قاۋىپسىزدىكتىڭ ورتاق جۇيەسىنە اۋماقتىق قورعانىستىڭ كىرىكتىرىلۋى، ماتەريالدىق-تەحنيكالىق قامتاماسىز ەتۋ جۇيەسىنىڭ دامۋى، بىتىمگەرشىلىك قىزمەتكە قازاقستاننىڭ قاتىسۋىنىڭ كەڭەيتىلۋى، مەملەكەتتىڭ اسكەري ۇيىمىن باسقارۋ جۇيەسىنىڭ دامۋ ءتارتىبى ناقتىلانعانىن اتاپ ءوتتى.

«بىرلەسكەن كەشەندى جۇمىسىمىز بولاشاقتا اسكەرىمىزدى قاجەتتى زاماناۋي قارۋ-جاراقپەن جانە اسكەري تەحنيكامەن جابدىقتاۋ بويىنشا ماسەلەلەردى شەشۋگە مۇمكنىدىك بەرەدى. ول ءۇشىن قورعانىس تۋرالى زاڭعا ءتيىستى تۇزەتۋلەر ەنگىزىپ، ونى مۇددەلى مەملەكەتتتىك ورگاندارمەن پىسىقتاۋ قاجەت بولادى»، - دەپ اتاپ ءوتتى پارلامەنت سەناتىنىڭ حالىقارالىق قاتىناستار، قورعانىس جانە قاۋىپسىزدىك جونىندەگى كوميتەتىنىڭ ءتورايىمى د. نازاربايەۆا.