بۇگىن نازاربايەۆ ورتالىعىندا ق ر تۇڭعىش پرەزيدەنتى - ەلباسى قورىنىڭ سىيلىعىنا ۇزدىك ءقازاقتىلدى ينتەرنەت سايت بايقاۋىنىڭ جەڭىمپازدارىن ماراپاتتاۋ ءراسىمى ءوتتى، دەپ حابارلايدى Qamshy.kz اقپارات اگەنتتىگى. بايقاۋ وسى جىلى ءۇشىنشى رەت وتكىزىلىپ وتىر. بايقاۋدى ۇيىمداستىرۋشىلار ق ر تۇڭعىش پرەزيدەنتى – ەلباسىنىڭ قورى جانە مەملەكەتتىك ءتىلدى دامىتۋ قورى.

ماراپاتتاۋ راسىمىنە ق ر تۇڭعىش پرەزيدەنتى - ەلباسى قورىنىڭ اتقارۋشى ديرەكتورىنىڭ ورىنباسارى سۇلتان ايتجانوۆ، ق ر پارلامەنتى ءماجىلىسىنىڭ دەپۋتاتى باقىتبەك سماعۇل، «قازينفورم» حالىقارالىق اگەنتتىگى  باس ديرەكتورىنىڭ كەڭەسشىسى ماحات سادىق، مەملەكەتتىك ءتىلدى دامىتۋ قورىنىڭ ديرەكتورى ازات شاۋەيەۆ، سونىمەن قاتار قوعامدىق ۇيىمداردىڭ، مەملەكەتتىك ورگانداردىڭ جانە باق-نىڭ وكىلدەرى قاتىستى.

بايقاۋ ماقساتى – ينتەرنەت جۇيەسىندەگى ۇزدىك ءقازاقتىلدى رەسۋرستاردى انىقتاۋ مەن ناسيحاتتاۋ جانە ينتەرنەت رەسۋرستاردىڭ سانى مەن ساپاسىن جاقسارتۋعا  ۇلەس قوسىپ جۇرگەن وتاندىق ءقازاقتىلدى سايتتاردى قولداۋ.

بايقاۋعا عالامتور كەڭىستىگىندەگى تاجىريبەسى كەمىندە ءبىر جىلدى قۇرايتىن،  قازاق تىلىندە اقپارات تاراتاتىن ۇكىمەتتىك ەمەس، تاۋەلسىز قوعامدىق سايتتار قاتىستى. قازىلار القاسى سايتتاردى مازمۇنى، قىزمەت باعىتى، ينتەراكتيۆتىلىگى، قازاق ءتىلى مەن ۇلتتىق قۇندىلىقتاردىڭ دارىپتەلۋى، پاتريوتتىق تاقىرىپتاردىڭ ۇزدىكسىز كوتەرىلۋى، كوركەمدىك جاعى، يدەيا ەرەكشەلىگى، تارتىمدىلىعى سەكىلدى تالاپتار بويىنشا سارالادى.

بايقاۋعا رەسپۋبليكانىڭ ءار ءتۇرلى ايماقتارىنان 33 ءوتىنىم ءتۇستى. «وتكىر ءتىل» — اتالىمى بويىنشا www.zheruiyq.kz پورتالى، «رۋحاني ازىق»  – اتالىمى بويىنشا  www.qamshy.kz پورتالى،  «تەرەڭ ىزدەنىس»  — اتالىمى بويىنشا  247media.kz سايتى،  «شىنايى ءومىر»  – اتالىمى بويىنشا kerekinfo.kz سايتى،  «سپورت تىنىسى» — اتالىمى بويىنشا ulttyqsport.kz جانە alzhan.kz سايتتارى، «ءبىلىم بۇلاعى»  — اتالىمى بويىنشا kaz-tili.kz جانە qaztest.kz سايتتتارى، «جاستار الەمى»  — اتالىمى بويىنشا zhasatyrau.kz پورتالى، «ويىن- ساۋىق» — اتالىمى بويىنشا baribar.kz جەڭىمپاز بولىپ تانىلدى.