قىرعىزستان پرەزيدەنتى سوورونباي جەەنبەكوۆ قازاقستان پرەزيدەنتى نۇرسۇلتان نازاربايەۆپەن كەزدەسىپ، كەلىسسوز وتكىزۋدى جوسپارلاپ وتىر. ازاتتىقتىڭ قىرعىز رەداكسياسىنىڭ حابارلاۋىنشا، جەەنبەكوۆ بۇل تۋرالى ماسكەۋدە رەسەي پرەزيدەنتى ۆلاديمير پۋتينمەن كەزدەسۋ قورىتىندىسى بويىنشا جۋرناليستەرگە ايتتى.

"ەرتەڭ مينسكىدە ۇجىمدىق قاۋىپسىزدىك شارتى ۇيىمى (ۇقشۇ) مەملەكەتتەرىنىڭ باسشىلارى جينالادى. وندا قازاقستان پرەزيدەنتى نۇرسۇلتان ءابىش ۇلى دا بولادى. وتىرىس بولادى. وتىرىس كەزىندە بارلىعىمەن كەزدەسەمىن. مەن نۇرسۇلتان ابىشۇلىمەن كەزدەسىپ، كەلىسسوز جۇرگىزەمىن جانە بۇل ماسەلە جونىندە دە سويلەسەمىز دەپ ۇمىتتەنەمىن" دەدى قىرعىزستان پرەزيدەنتى.

قازاقستان پرەزيدەنتىنىڭ باسپا ءسوز قىزمەتى نەمەسە قىرعىزستان پرەزيدەنتىنىڭ باسپا ءسوز قىزمەتى ەكى پرەزيدەنتتىڭ كەزدەسەتىنى جايلى ازىرگە قانداي دا ءبىر اقپارات تاراتپادى.

قازاقستان 10 قازاننان باستاپ قىرعىزستانمەن شەكارادا تەكسەرۋدى كۇشەيتىپ، تەكسەرۋ جانە وتكىزۋ بەكەتتەرىندە كولىك جانە ادام كەزەگى كوبەيگەن. استانا تەكسەرۋدىڭ كۇشەيتىلگەنىن كونتراباندامەن كۇرەس شاراسى دەپ اتايدى. ءبىراق رەسمي بىشكەك قازاقستان جاعى شەكارادا قولدان كەدەرگى جاساپ وتىر دەپ بىلەدى.

29 قاراشادا سوورونباي جەەنبەكوۆ پرەزيدەنت رەتىندەگى العاشقى ساپارىندا رەسەيگە باردى. ول ماسكەۋدە رەسەي پرەزيدەنتى ۆلاديمير پۋتينمەن جانە پرەمەر-مينيسترى دميتريي مەدۆەديەۆپەن كەزدەستى. جەەنبەكوۆ 30 قاراشادا مينسكىگە بارىپ، ۇقشۇ-نىڭ كەزەكتى سەسسياسىنا قاتىسادى.