بۇىگنگى تاڭدا سەنساسيانىڭ سوڭىنا تۇسكەن سايتتار كوبەيىپ كەتكەن. ارينە، وقىرماننىڭ سۇرانىسىن ەسكەرۋگە تۋرا كەلەدى. الايدا كەز كەلگەن ماسەلەگە ەلدىك مۇددە، ۇلتتىق تانىم مەن تاربيە، ءارى جۋرناليستىك ەتيكا تۇرعىسىنان قاراۋدى باستى نىساناعا الۋ كەرەك. بۇل تۋرالى بۇگىن استانادا ءوتىپ جاتقان قازاق سايتتارى رەداكتورلارىنىڭ فورۋمى بارىسىندا ق ر اقپارات جانە كوممۋنيكاسيالار ءمينيسترى داۋرەن ابايەۆ ايتتى، دەپ حابارلايدى Qamshy.kz اقپارات اگەنتتىگى.

استانادا قازاق سايتتارى رەداكتورلارىنىڭ فورۋمى ءوتىپ جاتىر. فورۋمعا ق ر اقپارات جانە كوممۋنيكاسيا مينيسترلىگى قولداۋ كورسەتتى.

زەرتتەۋلەرگە سايكەس، سوڭعى جىلدارى قازاق سايتتارىنىڭ سانى وسكەن. الايدا ولاردىڭ اراسىنداعى باسەكەلەستىك تومەن بولىپ تۇر. كونتەنت بىرتەكتى، ال قازاق سايتتارىنىڭ جەكە ىزدەنىسى، جەكە قولتاڭباسى جوق. وسىعان وراي فورۋمدى وتكىزۋدەگى باستى ماقسات – قازاق ءتىلدى سايتتاردى دامىتۋ، كونتەنت ساپاسىن كوتەرۋ.

ءوز سوزىندە مينيستر ءداستۇرلى باعىت پەن جاڭا مەديانىڭ ەرەكشەلىكتەرىنە، ءارى قازاق ءتىلدى رەسۋرستاردىڭ ورنى مەن الەۋمەتتىك جەلىنىڭ ىقپالى جايىنا توقتالدى.

«بۇگىنگى تاڭدا الەمدە 7 ملرد.-تان استام ادامنىڭ تەڭ جارتىسى الەۋمەتتىك جەلىنى قولدانادى. الەۋمەتتىك جەلىلەردىڭ ءوزى اقپارات قۇرالدارىنىڭ سالماقتى باسەكەلەسىنە اينالدى. قازىرگى كۇننىڭ باستى تاقىرىبىن فەيسبۋكتەگى قاراپايىم قولدانۋشىسى قالىپتاستىرا الادى نەمەسە تۇتاس رەداكسيا زەرتتەيتىن ماسەلەنىڭ ماڭىزدىلىعىن WhatsApp-تاعى ءبىر عانا ۆيدەو جوققا شىعارۋى مۇمكىن. الايدا بۇل ءۇردىس جۋرناليستەردىڭ ءرولىن تومەندەتە العان جوق. كەرىسىنشە الەۋمەتتىك مەديا دامىعان سايىن كاسىبي ماماندارىنىڭ باعاسى ارتا ءتۇستى»، - دەي كەلە ابايەۆ باسەكەلەستىكتىڭ قاتاڭ تالاپتارىنا توتەپ بەرىپ، اقپارات كەڭىستىگىنەن لايىقتى ورىن الۋ ءۇشىن قازاق ءتىلدى رەسۋرستارىنىڭ الدىندا تۇرعان بىرنەشە ماڭىزدى ماسەلەنى اتادى.

«بىرىنشىدەن، كونتەنتكە كوزقاراستى وزگەرتۋ. قازىرگى كۇنى اقپاراتتىڭ ماڭىزىن اۋىستىرۋعا قولدانۋشىنىڭ تىكەلەي ىقپالى تيە باستادى. وكىنىشكە قاراي، وسىنىڭ سالدارىنان سەنساسيانىڭ سوڭىنا تۇسكەن سايتتار دا كوبەيە باستادى. ارينە، وقىرماننىڭ سۇرانىسىن ەسكەرۋگە تۋرا كەلەدى. الايدا كەز كەلگەن ماسەلەدە ەلدىك مۇددە، ۇلتتىق تانىم مەن تاربيە، ءارى جۋرناليستىك ەتيكا تۇرعىسىنان قاراۋدى باستى نىساناعا الۋ ءتيىس دەپ ويلايمىز. باق-تىڭ الەۋمەتتىك جەلىدەن باستى ايىرماشىلىعى مەن ارتىقشىلىعى دا وسىندا.

