ورال قالاسىنىڭ تۇرعىنى، 29 جاستاعى دينا سيرياعا نەلىكتەن كەتكەنىن ايتىپ بەردى دەپ حابارلايدى Qamshy.kz اقپارات اگەنتتىگى mgorod.kz باسىلىمىنا سۇيەنە وتىرىپ.

ءتورت بالانىڭ اناسى دينا 2011 جىلى ول الەۋمەتتىك جەلىدە بولاشاق كۇيەۋىمەن تانىسىپ، ونىمەن بىرگە پاكىستانعا قاشىپ كەتكەن. سودان كەيىن ولار تۇركياعا زاڭسىز ءوتىپ،  ءۇش جىل سول جەردە تۇرعان. تۇركيادا ەكى قىزى دۇنيەگە كەلگەن.

« ءبىز سيرياداعى ءومىر جايلى ۆيدەوروليكتى كوردىك. ۆيدەودا ءبارى جاقسى، ءبارى شاريعات بويىنشا ءومىر سۇرەتىنى ايتىلدى. 2015 جىلى حاليفات قۇرىلعانى جاريالانعان كەزدە ءبىز جاقسى ءومىر ىزدەپ، سيرياعا كەتتىك. سيريادا  تاعى ەكى بالانى دۇنيەگە اكەلدىم. دايش بەرگەن اقشاعا كۇن كوردىك. الايدا كۇن سايىن تولەنەتىن سوما قىسقارىپ وتىردى»، — دەدى دينا.

«وتباسىمىزبەن سيرياعا كەلىپ، بوس قالعان ۇيلەردىڭ بىرىندە تۇردىق. ءبىراق سيريادا ءومىر بىزگە ايتىلعانداي جاقسى ەمەس ەكەن. ونداعىلار شاريعات زاڭدارىن ۇستانبايدى. بىزگە باسىندا باسقا سومانى ۋادە ەتىپ، ءىس جۇزىندە ودان از تولەدى. ونىڭ ۇسىندە ءار جولى كولەمى ازايىپ وتىردى. سوڭعى رەت وتباسىمىزعا  30 دوللار بەردى. بۇل اقشاعا ءبىز تەك ازىق-تۇلىك پەن العاشقى قاجەتتىلىكتەگى زاتتاردى ساتىپ الدىق»، — دەدى ءتورت بالانىڭ اناسى.  

دينانىڭ ايتۋىنشا، ۆيدەوروليكتەردە ايتىلعان ءومىر شىندىققا جاناسپايدى. وتباسىنى شاقىرعان كەزدە، ەگەر ءبىر نارسە ۇناماسا، كەز كەلگەن ۋاقىتتا قايتىپ كەتۋگە بولاتىنىن ايتىپتى. ءبىراق ولاي بولماي شىققان.  

«ول جاقتان ءسىزدى سىرتقا شىعارمايدى. قاشۋعا تىرىسقانداردى ۇستاپ اكەلىپ، تۇرمەگە وتىرعىزادى. قاشقانىنا وكىنەتىنىن ايتسا عانا جىبەرەدى. ولاي ەتپەسە، ولتىرەدى. ەلىمىزگە ورالۋىمىز كەرەك دەگەن شەشىمدى ءوزىمىز قابىلدادىق. الايدا ول جاقتان جولعا شىعۋ وتە قيىن بولدى. كىمگە سەنىپ، كومەك سۇرارىڭدى بىلمەيسىڭ. ءبىر كۇنى ايەلدەر عانا جۇرۋگە بولاتىن جولدى بىلەتىن سيريالىق تابىلدى. قىركۇيەكتە وزگە قىزدارمەن بىرگە كۇردتەرگە بارىپ، ولارعا ءوزىمىز بەرىلدىك. ول جاقتان ءبىزدى 13 قاراشا كۇنى رەسەي فەدەراسياسىنىڭ  گروزنىي قالاسىنا الىپ كەلدى. ول جەردەن اتا-انامنىڭ ۇيىنە كەلدىم. كۇيەۋىم ءالى سيريادا ءجۇر، ءبىراق ول اسكەري ۇرىستارعا قاتىسپاعان.   سيريادا ەر ادامدارعا كەتۋ ءقاۋىپتى. ەگەر سودىرلار وتباسى قاشىپ كەتكەنىن بىلسە، ونى ولتىرەدى»، — دەيدى دينا.

دينا ءتورت بالاسىمەن بىرگە اتا-اناسىمەن تۇرىپ جاتىر. دينا بالالارىن بالاباقشا مەن مەكتەپكە بەرۋ ءۇشىن ولارعا قۇجات جاساتپاقشى.