بۇل اۋىلدا مىڭنان اسا ادام تۇرادى ەكەن. مۇندا اكىم دە، مەكتەپ تە جوق. ءتىپتى اۋىلدىڭ ناقتى اتى دا بەلگىسىز. بۇل تۋرالى informburo.kz جازادى.
اۋىلدا ەشقانداي اكىمشىلىك بولماعاندىقتان، تۇرعىندار اۋرۋحانالارعا دا قارالا المايدى. اۋىل تۇرعىندارىنىڭ ايتۋىنشا، ولار وسىنداي جاعدايدا تۇرىپ جاتقاندارىنا 17 جىل بولعان. ولار ءارتۇرلى ينستانسيالارعا ارىز دا جازعان. بالالارىن كورشى اۋىلدارعا ساباققا اپارادى ەكەن.
تۇرعىنداردىڭ ايتۋىنشا، اۋىلدىڭ اتىن بىرەۋلەر جاڭالىق دەپ اتاسا، ەندى بىرەۋلەر ءۇشىن ول- جاڭا ارنا، اۋىلدىڭ تاعى ءبىر اتاۋلارى - توعىزىنشى ءبولىم جانە ميچۋرينسك.
«بۇرىندارى بۇل اۋىلدا اۋىلشارۋاشىلىق ونىمدەرىن ءوسىرىپ وڭدەگەن ەكەن. كەيىن سوۆحوز جويىلدى، ال ءبىز سول كۇيى ەشكىمگە كەرەك ەمەس قالپىمىزدا قالدىق»-دەيدى تۇرعىننىڭ ءبىرى.
قازىرگى ۋاقىتتا اۋىل تۇرعىندارى سۋدى قۇدىقتان الىپ ىشەدى. وسىعان قاراماستان، اۋىل قالاعا جاقىن بولعاندىقتان مۇندا جاڭا ءۇي قۇرىلستارىن كوپتەپ كەزدەستىرۋگە بولادى.
شەنەۋنىكتەرمەن ۇمىت قالعان بۇل اۋىل ىلە اۋدانى مەن تالعار اۋدانى شەكاراسىندا ورنالاسقان. الايدا تالعار اۋدانىنىڭ اۋرۋحاناسىندا دا، ىلە اۋدانىنىڭ اۋرۋحاناسىندا دا تۇرعىندارعا كومەك كورسەتىلمەيدى. سەبەبى اۋداندار بۇل اۋىلدى ءوزىنىڭ قاراماعىندا دەپ ەسەپتەمەيدى. اۋىل تۇرعىندارى «ءوزىمىزدىڭ اكىم مەن اكىمشىلىگىمىز بولسا عوي» دەپ ارماندايدى.
تۇرعىندار اۋىلدى «ەلەس اۋىل» دەپ اتايدى. اتى جوق اۋىلعا مەملەكەتتەن قاراجات تا بولىنبەيدى ەكەن. اۋىل تۇرعىندارى ءۇشىن زەينەتاقى مەن جەرداماقىنى راسىمدەۋ دە قيىنعا سوعادى.
الماتى وبلىسىنىڭ اكىمدىگى بۇل اۋىل 2014 جىلى الماتى وبلىسىنىڭ اۋداندارى قاتارىنا قوسىلماي قالعانىن جەتكىزگەن.
وبلىس اكىمدىگى الماتى وبلىسىندا مۇنداي «يەسىز» اۋىلداردىڭ كوپ ەكەندىگىن ايتادى. «ەلەسكە» اينالعان اۋىل تالعار اۋدانىنا كىرۋى مۇمكىن دەگەن بولجام ايتىلدى.
پىكىر قالدىرۋ