مەملەكەت پايداسىنا پوليسيا ينسپەكتورى 1 ملن 361 مىڭ 400 تەنگە كولەمىندە ايىپپۇل تولەۋگە مىندەتتەلدى. جول ەرەجەسىن بۇزعان كولىك جۇرگىزۋشىسى دە جاۋاپكەرشىلىكتەن قۇتىلا المادى، وعان سالىنعان ايىپپۇل 453 800 تەڭگە. سوت تاراپىنان سىياقى بەرۋ جانە الۋ دەرەگى بويىنشا، جول ساقشىسى جانە كولىك جۇرگىزۋشىسىن بىردەي جاۋاپقا تارتۋ بۇرىن سوڭدى وبلىس كولەمىندە بولماعان جاعداي. بۇل تۋرالى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ماڭعىستاۋ وبلىسى بويىنشا دەپارتامەنتى حابارلادى دەپ جازادى Qamshy.kz اقپارات اگەنتتىگى.

ۇستىمىزدەگى جىلى تامىزدىڭ 1 كۇنى ساعات 16:40 شاماسىندا ماڭعىستاۋ وبلىسى ءىىد جەرگىلىكتى پوليسيا قىزمەتى جول-پاترۋلدىك قىزمەتىنىڭ ينسپەكتورى ت.باقىتوۆ، "اقتاۋ-قالامقاس" تاس جولىنىڭ 97 شاقىرىمىندا ازامات س.قادىربايەۆتىڭ باسقارۋىنداعى جۇك كولىگىن توقتاتىپ، قۇجاتتارىن تەكسەرگەن. الايدا كولىك جۇرگىزۋشىسىنىڭ قۇجاتتارى تولىق بولماي شىققان، سول كەزدە ازامات س.قىدىربايەۆ جول ساقشىسىنا 1000 تەڭگە كولەمىندە زاڭسىز سىياقى بەرگەن. 

بۇل دەرەكتى ماڭعىستاۋ وبلىسى ىشكى ىستەر دەپارتامەنتى وزىندىك قاۋىپسىزدىك باسقارماسىنىڭ قىزمەتكەرلەرى انىقتاپ، جول ينسپەكتورىنىڭ ۇستىنەن قىلمىستىق ءىس قوزعاۋ ءۇشىن ءوندىرىس اشىپ، وبلىستىق سىبايلاس جەمقورلىققا قارسى ءىس-قيمىل ۇلتتىق بيۋروسىنا جولدايدى. الايدا ۇلتتىق بيۋرو تاراپى پوليسيا قىزمەتكەرىن قىلمىستىق جاۋاپقا تارتۋ تۋرالى ءوندىرىس قوزعاماعان، سەبەبى زاڭسىز سىياقى مولشەرى ەكى ايلىق ەسەپتىك كورسەتكىش مولشەرىنەن اسپاعان. سول سەبەپتى جول ساقشىسىن جانە كولىك جۇرگىزۋشىسىن اكىمشىلىك جاۋاپقا تارتۋ ءۇشىن، قوزعالعان اكىمشىلىك ءىس ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ماڭعىستاۋ وبلىسى بويىنشا دەپارتامەنتىنە جولداعان. 

ءوز كەزەگىندە كولىك جۇرگىزگەن ازامات س.قىدىربايەۆ ءوزىنىڭ زاڭسىز ارەكەتىن اكىمشىلىك جازادان قۇتىلۋ ءۇشىن وسىنداي ارەكەتكە بارعانىن ايتىپ ءتۇسىندىرىپ، 1000 تەڭگە كولەمىندە زاڭسىز سىياقىنى پوليسيا قىزمەتكەرگە ۇسىنعانىن ايتقان. ال زاڭسىز سىياقى العان جول ساقشىسى بولسا، ق ر اكىمشىلىك قۇقىق بۇزۋشىلىق تۋرالى كودەكسىنىڭ 677 بابىن بۇزدى دەپ ايىپتالدى. ناتيجەسىندە، سوت قاۋلىسىنا سايكەس پوليسيا ينسپەكتورى 600 ايلىق ەسەپتىك كورسەتكىش مولشەرىندە مەملەكەت پايداسىنا ايىپپۇل تولەۋگە مىندەتتەلدى.

"سوتتىڭ ەكى جاقتى بىردەي جاۋاپكەرشىلىككە تارتىپ، وسىنداي ءىرى مولشەردە ايىپپۇل سالۋى ماڭعىستاۋ وبلىسىندا بولعان ءبىرىنشى جاعداي. ياعني، پوليسيا قىزمەتكەرىنە سالىنعان 1 ملن. 400 مىڭ تەڭگەگە جۋىق ايىپپۇل از ەمەس. ال كولىك جۇرگىزۋشىسى بولسا 200 ايلىق ەسەپتىك كورسەتكىش مولشەرىندە، ياعني 453 800 تەڭگە ايىپپۇل تولەيتىن بولدى. بۇل ءتۇپقاراعان اۋداندىق مامانداندىرىلعان اكىمشىلىك سوتىنىڭ قاۋلىسى. زاڭ بارلىعىنا ورتاق. سول سەبەپتى جول ەرەجەسىن قاتاڭ ساقتاپ جۇرۋگە بارلىعىمىز مىندەتتى ەكەنىمىزدى ەسكە سالعىم كەلەدى جانە بۇل جاعداي باسقالارعا ساباق بولار دەگەن ۇمىتتەمىز"، - دەيدى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى ماڭعىستاۋ وبلىسى بويىنشا دەپارتامەنتىنىڭ باسشىسى نۇرگۇل جاننازاروۆا.

تاراپتار قاۋلىعا ون كۇن ىشىندە ماڭعىستاۋ وبلىستىق سوتىنىڭ ازاماتتىق ىستەرى جونىندەگى سوت القاسىنا شاعىم نەمەسە ءوتىنىش بەرە الادى.

ءوز كەزەگىندە نۇرگۇل جاننازاروۆا، اگەنتتىك تاراپىنان جولداردا سىبايلاس جەمقورلىق ارەكەتتەرىن بارىنشا تومەندەتۋگە باعىتتالعان 10 قادام جوسپارى جاساقتالعانىن ايتادى. ونىڭ اياسىندا، ازاماتتاردىڭ ارىز-شاعىمدارى قارالىپ، ءتيىستى شارالار الىنادى. ەڭ باستىسى سىبايلاس جەمقورلىق سيپاتىنداعى قۇقىق بۇزۋشىلىقتاردىڭ جولىن كەسۋ جانە الدىن-الۋ جۇمىستارى جۇرگىزىلەدى.

بۇل رەتتە، دەپارتامەنت جانىنان قۇرىلعان سىبايلاس جەمقورلىققا قارسى كۇرەس جونىندەگى موبيلدىك توپتىڭ اتقارىپ جاتقان جۇمىسى وراسان، ونىڭ قۇرامىنا مەملەكەتتىك قىزمەت جانە سىبايلاس جەمقورلىققا قارسى كۇرەس دەپارتامەنتىنەن بولەك، ءدىني باسقارما، ۇكىمەتتىك ەمەس ۇيىمدار، جۋرناليستەر جانە "نۇر وتان" پارتياسىنىڭ وكىلدەرى كىرەدى.