مۇرات تەلىبەكوۆ كولىكتە كوز جۇمعان جۇرگىزۋشىنى ۆيدەوعا تۇسىرگەنى ءۇشىن ۇستالعان، دەگەنمەن مۇسىلماندار وداعى ونى بەلگىسىز بىرەۋلەر ۇرىپ كەتكەنىن مالىمدەدى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساي وتىرىپ.
«قازاقستان مۇسىلماندارى وداعى» بىرلەستىگىنىڭ باسشىسى مۇرات تەلىبەكوۆ كولىكتە كوز جۇمعان جۇرگىزۋشىنى ۆيدەوعا تۇسىرگەنى ءۇشىن ۇستالدى، دەپ حابارلادى الماتى ءىىد رەسمي وكىلى سالتانات ازىربەك.
پوليسيانىڭ مالىمەتىنشە، تيميريازيەۆ كوشەسىمەن كەلە جاتقان جۇرگىزۋشى ءوزىن جايسىز سەزىنىپ، جول شەتىنە توقتاپ، سول جەردە كوز جۇمعان. ءىىب قىزمەتكەرلەرى قاجەتتى شارالاردى قولعا الىپ جاتقان كەزدە وقيعا ورنىنا تەلىبەكوۆ كەلگەن. ول تۋىستارىنان رۇقسات الماستان، قازا بولعان ادامنىڭ ءمايىتىن ۆيدەوعا تۇسىرە باستايدى.
"تۋىستارى ەسكەرتۋ جاساعان، ءبىراق ونى ەلەمەگەن. سول كەزدە تەلىبەكوۆ پەن مارقۇمنىڭ اكەسىنىڭ اراسىندا جانجال شىققان. جول پوليسياسىنىڭ ەكيپاجى تەلىبەكوۆتى تۇتقىنداپ، ءتۇسىندىرۋ جۇمىسىن جۇرگىزۋ ءۇشىن اىىب-گە جەتكىزەدى. سول جەردە ول ءوزىن رەنجىتكەندەردىڭ ۇستىنەن ارىز جازدى، سودان كەيىن ونى بوساتىپ جىبەردى"، — دەدى ازىربەك.
مۇرات تەلىبەكوۆتىڭ سوققىعى جىعىلعانى تۋرالى حابارلامانى كەشە قازاقستان مۇسىلماندارى وداعى تاراتقان بولاتىن. وقيعا 19 جەلتوقسا كۇنى ءال-فارابي اتىنداعى قازۇۋ اۋماعىندا بولعان.
"ۋنيۆەرسيتەت ستۋدەنتتەرى مەن وقىتۋشىلارىنىڭ كوز الدىندا بەلگىسىز بىرەۋلەر م.تەلىبەكوۆتى ۇرىپ-سوقتى… سوققىعا جىعىلعان قۇقىق قورعاۋشىنى پوليسەيلەر كولىككە كۇشتەپ مىنگىزىپ، ۇيالى تەلەفونىن تارتىپ الىپ، بوستاندىق اىىب-گە الىپ كەتتى"، — دەپ جازىلعان قمو حابارلاماسىندا.
"قازاقستان مۇسىلماندارى وداعى" بىرلەستىگى 2005 جىلى جەكە قور رەتىندە تىركەلگەن.
