پوليسيا زەلەنوگرادتاعى زەينەتكەر وقۋشى نەمەرەسىن سۋيسيدكە دەيىن جەتكىزدى دەگەن اقپاراتتى تەكسەرىپ جاتىر.

گ.ە. سۋحاريەۆ اتىنداعى بالالار مەن جەتكىنشەكتەرگە ارنالعان پسيحيكالىق ساۋلىعى عىلىمي-تاجىريبەلىك ورتالىعىندا الدەنەگە الاڭداپ وتىرعان ايەل وتىر. ونىڭ ەسىمى ناتالي. ول 17 جاستاعى بالاسى فەدوردىڭ جاعدايىن ءبىلۋ ءۇشىن دارىگەردى كۇتىپ ءجۇر. سوڭعى جىلدارى ناتاليدىڭ باسىنان ءتۇرلى جاعداي ءوتتى. ونىڭ بالاسى ءدارى ءىشىپ وزىنە قول جۇمساماق بولعان. قىزداردىڭ ءبىرى سترەسستەن ەندى عانا ايىعىپ كەلەدى. ناتالي بولعان جاعدايعا ەنەسى مارگاريتا بوبكوۆانى ايىپتادى.

سوڭعى كەزدەرى ءفودور اجەسىمەن بىرگە تۇردى. وتباسىلىق جينالىستا سولاي شەشىلگەن. تۇستەن كەيىن ناتالي ەنەسىنە قوڭىراۋ شالدى. ەنەسى ۇيگە دەرەۋ كەلىپ، فەدوردى الىپ كەتۋدى تالاپ ەتكەن بولاتىن.  ءبىراق ۋاقىت وتە كەلە تىنىشتالدى. تەلەفون شالمايتىن بولدى. ناتالي ەش ۋايىمداماستان ەكى قىزىمەن زەلەنوگرادتاعى جالداپ تۇراتىن ءبىر بولمەلى ۇيىنە باردى. وندا دا ونى جاعىمسىز جاڭالىق كۇتىپ تۇرعان ەدى. 14 جاستاعى ۇلكەن قىزى سوفيا الەۋمەتتىك جەلىدە بىرەۋ تىنىشتىق بەرمەيتىنىن ايتادى. بۇل جاعدايدى تالقىلاپ ۇلگەرمەستەن فەدور قوڭىراۋ شالدى. ناتالي جامان جاعداي بولعانىن سەزدى. فەدوردىڭ داۋسىنان الدەنەگە الاڭداپ تۇرعانىن بايقاۋعا بولادى. ول ارەڭ سويلەپ تۇرعان.  

— «فەديا اجەسى قايتىس بولعان اكەسىنىڭ حاتتارىن وقىپ، ونى سوكتى. مەن تۋرالى جامان سوزدەر ايتتى. ەندى ماعان ءومىر ءسۇرۋدىڭ قاجەتى جوق». ول اجەسىنىڭ دارىلەرىن ءىشىپ العانىن ايتتى، - دەپ كوزىنە جاس الدى ناتالي.

ناتالي ەنەسىنىڭ ۇيىنە قۇستاي ۇشىپ جەتتى. ەنەسى جەدەل جاردەم شاقىرىپ، ولار فەدوردى اۋرۋحاناعا الىپ كەتكەن ەكەن. ونىڭ جاعدايى اۋىر بولدى. اناسى ونىڭ ارتىنان اۋرۋحاناعا كەتتى.

— كۇنى بويى ەنەم حابارلاسىپ، پوليسياعا بارساڭ جۇمىستان قۋىلاسىڭ دەپ قورقىتتى، - دەيدى ناتالي.

دارىگەرلەر فەدوردى امان الىپ قالدى. جاقىندا ونى بالالارعا ارنالعان پسيحولوگيالىق ساۋىقتىرۋ ورتالىعىنا جەتكىزدى.

ءناتاليدىڭ بولجامىنشا، الەۋمەتتىك جەلىدە سوفيانىڭ سوڭىنا تۇسكەن ادام ەنەسى دەپ كۇدىكتەنەدى. ول زاڭگەرلەردەن كەڭەس الىپ، ەنەسىنىڭ ۇستىنەن ارىز جازدى. ناتالي پوليسەيلەرگە اۋديو جازبالار مەن حابارلامالاردى سۋرەتكە ءتۇسىرىپ تەرگەۋشىلەرگە تاپسىردى. ءقازىر سوتقا دەيىنگى تەكسەرۋ جۇمىستارى باستالدى.

وتكەن ءومىر قايتىپ ورالدى

ناتالي بولاشاق جارىمەن 17 جىل بۇرىن تانىستى. زەلەنوگرادتىق مۋزىكانت الەكسەي ەكەۋى ءبىر كورگەننەن بىر-بىرىنە عاشىق بولدى.  كور ۇزاماي ناتالي جۇكتى بولدى. الەكسەيدىڭ اناسى مارگاريتا بوبكوۆاعا ناتالي ۇنامادى.

— اناسى بالام الەكسەيدەن ەمەس ەكەنىنە سەنىمدى ەدى، - دەيدى ناتالي.

فەدور دۇنيەگە كەلگەندە اكەسى مەن اجەسى كوپكە دەيىن كۇدىكتەندى، ءبىراق ۋاقىت وتە كەلە ونى ءوز قانى ەكەنىن مويىندادى. ناتالي الەكسەيدىڭ ەسىرتكى قابىلدايتىنىن بايقادى.  ءبىراز ۋاقىتتان كەيىن ول ەسىرتكى مولشەرىن تىم كوپ پايدالانعاندىقتان كوز جۇمدى.

ناتالي تۇرمىسقا شىعىپ، جاڭا كۇيەۋىمەن شەتەلگە كەتىپ قالدى. تاعى ەكى قىز بوساندى. ەلگە قايتا ورالعاندا ول ءۇش بالامەن جالعىز قالدى. ءۇي دە، جۇمىستا بولمادى. ناتالي فەدوردى اجەسىمەن قالدىرعانىنا وكىنەدى.

— ول بالامدى ماعان جانە قارىنداستارىنا قارسى قويدى. وعان ۇنەمى ءتىل تيگىزىپ، مەنىڭ ماتەريالدىق جاعدايىمنىڭ وتە تومەن ەكەنىن ايتىپ، مەنىمەن تەك كەدەيشىلىكتى ءومىر سۇرەتىنىن ايتاتىن، - دەيدى ناتالي.

اجەسى فەدورعا ولگەن اكەسىنىڭ حاتتارىن وقىتىپ وتىرعان. ءبىراق نەتكەن حاتتار، وندا نە جازىلعانى بەلگىسىز. اجەسى دە فەدور دا ول حاتتار تۋرالى ءلام-ميم دەپ ءتىس جارمايدى. ناتاليدىڭ ويىنشا، اجەسى بالاسىنىڭ اتىنان حاتتى ءوزى جازىپ، فەدورعا وقىتىپ وتىرعان.

ەگەر فەدور اجەسىنىڭ كەسىرىنەن وزىنە قول جۇمساماق بولعانى انىقتالسا، قىلمىستىق ءىس قوزعالادى. ازىرشە پوليسيا تەكسەرۋ جۇمىستارىن جۇرگىزىپ جاتىر. ەگەر اجەسىنىڭ كىناسى دالەلدەنسە 15 جىلعا دەيىن باس بوستاندىعىنان ايىرىلۋى مۇمكىن.