4 جەلتوقسان كۇنى الماتىدا "اشىق قوعام - اشىق بيۋدجەت" دەگەن اتپەن وتەدى دەپ جوسپارلانعان جاس اقىندار ايتىسى وتپەيتىن بولدى دەپ حابارلايدى Qamshy.kz اقپارات اگەنتتىگى www.azattyq.org-قا سىلتەمە جاساي وتىرىپ.

ۇيىمداستىرۋشى "مەدياوردا" قوعامدىق قورىنىڭ وكىلى اسقار بەكوۆتىڭ  ايتۋىنشا، ايتىس وتكىزۋ تۋرالى جاسالىنعان كەلىسىمشارت قايتا بۇزىلعان. "الاتاۋ" ءداستۇرلى ونەر تەاترىنىڭ باسشىلارى دا، "قازاقكونسەرت" زالى باسشىلارى دا العاشقىدا ايتىستى وتكىزۋگە قولداۋ ءبىلدىرىپ، كەلىسىمشارتقا جاساسىپ، زالدىڭ جالعا بەرۋ قارجىسىن العان. ءبىراق ايتىسقا بىرنەشە عانا كۇن قالعاندا قولداۋ بىلدىرە المايتىندارىن جەتكىزدى.

- كەلىسىمشارتتى ءۇزىپ، سەبەپ سالدارىن ءتۇسىندىرىپ، قارجىمىزدى قايتاردى. دەگەنمەن ۇلكەن وكىنىش قالدى. تەxنيكالىق اقاۋلاردى العا تارتىپ، ايتىستى وتكىزۋگە ەشقانداي مۇمكىندىك جوق ەكەنىن تۇسىندىرگەن "الاتاۋ" ءداستۇرلى تەاتر باسشىلارى باسقا شارالاردى ويداعىداي وتكىزىپ جاتىر. ال، "قازاقكونسەرت" ۇجىمى مينيسترلىكتىڭ ءىس-شاراسى وتەتىنىن العا تارتىپ، كەلىسىمشارتتى بۇزدى، - دەيدى اسقار بەكوۆ ازاتتىققا.

ۇيىمداستىرۋشىلار ايتىستى وتكىزبەۋ ءۇشىن "الاتاۋ" ءداستۇرلى ونەر تەاترى مەن "قازاقكونسەرت" زالىنىڭ باسشىلىعىنا ارنايى نۇسقاۋ تۇسكەن بولۋى مۇمكىن دەپ بولجايدى. "الدا ءبىرىنشى جەلتوقسان، ونان كەيىن تاۋەلسىزدىك كۇنى كەلە جاتىر، بالكىم، سەسكەنگەن بولار" دەيدى اسقار بەكوۆ.