بىشكەكتە تۇسىرىلگەن اتىشۋلى ۆيدەودا بالانى تەپكەن ەر ادام مەملەكەتتىك قىزمەتكەر بولىپ شىقتى، دەپ جازادى Qamshy.kz اقپارات اگەنتتىگى 24.kz-كە سىلتەمە جاساپ.
ەسكە سالايىق، قازاقستاندىق الەۋمەتتىك جەلى قولدانۋشىلارى Facebook جەلىسىندە جانە Instagram جەلىسىندە تانىمال توپتاردا جاريالانعان ۆيدەونى قىزۋ تالقىلاپ جاتىر. ەر ادام سوقىلىق مەمتىركەۋ باسشىسىنىڭ ورىنباسارى بولىپ شىقتى. ونىڭ ءاتى-جونى – بەريەر ادييەۆ.
بۇل مالىمەتتى ورگاننىڭ باسپا ءسوز قىزمەتىندەگىلەر راستاعان. ولار تاراتقان حابارعا سەنسەك، مەمتىركەۋ باسشىسى ەر ادامدى جۇمىستان شىعارۋ تۋرالى تاپسىرما بەرىپتى. پورتال قىرعىز رەسپۋبليكاسى الەۋمەتتىك دامۋ مينيسترلىگىنە سىلتەمە جاساي وتىرىپ، ادييەۆتىڭ ايەلى اسەل ەرجانوۆانىڭ ءوز كۇيەۋىن اتا-انا قۇقىعىنان ايىرۋدى تالاپ ەتكەنىن حابارلادى. ايەلدىڭ ءوزى بۇل وقيعا جايلى جاڭالىقتاردان ءبىلىپتى. بالاسى ەلحان وتباسىندا جالعىز ۇل ەكەن. كەلەسى جىلدىڭ ناۋرىزىندا بالا ۇشكە تولادى.
«شەشەسى كۇيەۋىنىڭ بالاعا مۇنىڭ الدىندا قول كوتەرمەگەنىن جانە ەشقانداي اگرەسسيا تانىتپاعانىن ايتتى. تۋىستارى ەر ادامعا بايسالدى دەپ مىنەزدەمە بەرگەن. اسەل ەرجانوۆا كۇيەۋىنىڭ نە سەبەپتى بالاعا مۇنداي قورلىق كورسەتكەنىن تۇسىنە الماعانىن مالىمدەگەن. سوندىقتان ازىرشە ەشكىمدى دە كىنالاعىسى كەلمەيدى، ءبىراق ونى ءبارىبىر اتا-انا قۇقىعىنان ايىرۋدى تالاپ ەتتى»، – دەپ حابارلادى ۆەدومستۆوداعىلار.
