شۆەيساريالىق فوتوگراف مارسەل بۋركارد قازاقستاندىق بانكنوتتان ءوزى تۇسىرگەن شاعالاسىن تانىدى، دەپ جازادى Qamshy.kz اقپارات اگەنتتىگى. بۇل تۋرالى فوتوگراف ءوزىنىڭ جەلىدەگى پاراقشاسىنا جازدى. ونىڭ ايتۋىنشا، شاعالانىڭ ءتۇپنۇسقاسى ۋيكيپەديادا بار، ءارى اۆتورلىق قۇقىعى دا كورسەتىلگەن.

"قانداي مارتەبە! كەشە قازاقستاننىڭ ۇلتتىق بانكى شاعالالاردىڭ سۋرەتى سالىنعان جاڭا بانكنوت شىعاردى دەگەن حابار ەستىدىم. بۇل كوپشىلىكتىڭ قىزۋ تالقىسىنا ءتۇسىپتى. ۇلتتىق بانك شاعالالاردىڭ سۋرەتى ۇرلانعان دەگەندى جوققا شىعارادى. الايدا جەلىدە ءۇش ءتۇپنۇسقا سۋرەت تابىلدى"، — دەپ جازدى مارسەل بۋركارد.

بۋركاردتىڭ ايتۋىنشا، ديزاينەر ەشقانداي قيىندىقسىز-اق بار سۋرەتتەردى پايدالانا سالعان. فوتوگراف سۋرەتتىڭ اۆتورى رەتىندە قۇقىعىن قورعايتىنىن مالىمدەپ وتىر.

ەسكە سالساق، ۇلتتىق بانك 22 قاراشادا جاڭا ديزاينمەن 500 تەڭگەلىك بانكنوتتاردى شىعاردى. قاعاز اقشانىڭ ءبىر جاعىندا قازاقستان كارتاسى مەن كاسپيي تەڭىزى، شاعالالار بەينەلەنگەن. جەلى قولدانۋشىلارى شاعالانى ۋيكيپەديادان الىنعان دەپ سىن ايتۋدا. ال، باس بانك سۋرەتشى ناتۋرامەن جۇمىس ىستەدى، ناتۋرا رەتىندە فوتوسۋرەت ينتەرنەتتەن الىنۋى مۇمكىن دەگەندى العا تارتادى.