قازاقستان مەن قىتايدىڭ شەكارا بويىنداعى ىنتىماقتاستىعى جونىندەگى كەزدەسۋدە ءسوز سويلەگەن الماتى وبلىسىنىڭ پروكۋرورى ازامات جىلقىبايەۆ جۇڭگو تاراپى "قورعاس" شەكارا بويى ىنتىماقتاستىعى حالىقارالىق ورتالىعىنداعى (شىحو) ءوز اۋماعىنا ساقالدى جانە مۇسىلمانشا كيىنگەن ادامداردى كىرگىزبەي جاتقانىن مالىمدەدى، دەپ حابارلايدى Qamshy.kz اقپارات اگەنتتىگى  Sputnik قازاقستانعا سىلتەمە جاساپ.

ونىڭ ايتۋىنشا، "قورعاس" شىحو ارنايى كولىك-جاياۋ جۇرگىنشى جولىندا ساۋىردەن باستاپ جۇڭگو اسكەري بولىمدەرى قىزمەت كورسەتەتىن قوسىمشا باقىلاۋ-تەكسەرۋ وتكىزۋ پۋنكتتەرى ورناتىلعان. بۇل شارا ءدىني ەكسترەميزم مەن حالىقارالىق تەرروريزمگە قارسى ارەكەت ەتۋ ماقساتىندا شىڭجاڭ-ۇيعىر اۆتونومدى اۋدانى بيلىگىنىڭ شەشىمىمەن قابىلدانعان.

"سونىمەن بىرگە، اتالعان پۋنكتتەردە ورتالىقتىڭ جۇڭگو تاراپىنا ۇلتى مەن ازاماتتىعىنا قاراماستان ساقال قويعان جانە مۇسىلمان تۇرمىس-سالتىنا ساي كيىنگەن ادامداردى وتكىزبەي جاتىر. بۇل قازاقستان ازاماتتارى ءۇشىن دە، ءبىزدىڭ اۋماقتان سوندا وتكىسى كەلەتىن شەتەل ازاماتتارى ءۇشىن دە ورتالىققا بارۋدى قيىنداتىپ جاتىر، ەكىنشىدەن، ەكى مەملەكەت اراسىنداعى تاۋار اينالىمى تومەندەدى"، — دەدى پروكۋرور.

ول اسكەري وتكىزۋ پۋنكتتەرىنىڭ جۇمىسىن "قورعاس" شىحو قىزمەتىن رەتتەۋ تۋرالى تالاپتار مەن كەلىسىمدەرگە سايكەس كەلتىرۋدى ۇسىندى. كەلىسىم بويىنشا، مۇنداي قىزمەتتى تەك تابيعات اپاتى، ەپيدەميا، توتەنشە جاعدايلار تۋىنداعان كەزدە قولدانۋ قاراستىرىلعان.  

بۇل اقپاراتتى قازاقستان باس پروكۋرورىنىڭ ورىنباسارى اندرەي لۋكين دە راستادى.   

ال، جۇڭگو جوعارى حالىقتىق پروكۋراتۋراسىنىڭ وكىلى گو سينۆان بۇل پروبلەما تۋرالى العاش رەت ەستىپ تۇرعانىن، سوندىقتان وسىنداي ۇساق ماسەلەلەردى شەشۋ ءۇشىن ەكى ەل وكىلدەرى اراسىندا تۇراقتى كەزدەسۋ وتكىزىپ تۇرۋ قاجەت ەكەنىن اتاپ ءوتتى.