قىرعىزستان 100 ميلليون دوللار تەحنيكالىق كومەك ءبولۋ تۋرالى قازاقستانمەن جاسالعان كەلىسىمنىڭ كۇشىن جويعانىن رەسمي تۇردە حابارلادى، دەپ جازادى  Qamshy.kz اقپارات اگەنتتىگى  sputniknews.kz مالىمەتىنە سۇيەنىپ.

بۇل تۋرالى ق ر سىرتقى ىستەر مينيسترلىگى باسپا ءسوز قىزمەتىنىڭ جەتەكشىسى ءانۋار جايناقوۆ مالىمدەدى.

"ءبىز قىرعىز تاراپىنان وتكەن اپتادا كەلىسىمنىڭ كۇشى جويىلعانى تۋرالى رەسمي حابار الدىق. ودان ءارى بۇل ماسەلە حالىقارالىق قۇقىق نورمالارىنا ساي شەشىلەتىن بولادى"، — دەدى جايناقوۆ جۋرناليستەرگە. 

قازاقستان وسى جىلدىڭ شىلدەسىندە قىرعىزستانعا 100 ميلليون دوللار ءبولۋ تۋرالى كەلىسىمدى راتيفيكاسيالادى. قاراجات قىرعىزستاننىڭ ەۋرازيالىق ەكونوميكالىق وداققا قوسىلۋى بويىنشا ءىس-شارالاردى جۇزەگە اسىرۋعا، اتاپ ايتساق، قىرعىز ۋچاسكەسىندەگى كەدەن ينفراقۇرىلىمىن جاقسارتۋعا، قىرعىزستاننىڭ سانيتارلىق، ۆەتەرينارلىق جانە فيتوسانيتارلىق جۇيەلەرىن وداقتىڭ تالاپتارىنا سايكەستەندىرۋگە بولىنگەن بولاتىن. 

كەلىسىمنىڭ بۇزىلۋىنا قىرعىزستاندا وتكەن پرەزيدەنت سايلاۋى كەزىندە استانا مەن بىشكەك اراسىندا تۋىنداعان ديپلوماتيالىق جانجال سەبەپ بولدى. سايلاۋ كەزىندە قىرعىزستاننىڭ بۇرىنعى پرەزيدەنتى المازبەك اتامبايەۆ قازاقستان بيلىگىن سىناعان ەدى.