كونتەنكە باستى ءمان بەرىپ جاتقانىمىز،  كەزىندە جۋرناليستيكا قوعامدى تاربيەلەيدى دەيتىنبىز. قازىرگى كۇنى جۋرناليستەر قوعامدى تاربيەلەۋگە ەمەس، سەنساسيا قۋامىز دەپ، ءار سوزگە ەرىپ كەتە بەرەتىن بولدى.»، - دەدى.

ءمينيستردىڭ ايتۋىنشا، اقپارات جانە كوممۋنيكاسيالار مينيسترلىگى كەلەر جىلدان باستاپ اۋىلدا تۇراتىن 2 ملن-نان استام ادامداردى ساپالى ينتەرنەتپەن قامتۋ جوباسىن باستاماق. كەلەر جىلى باستاساق 2020 جىلى اياقتايمىز. 1200 اۋىلدى جىلدام ينتەرنەتپەن قامتاماسىز ەتە الادى.

«ەكىنشىدەن، ۇلتتىق مۇددەنى ۇگىتتەۋدى ۇتىمدى جۇرگىزۋ. الايدا بۇگىنگى زامان اعىمى ۇلتتىق ماسەلە ۇعىمىن ءتىل مەن ءدىل، ادەبيەت پەن تاريح، مادەنيەت اياسىندا عانا ەمەس، اۋقىمدى قاراستىرۋدى تالاپ ەتەدى. قازىرگى ۇلكەن پروبلەمانىڭ ءبىرى ۇلتتىق مۇددە ماسەلەسىن جالاڭ ۇرانمەن الماسىپ كەتتى. ارانداتۋشىلىق سيپات تا كورىنىس بەرەدى. الەۋمەتتىك جەلىدە جۇرتتىڭ نامىسىنا ءتيىپ، جانجالعا شاقىرعان «پاتريوتتىق» پىكىرلەر بەلەڭ الىپ بارادى. جاھاندىق ماسەلەلەردىڭ دامۋىنا ۇلەس قوساتىن اقپاراتتى حالىققا ءتيىمدى جەتكىزە ءبىلۋ – قازىرگى جۋرناليستەردىڭ ۇلتتىق مۇددەگە قىزمەت ەتۋدەگى باستى مىندەتى.

ۇشىنشىدەن، ءداستۇرلى باعىت پەن جاڭا مەديانىڭ قارىم-قاتىناسىنىڭ تەرەڭدەۋى. بۇگىنگى تاڭدا الەۋمەتتىك مەديا باسىمدىق تانىتىپ تۇر دەگەن پىكىرلەر كوپ. الايدا زەرتتەۋلەرگە سايكەس، ءالى دە ءداستۇرلى باعىتتىڭ، سونىڭ ىشىندە تەلەارنالاردىڭ فەيسبۋككە قاراعاندا ىقپالى ءۇش ەسەگە ارتىق. وسى رەتتە، ءداستۇرلى باعىت پەن جاڭا مەديا ءبىرىن-بىرى تولىقتىراتىن كەشەندى قۇرالعا اينالۋى ءتيىس»، - دەدى داۋرەن ابايەۆ.

ايتا كەتەيىك، قازاق سايتتارى رەداكتورلارىنىڭ العاشقى كونفەرەنسياسى 2013 جىلى 22 قاڭتاردا وتكەن. «قازاق ينتەرنەتىنىڭ جاڭا دەڭگەيگە كوتەرىلۋى ءۇشىن 2-3 جەتكىلىكتى»، - دەلىنگەن ەدى فورۋم بارىسىندا.  ول ۋاقىتتا قازاق سايتتارىنىڭ قالىپتاسۋ كەزەڭى اياقتالعان. الداعى ماقسات – ولاردىڭ جۇمىس ساپاسىن جاقسارتۋ جولىندا جۇمىلا ارەكەت ەتۋ بولعان.