2017 جىلدىڭ جازىندا شىعىس قازاقستان وبلىسىنا جۇمىس ساپارىمەن كەلگەن قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ اگروونەركاسىپتىك كەشەن مەكەمەلەرىنىڭ باسشىلارىن ارزان شيكىزاتتى ساتپاي، دايىن ونىمدەردى ءوندىرۋ ءۇشىن كووپەراتيۆتەرگە بەلسەنە بىرىگۋگە شاقىردى. بۇل ءسوزدىڭ تۇپ-توركىنىن اۋىل شارۋاشىلىعى سالاسىندا ەڭبەك ەتىپ جۇرگەن ادامدار بىردەن ءتۇسىندى. قازىرگى ۋاقىتتا شىعىس قازاقستان وبلىسىندا اۋىل شارۋاشىلىعى سالاسىنداعى كووپەراتيۆتەرگە 16 مىڭ سۋبەكت بىرلەسىپ وتىر. 44 پيلوتتىق كووپەراتيۆتەر ىسكە قوسىلعان. ونىڭ ىشىندە 32 كووپەراتيۆ ءسۇت، 12 كووپەراتيۆ ەت باعىتىندا جۇمىس ىستەۋدە.

وسى كووپەراتيۆتەردى جابدىقتاۋعا 3،1 ملرد. تەڭگە بولىنگەن. بۇنىڭ 2 ملرد. تەڭگەسى اگرارلىق نەسيە كورپوراسياسىنىڭ بيۋدجەتتىك نەسيەلەۋ باعدارلامالارى مەن اۋىل شارۋاشىلىعىن قارجىلاي قولداۋ قورى ارقىلى جۇمىلدىرىلدى. ال 1،1 ملرد. تەڭگە قارجى ينستيتۋتتارىنىڭ مەنشىكتى قاراجاتى بولىپ تابىلادى.

وبلىستا جالپى 17 400 باس سيىرى بار 54 ءسۇت-تاۋار فەرماسى جۇمىس ىستەپ تۇر. بيىلعى ون ايدىڭ ىشىندە بۇل شارۋاشىلىقتار وڭدەۋشى كومپانيالارعا 60 مىڭ توننا ءسۇت بەردى. جىلدىق جوسپار 68 مىڭ توننانى قۇرايدى. وتكەن جىلى وسى كەزەڭدە 14 مىڭ توننا از وندىرىلگەن بولاتىن. بۇدان بولەك، حالىقتان تاعى 20 مىڭ توننا ءسۇت ساتىپ الىندى. بۇل كورسەتكىش وتكەن جىلمەن سالىستىرعاندا 2،5 ەسەگە كوپ.

وبلىستىڭ اگرارلىق سەكتورىنا كورسەتىلگەن مەملەكەتتىك قولداۋ بيىلعى جىلى ءبىرشاما ارتقان. ناقتى ايتساق، 18 ملرد. تەڭگە سۋبسيديا ءبولىندى (وتكەن جىلمەن سالىستىرعاندا 10% جوعارى). وندىرىلەتىن ءونىمنىڭ ەكسپورتتىق الەۋەتىن ارتتىرۋ ءۇشىن وبلىستا ەكى ەت كومبيناتىنىڭ قۇرىلىس جۇمىستارى دا باستالدى.

بۇل جايتتاردى استانا قالاسىنداعى ورتالىق كوممۋنيكاسيالار قىزمەتىندە وتكەن بريفينگ بارىسىندا ءسوز العان دانيال احمەتوۆ مالىمدەدى.