ريم پاپاسى فرانسيسك ميانمانىڭ ازاماتتىق جەتەكشىسى اۋن سان سۋ چجيمەن كەلىسسوز جۇرگىزدى. الەمدىك اگەنتتىكتەردىڭ حابارلاۋىنشا، ۆاتيكان باسشىسى الەمدەگى ەڭ داعدارىس ايماعىنا ساپارمەن بارىپ وتىر دەپ جازادى Qamshy.kz اقپارات اگەنتتىگى ازاتتىققا سىلتەمە جاساپ.

سۋ چجيمەن كەزدەسۋدەن سوڭ ريم پاپاسى ميانما تۇرعىندارىنا ۇندەۋ ارنادى. ول بيرمانىڭ بولاشاعى "ءاربىر ەتنيكالىق توپتىڭ" قۇقىعىن قورعاۋىنا بايلانىستى ەكەنىن ەسكەرتتى. سول ارقىلى ول ونداعان جىلدار بويى مەملەكەتتەن تەپەرىش كورىپ، سوڭعى ايلاردا اياۋسىز اسكەري قۋدالاۋعا ۇشىراعان مۇسىلمان روحيندجالارعا قولداۋ ءبىلدىردى.

فرانسيسك قۋدالاۋ نەمەسە "روحيندجا" ءسوزىن اۋن سان سۋ چجي مەن بيلىكتىڭ باسقا دا وكىلدەرى الدىندا اتاعان جوق. ءبىراق ول ميانما تۇرعىندارى "ازاماتتىق جانجالدار مەن اسكەري قيمىلداردان زارداپ شەگىپ كەلە جاتقانىن"، مۇندا ادام قۇقىعى ساقتالۋى كەرەكتىگىن باسا ايتتى.

نەگىزىنەن بۋددالار تۇراتىن ميانمادا "روحيندجا" ءسوزىن كوپشىلىك الدىندا قولدانۋ تابۋ دەپ ەسەپتەلەدى. شاعىن مۇسىلمانداردىڭ قۇقىقتارىن شەكتەپ، ولارعا زاڭسىز "بەنگال" يمميگرانتتارى دەگەن ات بەرىپ قويعان.

اقش پەن بۇۇ سولتۇستىك راكحاين شتاتىنداعى از ۇلتتارعا جاسالعان قىسىمدى "ەتنيكالىق تازالاۋ" دەپ اتادى. روحيندجا بۇلىكشىلەرى اسكەر بەكەتىنە شابۋىلداعان سوڭ، وعان جاۋاپ رەتىندە كۇش قولدانعان، سونىڭ ناتيجەسىندە 620 000-دان استام مۇسىلمان روحيندجا كورشىلەس بانگلادەشكە قاشۋعا ءماجبۇر بولدى. ولار روحيندجالاردىڭ تۇتاس اۋىلدارى تونالىپ، ورتەلىپ، ايەلدەر مەن قىزداردى زورلاعانىن حابارلادى.