رەسەيدەگى كيروۆ ليسەيىندە وقيتىن بالانىڭ اكەسى ءمۇعالىم مەن ونىڭ ادۆوكاتىنا جۇدىرىق جۇمسادى. بولعان جاعدايدى ءمۇعالىم ۆيدەوعا ءتۇسىرىپ العان. جاعدايدىڭ ءمان-جايىن مەكتەپ ءمۇعالىمىنىڭ ادۆوكاتى انتون گلادكيح ايتىپ بەردى. ونىڭ سوزىنشە، ليسەيدە ورىس تىلىنەن ساباق بەرەتىن تانىسى ودان كومەك سۇراعان.
مەكتەپ ديرەكتورى ءمۇعالىمدى شاقىرىپ، وقۋشىلاردىڭ ءبىرىنىڭ اناسى ونىڭ ۇستىنەن شاعىم تۇسىرگەنىن ايتقان. پوليسيا پولكوۆنيگى بالاسىنىڭ ءمۇعالىمىن تومەندەتىپ باعا قوياتىنىن جانە رەپەتيتورلىق ءۇشىن اقشا جىمقىرادى دەپ ايىپتاعان.
ادۆوكات پەن ءمۇعالىم ديرەكتور كابينەتىنە كەلگەندە بالانىڭ اناسى دورەكى سويلەپ، ولاردى بالاعاتتاعان.
ادۆوكات جالا جابۋ بويىنشا سوتقا ارىزدانباق نيەتتە. مۇنى بىلگەن بالانىڭ اناسى بىرەۋگە حابارلاسىپ، ءوزىن بالاعاتتاپ، ۇستىنەن قىلمىستىق ءىس قوزعايمىز دەپ قورقىتىپ جاتىر دەپ شاعىمدانعان. وسىدان كەيىن كابينەتكە بەلگىسىز ەر ادام كىرىپ كەلىپ ادۆوكاتتى ۇرا باستاعان. ادۆوكاتتىڭ ءتىسى سىندى.
ءمۇعالىم شابۋىلدى ۆيدەوعا ءتۇسىرىپ تۇرعانىن بايقاعان الگى ەر ادام ونىڭ كوزىنەن جۇدىرىقپەن ۇرعان.
وقيعا ورنىنا دارىگەرلەر كەلىپ، جابىرلەنۋشىلەرگە كومەك كورسەتىپ، العان جاراقاتتارىن فوتوعا ءتۇسىرىپ الدى. ادۆوكات بالانىڭ اناسىنا جالا جابۋ بويىنشا، ال ەر ادامعا قول جۇمسادى دەپ شاعىم تۇسىرمەك.
ءقازىر تەكسەرۋ جۇمىستارى جۇرگىزىلىپ جاتىر.
