گەرمانيادا وتانداستارىمەن كەزدەسۋى كەزىندە قىرعىزستاننىڭ تۇڭعىش پرەزيدەنتى، 2005 جىلعى قىزعالداق ريەۆوليۋسياسى ناتيجەسىندە بيلىكتەن كەتىرىلگەن اسقار اقايەۆقا جۇمىرتقا لاقتىرعان. بۇل وقيعادان تۇسىرىلگەن ۆيدەو الەۋمەتتىك جەلىلەردە تارادى دەپ حابارلايدى Qamshy.kz اقپارات اگەنتتىگى ازاتتىقتىڭ قىرعىز قىزمەتىنە سىلتەمە  جاساپ.

Kyrgyz Club Germany ۇيىمداستىرعان وتانداستارمەن كەزدەسۋگە اسقار اقايەۆ زايىبى مايرام جانە قىزى بەرمەتپەن بىرگە بارعان. كەزدەسۋگە كەلگەندەردىڭ كەيبىرى اقايەۆتىڭ مۇندا كەلگەنىنە نارازى بولعان. قاتىسۋشىلاردىڭ ءبىرى ەكس-پرەزيدەنتتەن قىرعىز تىلىندە سويلەۋدى تالاپ ەتكەن. اقايەۆ وعان گەرمانيا ءتارىزدى دەموكراتيالىق ەلدە جۇرگەندىكتەن قالاعان تىلىندە سويلەيتىنىن ايتىپ جاۋاپ بەرگەن.

ۆيدەودا كەزدەسۋگە قاتىسقان بىرنەشە ادامنىڭ "اقايەۆ كەت!" دەگەن جازۋ ۇستاپ تۇرعانى كورىنەدى. اسقار اقايەۆ سۇراقتارعا جاۋاپ بەرۋدەن باس تارتىپ كەتۋگە ىڭعايلانعان ساتتە سول جەردە تۇرعان ەر ادامداردىڭ ءبىرى وعان جۇمىرتقا لاقتىرعان. مۇنان سوڭ الگى ادام مەن بەرمەت اقايەۆا سوزگە كەلىپ قالعان. بۇل وقيعاعا سول ماڭدا تۇرعان پوليسيا قىزمەتكەرلەرى ارالاسىپ، ەكى تاراپتى دا ساباسىنا تۇسىرگەن.

شارانى ۇيىمداستىرعان Kyrgyz Club Germany قاۋىمداستىعىنىڭ باسشىسى باقىت كوبەگەنوۆ جۇمىرتقا لاقتىرعان ادامدى تانىمايتىنىن ايتىپ، ونىمەن پوليسيا اڭگىمە وتكىزەتىنى تۋرالى حابارلاعان.

2005 جىلعى ناۋرىزداعى ريەۆوليۋسيادا كەيىن اسكار اقايەۆ وتباسىمەن بىرگە ماسكەۋگە قاشىپ بارعان. ءقازىر ول سوندا عىلىم سالاسىندا جانە وقىتۋشى بولىپ ەڭبەك ەتەدى. اقايەۆتان كەيىن قىرعىزستاندا بيلىك باسىنا كەلگەن قۇرمانبەك باكييەۆ 2010 جىلى ساۋىردەگى ريەۆوليۋسيا ناتيجەسىندە بيلىكتەن باس تارتىپ، شەتەلگە قاشۋعا ءماجبۇر بولعان. ول ءقازىر مينسكىدە تۇرىپ جاتىر. باكييەۆتى بيلىكتەن قۋعان سوڭ قىرعىزستاندى ۋاقىتشا ۇكىمەت باسقارىپ، روزا وتۋنبايەۆا وتپەلى كەزەڭ پرەزيدەنتى بولىپ تاعايىندالعان. 2011 جىلى روزا وتۋنبايەۆا بيلىكتى جالپىحالىقتىق سايلاۋ ارقىلى پرەزيدەنت قىزمەتىنە جاڭادان سايلانعان المازبەك اتامبايەۆقا وتكىزگەن. كونستيتۋسياعا سايكەس، التى جىلدىق قىزمەت وكىلەتى اياقتالعاننان كەيىن اتامبايەۆ بيىلعى پرەزيدەنت سايلاۋىندا جەڭىسكە جەتكەن سوورونباي جەەنبوكيەۆكە بيلىكتى تاپسىرعان.