يندۋستريالاندىرۋ كۇنى اياسىندا “قازاقستان” تەلەراديوكورپوراسياسى جاڭا يندۋستريالدى جوبالار جايلى 25 بەينەروليك ۇسىندى دەپ حابارلايدى Qamshy.kz اقپارات اگەنتتىگى. 

اتالمىش روليكتەر «Qazaqstan today» جوباسىنىڭ شەڭبەرىندە «IGRAPHIC» ديزاين-بيۋروسىمەن بىرىگىپ ازىرلەندى. الداعى ۋاقىتتا دايىندالعان بەينەماتەريالدار ۇلتتىق ارنادا جانە كورپوراسيا قۇرامىنا كىرەتىن ايماقتىق فيليالداردا كورسەتىلەتىن بولادى. جوبانىڭ باستى ماقساتى حالىقتى  جاڭا يندۋستريالدى جوبالارمەن تانىستىرىپ، ماڭىزدىلىعىن جەتكىزۋ. سونىمەن قاتار، جۇمىسپەن قامتۋ مۇمكىندىگى جايلى الدىن-الا اقپارات بەرۋ. بەينەروليكتەر  ماڭعىستاۋ وبلىسىنداعى قۇرىق پورتىنداعى پاروم كەشەنى، پاۆلودار وبلىسىنداعى قوسپالى اليۋمينيي ءوندىرىسىن ۇيىمداستىرۋ، الماتى وبلىسىنداعى مەتالل قۇراستىرۋ زاۋىتى جانە باسقا دا يندۋسترياليزاسيا باعدارلاماسىنىڭ اياسىنداعى جوبالارعا ارنالاتىن بولادى.

  ايتا كەتەيىك، «Qazaqstan today» جوباسى ماڭىزدى تاقىرىپتاردى وڭاي تۇردە ءارى قىزىقتى فورمادا جەتكىزەدى. سونىمەن قاتار، “Qazaqstan” ارناسىندا قىركۇيەك ايىنان باستاپ سەمەي پوليگونى، «استانا ەكسپو-2017»، قازاق ءتىلىنىڭ لاتىن گرافيكاسىنا ءوتۋى،  «نۇرلى جول» جانە تۇڭعىش پرەزيدەنت كۇنىنە ارنالعان بەينەروليكتەر جارىققا شىقتى.