بۇگىن قازاقستان حالقى رەسپۋبليكامىزدىڭ تۇڭعىش پرەزيدەنتى كۇنىن اتاپ وتەدى، دەپ حابارلايدى Qamshy.kz اقپارات اگەنتتىگى. 

2011 جىلدىڭ 10 جەلتوقسانىندا قازاقستان رەسپۋبليكاسىنىڭ پارلامەنت سەناتى دەپۋتاتتارىنىڭ باستاماسىمەن «قازاقستان رەسپۋبليكاسىنداعى مەرەكەلەر تۋرالى» ق ر زاڭىنا تولىقتىرۋ ەنگىزۋ تۋرالى» ق ر زاڭى قابىلدانعان بولاتىن. ياعني، ءدال سول ۋاقىتتا 1 جەلتوقساندى قازاقستان رەسپۋبليكاسىنىڭ تۇڭعىش پرەزيدەنتى كۇنى ەتىپ بەلگىلەدى. 

تاۋەلسىزدىكتى ارمانداعان بابالارىمىزدىڭ تىلەگى 1991 جىلى قابىل بولىپ،  1 جەلتوقساندا نۇرسۇلتان ءابىش ۇلى نازاربايەۆ تاۋەلسىز قازاقستان رەسپۋبليكاسىنىڭ تۇڭعىش پرەزيدەنتى بولىپ سايلانعان ەدى.

ەل تاريحىنداعى تۇڭعىش جالپىحالىقتىق سايلاۋدا نۇرسۇلتان نازاربايەۆقا حالىقتىڭ 98،78 پايىزى داۋىس بەرىپ، مەملەكەت باسشىسى رەتىندە تاڭداپ الدى. سودان بەرى 26 جىل ءوتىپ، وسى ارالىقتا قازاقستان الەم مويىنداعان مەملەكەتكە اينالدى.

قازاقستان رەسپۋبليكاسىنىڭ تۇڭعىش پرەزيدەنتى كۇنىن اتاپ ءوتۋ – قازاقستان رەسپۋبليكاسىنىڭ پرەزيدەنتى — نۇرسۇلتان ءابىش ۇلى نازاربايەۆتىڭ مەملەكەتكە سىڭىرگەن ەڭبەگى مەن جەتىستىگىن تانۋ ماقساتىندا ۇيىمداستىرىلعان.

تۇڭعىش پرەزيدەنت كۇنى ەلىمىزدە كەڭىنەن اتالىپ وتەدى. ال مەرەكە قارساڭىنداعى ايتۋلى وقيعالار ارقىلى ەلباسىنىڭ ەرەن ەڭبەگى ايشىقتالا تۇسەدى. ماسەلەن،  كەشە الماتى قالاسىنداعى باستى كوشەلەردىڭ ءبىرى — فۋرمانوۆقا نۇرسۇلتان نازاربايەۆتىڭ ەسىمى بەرىلدى.