بۇگىن الماتى قالاسىندا وتكەن قازاقستان مۇسىلماندارىنىڭ كەزەكتى VIII قۇرىلتايىندا سەرىكباي قاجى وراز باس ءمۇفتي بولىپ سايلاندى، دەپ حابارلايدى Qamshy.kz اقپارات اگەنتتىگى.

قۇرىلتاي جۇمىسىنا ق ر ءدىن ىستەرى جانە ازاماتتىق قوعام ءمينيسترى نۇرلان بايۇزاق ۇلى ەرمەكبايەۆ، قازاقستان مۇسىلماندارى ءدىني باسقارماسى ءتورالقا مۇشەلەرى، عۇلامالار كەڭەسىنىڭ مۇشەلەرى، تەولوگ-عالىمدار، زيالى قاۋىم وكىلدەرى، ەلىمىزدىڭ ءار وبلىسىنان كەلگەن قۇرىلتاي دەلەگاتتارى قاتىستى.

قۇرىلتاي جۇمىسىندا قازاقستان مۇسىلماندارى ءدىني باسقارماسىنىڭ 2013-2017 جىلدار ارالىعىندا اتقارعان ءىس-شارالارىنىڭ ەسەبى تىڭدالدى.

قمدب ءتوراعاسى ەرجان قاجى مالعاجى ۇلى باس ءمۇفتي لاۋازىمىنا نايب ءمۇفتي سەرىكباي قاجى ورازدىڭ كانديداتۋراسىن ۇسىندى.

«قۇرمەتتى قۇرىلتاي دەدەگاتتارى، وسىدان 5 جىل بۇرىن باس ءمۇفتي قىزمەتىنە سايلانعانىمدا بۇل اماناتتى ابىرويمەن اتقارىپ شىعۋدى اللادان سۇراپ ەدىم. سىزدەرمەن بىرگە كوپتەگەن اۋقىمدى ءىس-شارالاردى اتقاردىق. بۇل اماناتتى ورىنباسارىم سەرىكباي قاجى ورازعا تاپسىرۋعا شەشىم قابىلدادىم. ول 20 جىلدان استام ءدىني سالادا قىزمەت ەتىپ كەلەدى. ءدىني باسقارما تاريحىندا ءۇش ءمۇفتيدىڭ كەزەڭىندە بەلسەندىلىگىمەن كوزگە ءتۇستى. ونىڭ يدەياسى مەن ىسكەرلىگىنىڭ ارقاسىندا كوپتەگەن يگى جوبالار جۇزەگە استى. سەرىكباي قاجى وراز باس ءمۇفتي قىزمەتىن جوعارى دەڭگەيدە اتقارادى دەگەن سەنىمدەمىن. سىزدەر دە بۇل ويىمدى قۇپتايسىزدار دەپ ويلايمىن»، – دەپ اتاپ ءوتتى.

قۇرىلتايعا جينالعان 300 دەلەگات سەرىكباي قاجى ورازعا داۋىس بەرىپ، ءبىراۋىزدان باس ءمۇفتي لاۋازىمىنا سايلادى.

سەرىكباي ساتىبالدى ۇلى قۇرىلتاي دەلەگاتى الدىندا ءدىني سالادا ايانباي قىزمەت ەتۋگە سەنىم ءبىلدىردى.

سەرىكباي وراز ساتىبالدى ۇلى

1975 جىلى  12-ساۋىردە دۇنيەگە كەلگەن. 

ءبىلىمى:

1990-1992 جىلدارى تاشكەنت قالاسىندا قاريلار دايىندايتىن مەدرەسەنى تامامداعان.

1992-1994 جىلدارى مىسىرداعى ال-ازھار ۋنيۆەرسيتەتىندە وقىعان.

1995-1996 جىلدارى يسلامابادتاعى الەمدىك ۋنيۆەرسيتەتىندە ءبىلىم كوتەرگەن. الماتى مەملەكەتتىك اباي اتىنداعى ۋنيۆەرسيتەتىندە زاڭ فاكۋلتەتىن سىرتتاي  بىتىرگەن.

2012-2014 جىلدارى "نۇر مۇباراك" يسلام مادەنيەتى ۋنيۆەرسيتەتىندە "ءدىنتانۋ" ماماندىعىن ءتامامداعان.

2012-2014 جىلدارى م.دۋلاتوۆ اتىنداعى قوستاناي ينجەنەرلىك-ەكونوميكالىق ۋنيۆەرسيتەتىنىڭ "مەنەدجمەنت" ماماندىعى بويىنشا ماگيستراتۋراسىن ءبىتىرىپ، ەكونوميكا عىلىمدارىنىڭ ماگيسترى اكادەميالىق دارەجەسىن العان.

ەڭبەك  جولى:

الماتى مەشىتىنىڭ  نايب يمامى؛

يسلام ينستيتۋتىنىڭ ۇستازى؛

يسلام ينستيتۋتىنىڭ  رەكتورى؛

استانا قالاسى اقمولا وبلىسىنىڭ وكىل يمامى؛

ءقمدب-توراعاسىنىڭ ورىنباسارى، نايب ءمۇفتي؛

الماتى اكىمشىلىگىنىڭ ءدىني ءبولىمىنىڭ سەكتور مەڭگەرۋشىسى؛

وقو. سارىاعاش اۋدانىنىڭ باس يمامى؛

مەملەكەتتىك قىزمەت اگەنتتىگىنىڭ اعا قىزمەتكەرى؛

استانا قالاسى ادىلەت دەپارتامەنتى ءدىني ىستەر ءبولىمىنىڭ باس مامانى؛

ق ر پرەزيدەنتى ءىس باسقارماسىنىڭ اكىمشىلىك عيماراتتار ديرەكسياسىنىڭ ديرەكتورى بولىپ جۇمىس ىستەدى. قاجىلىققا بارعان.

2011-2013 جىلدارى قازاقستان مۇسىلماندارى ءدىني باسقارماسىنىڭ قوستاناي وبلىسىنىڭ وكىل يمامى قىزمەتىن اتقاردى.

2013 جىلى نايب ءمۇفتي بولىپ تاعايىندالدى.

2013 جىلدىڭ قازان ايىندا «ازىرەت سۇلتان» مەشىتىنىڭ باس يمامى جانە نايب ءمۇفتي بولىپ قىزمەت اتقاردى.

2017 جىلدىڭ 8 جەلتوقسانىندا قازاقستان مۇسىلماندارىنىڭ كەزەكتى VIII قۇرىلتايىندا قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي لاۋازىمىنا سايلاندى:  

 وتباسىلى، 7 بالاسى بار.