24 قاراشادا الاش وردانىڭ 100 جىلدىعىنا وراي «Ugai production» پروديۋسەرلىك ورتالىعى مەن Qamshy.kz اقپارات اگەنتتىگى ۇيىمداستىرعان «جىلاماسىن سابيلەر» اتتى قايىرىمدىلىق كونسەرتى ءوتتى.  

ايتا كەتەتىن بولساق، وسىعان دەيىن Qamshy.kz اقپارات اگەنتتىگىنىڭ ۇيىمداستىرۋىمەن الاش وردانىڭ 100 جىلدىعىنا بايلانىستى اس بەرىلىپ، 100 اعاش وتىرعىزىلعان بولاتىن.  Qamshy.kz اقپارات اگەنتتىگى وسى جولى يگى ءىستى «جىلاماسىن سابيلەر» اتتى قايىرىمدىلىق شاراسىمەن جالعاستىرىپ وتىر. 

قايىرىمدىلىق ارقىلى بار قازاقتىڭ جەتىمىن قۋانتىپ، مۇقتاجىن تۇگەندەمەسەك تە 100 جەتىم بالا مەن 100 مۇقتاج ستۋدەنتكە كومەك كورسەتىلەتىن بولادى. كونسەرت بيلەتىنىڭ ساتىلىمىنان جينالعان قاراجات تۇگەلىمەن قايىرىمدىلىققا جۇمسالادى. اتالعان كەشتە «Ugai production» پروديۋسەرلىك ورتالىعىنىڭ جەتەكشىسى ۇشقىن جامالبەك پەن اتالعان ورتالىقتىڭ انشىلەرى اسەت ەسجان جانە ولجاس اباي ونەر كورسەتتى. سونىمەن بىرگە كونسەرتكە «الاش ۇلى» توبى مەن دانا كەنتاي قوناققا كەلىپ، قايىرىمدىلىق كەشكە ءوز ۇلەستەرىن قوستى.

ۇشقىن جامالبەكتىڭ «اناجان» ءانىن ەستىگەن كورەرمەندەر كوزدەرىنە جاس السا، اسەت ەسجان مەن ولجاس ابايدىڭ «ءدۇر قامشى» ءانى، «الاش ۇلى» توبىنىڭ «پاي-پاي» ءانى كورەرمەندەردى جىگەرلەندىرىپ، رۋح سىيلادى. قايىرىمدىلىق كەش شىمىلدىعى «مەن سەنى سۇيەمىن قازاقستان» انىمەن جابىلدى.

ۇشقىن جامالبەك «جىلاماسىن سابيلەر» اتتى كەش «Ugai prodution» پروديۋسەرلىك ورتالىعىنىڭ ۇيىمداستىرىپ وتىرعان العاشقى كونسەرتى بولىپ سانالاتىنىن جانە دە العاشقى قادامىن وسىنداي يگى ىسپەن باستاعانىنا قۋانىشتى ەكەنىن جەتكىزدى.

«الماتى اكىمدىگىنىڭ قولداۋىمەن Qamshy.kz اقپارات اگەنتتىگى مەن «Ugai production» پروديۋسەرلىك ورتالىعىنىڭ ۇيىمداستىرۋىمەن ءوتىپ جاتىر. كەشتەن جينالعان قاراجات 100 جەتىم بالا مەن 100 مۇقتاج ستۋدەنتكە بەرىلەتىن بولادى»، — دەيدى اتالعان ورتالىقتىڭ جەتەكشىسى ۇشقىن جامالبەك.

وسى ءىس شارانىڭ باسى قاسىندا جۇرگەن، Qamshy.kz اقپارات اگەنتتىگىنىڭ جەتەكشىسى ءبىلال قۋانىش كونسەرتتە جەتىم بالا مەن مۇقتاج ستۋدەنتتىڭ وكىلىنە سەرتيفيكات تابىس ەتتى.

«الەمدەگى بار قازاقتىڭ وتانى – تاۋەلسىز قازاقستان. بۇگىنگى بەيبىت ەلىمىز كوكتەن تۇسكەن جوق. الاش ارىستارىنىڭ قانىمەن، جانىمەن، تانىمەن كەلگەن. ءبىز الاش دەپ سويلەيمىز، الاش دەپ ءان ايتامىز، الاش دەپ جىر جازامىز. ءبارى دۇرىس، دەگەنمەن ءبىر ناقتى ءىس بولسا دا جاسايىق دەگەن نيەتپەن بۇگىنگى ءىسىمىز 100 جەتىم بالا مەن 100 مۇقتاج ستۋدەنتتىڭ جۇرەگىنە ءۇمىت ۇيالاتىپ، الاش ارىستارىنىڭ رۋحىنان ءتالىم الىپ جاتسا، ءبىزدىڭ ارمانىمىزدىڭ ورىندالعانى. وسى ىسكە ات سالىسىپ وتىرعان بارلىقتارىڭىزعا تەك قانا راحمەت ايتامىز. ءبىر ايتا كەتەرلىگى، قامشى اقپارات اگەنتتىگى قۇرىلعالى بەرى 5 جىلدا جاسالعان شارالاردىڭ ەشقايسىسىنا ءبىز مەملەكەت تاراپىنان ءبىر تيىن قاراجات العان جوقپىز. ونى تەك وزدەرىڭىز سياقتى اردا ازاماتتاردىڭ كومەگىمەن جاساپ وتىرمىز. ەندەشە ماڭگىلىك ەلىمىز بولۋى ءۇشىن بارلىعىمىز جۇدىرىقتاي جۇمىلىپ تاۋەلسىز قازاقستان ءۇشىن قىزمەت ەتە بەرەيىك»، — دەدى ءبىلال قۋانىش.

سونىمەن بىرگە جىلاماسىن سابيلەر اتتى قايىرىمدىلىق شاراسىنا الماتى اكىمدىگى دە قولداۋ ءبىلدىردى. ەلى مەن جەرىنىڭ، ۇلتىنىڭ قامىن كۇيتتەگەن ازاماتتار باردا قازاقتىڭ تۋى جەرگە قۇلامايدى، جەتىمى جىلامايدى.